Read Waray Samarenyo Meaning Based Deuteronomio 34 Bible Online

Deuteronomio 34 - Waray Samarenyo Meaning Based bible

Deuteronomio 34

¹Tikang ha kapatagan han Moab sinmagka hi Moises ha Bukid Nebo, ngadto ha sampaw han Bukid Pisga ha sinirangan han Jerico, ngan didto iginpakita ha iya han GINOO an bug-os nga tuna: an katunaan han Galaad tubtob han bungto han Dan didto ha amihanan;

²an bug-os nga katunaan han Neftali; an mga katunaan han Efraim ug Manases; an katunaan han Juda tubtob han Dagat Mediterraneo didto ha katundan;

³an timogan nga bahin han Juda; ngan an kapatagan nga naabot tikang ha Zoar ngadto ha Jerico nga syudad hin kakahoyan nga palmera.

⁴Niyan nagsiring an GINOO kan Moises, “Amo ini an tuna nga akon iginsaad kanda Abraham, Isaac, ug Jacob nga akon ihahatag ngadto han ira mga tulin. Ginpakita ko ikaw hini, kundi diri ko ikaw tutugotan hin pagkadto hini nga katunaan.”

⁵Sanglit namatay hi Moises nga surugoon han GINOO didto han tuna han Moab, sumala han iginsiring han GINOO.

⁶Iginlubong hiya han GINOO didto hin usa nga Kahamub-an ha Moab, nga tugbang han bungto han Betpeor, kundi ngada yana nga adlaw waray maaram han dapit nga ginlubngan ha iya.

⁷Syento baynte an panuigon ni Moises han kamatay niya; makusog la gihapon hiya ngan maupay pa an iya pagkita.

⁸Nagmabidoon an mga tawo han Israel tungod ha iya sulod hin 30 ka adlaw didto han kapatagan han Moab.

⁹Napuno hin kinaadman hi Josue nga anak ni Nun, kay gintudlok hiya ni Moises nga iya saliwan. Nagsugot kan Josue an mga tawo han Israel ngan nagtuman han mga sugo nga iginhatag ha ira han GINOO pinaagi kan Moises.

¹⁰Waray gud manaragna han Israel nga sugad kan Moises; nga suok kaupay han GINOO.

¹¹Waray na gud iba nga manaragna nga nagbuhat hin mga milagro ngan mga orosahon sugad hadton ipinapagbuhat han GINOO kan Moises kontra han hadi han Ehipto, han iya mga opisyal ngan han bug-os nga nasod.

¹²Waray na iba nga manaragna nga nakagbuhat han dagko ngan magpakaharadlok nga mga butang nga ginbuhat ni Moises ha atubangan han bug-os nga Israel.