Read Waray Samarenyo Meaning Based Deuteronomio 4 Bible Online

Deuteronomio 4 - Waray Samarenyo Meaning Based bible

Deuteronomio 4

¹Niyan nagsiring han mga tawo hi Moises, “Pagsugta niyo an ngatanan nga mga balaod nga akon igintutdo ha iyo, basi mabuhi kamo ngan magtag-iya kamo han tuna nga ighahatag ha iyo han GINOO nga Dyos han iyo mga ginikanan.

²Ayaw niyo pagdugangi hin bisan ano an akon iginsugo ha iyo, ngan ayaw liwat pag-ibani. Pagtumana an mga sugo han GINOO nga iyo Dyos, nga akon iginhatag ha iyo.

³Hinkit-an niyo an ginbuhat han GINOO didto ha Bukid Peor. Ginpuo niya an ngatanan nga nagsingba didto kan Baal

⁴kundi ngada ha iyo nga mga magtinumanon ngadto han GINOO nga iyo Dyos nagpapabilin nga buhi ngada hini nga adlaw.

⁵“Igintutdo ko ha iyo an ngatanan nga mga balaod sumala han iginsugo ha akon han GINOO nga akon Dyos. Pagtumana ini didto han tuna nga iyo susulongon ngan pagtatag-iyahon.

⁶Pagsugta ini niyo hin matinumanon basi makakilala an mga tawo han iba nga mga nasod han iyo kamakinaadmananon. Kon hibatian nira ini ngatanan nga mga balaod, masiring hira, ‘Waray ruhaduha may-ada kinaadman ug saraboton ini nga dako nga nasod!’

⁷“Waray iba nga nasod, magkadiano hin kadako, nga may-ada diyos nga suok kaupay kon nagkikinahanglan hira ha iya nga malabaw pa kay han GINOO nga aton Dyos. Pinamamatian kita kon natawag kita ha iya hin pakibulig.

⁸Waray iba nga nasod, magkadiano hin kadako, nga may mga balaod nga sugad hin kamagtadong hadton akon igintutdo ha iyo yana nga adlaw.

⁹Pagbantay gud kamo basi diri kamo mahingalimot, samtang buhi pa kamo, han iyo hinkit-an han iyo kalugaringon nga mga mata. Sumati an iyo mga anak ngan an iyo mga apo

¹⁰mahitungod han adlaw han pagtukdaw niyo ha atubangan han GINOO nga iyo Dyos didto ha Bukid Sinai,[4] han pagsiring ha akon han GINOO, ‘Tiroka an mga tawo. Karuyag ko nga mamati hira han akon igsisiring, basi mahibaro hira hin pagsugot nga matinahuron ha akon samtang buhi pa hira, ngan basi pagtutdoan nira an ira mga anak hin pagsugot ha akon.’

¹¹“Sumati an iyo mga anak han pagkadto ngan pagtukdaw niyo didto han ubos han bukid nga natahoban hin magdakmol nga mga dampog nga nagawas in maitom nga aso ug kalayo nga nag-uulyab ngadto ha langit.

¹²Sumati hira han paghimangraw ha iyo han GINOO tikang ha butnga han kalayo, han pakabati niyo ha iya nga nagyayakan, kundi waray kamo makakita ha iya.

¹³Ginsumatan kamo niya han kinahanglan niyo pagbuhaton ha pagtuman han ginsaaran nga iya ginhimo ha iyo—kinahanglan pagtumanon niyo an Napulo nga mga Sugo nga iya iginsurat dida hin duha nga mga papan nga bato.

¹⁴Ginsugo ako han GINOO hin pagtutdo ha iyo han ngatanan nga mga balaod nga iyo pagtutumanon didto han tuna nga iyo na susulongon ngan tatag-iyahon.

¹⁵“Han paghimangraw ha iyo han GINOO tikang ha butnga han kalayo didto ha Bukid Sinai, waray kamo makakita ha iya. Sanglit para han iyo kalugaringon nga kaupayan, talinguhaa gud niyo

¹⁶nga diri kamo makasala pinaagi hin paghimo hin mga diyosdiyos hin bisan ano gud nga hulagway—bisan lalake o babaye,

¹⁷bisan ano nga mananap o tamsi,

¹⁸nag-uusoy nga mananap o isda.

¹⁹Ayaw pagpasulay hin pagsingba ngan pag-alagad han iyo hinkikit-an didto ha langit—an adlaw, an bulan, ngan an mga bitoon. Iginhatag ini han GINOO nga iyo Dyos ngadto han iba nga mga katawhan basi pagsingbahon nira.

²⁰Kundi kamo amo an mga tawo nga iya gintalwas tikang ha Ehipto, usa nga naglalahinggab nga hudno. Ginpagawas kamo niya basi mahimo kamo nga iya kalugaringon nga mga tawo, asta ngada yana nga adlaw.

²¹Tungod ha iyo nasina ha akon an GINOO nga aton Dyos ngan nagsumpa hiya nga diri ako makakatabok han Salog Jordan hin pagsulod han matambok nga tuna nga iya ihahatag ha iyo.

²²Mapatay ako dinhe hini nga tuna ngan diri gud ako makakatabok han salog, kundi makakatabok kamo ngan magtatag-iya hito nga matambok nga tuna.

²³Talinguhaa niyo nga diri gud niyo hingalimtan an ginsaaran nga ginhimo ha iyo han GINOO nga iyo Dyos. Pagsugta niyo an iya sugo nga nagdidiri ha iyo hin paghimo hin bisan ano nga diyosdiyos,

²⁴kay an GINOO nga iyo Dyos sugad hin naglalahinggab nga kalayo; naabugho gud hiya nga Dyos.

²⁵“Bisan kon magmaiha na kamo didto han tuna ngan manganak ngan mangapo na kamo, ayaw gud kamo pagpakasala pinaagi hin paghimo hin diyosdiyos nga bisan ano nga hulagway. Maraot ini ha atubangan han GINOO, ngan makakapasina ini ha iya.

²⁶Sasangpiton ko an langit ngan an tuna nga mga saksi nakon kontra ha iyo yana nga adlaw, nga kon supakon ako niyo, maaanaw kamo dayon tikang han tuna nga pagtatag-iyahon niyo ha tabok han Jordan. Mapupuo gud kamo.

²⁷Igpapasarang kamo han GINOO didto han iba nga mga nasod, diin gutiay la ha iyo an mahibibilin nga buhi.

²⁸Didto mag-aalagad kamo hin kadiyosan nga hinimo hin mga kamot hin tawo, kadiyosan nga kahoy ug bato, kadiyosan nga diri nakakakita o nakakabati, nakakakaon o nakakabaho.

²⁹Didto magbibiling kamo han GINOO nga iyo Dyos; ngan hiaagian niyo hiya kon kinasingkasing an iyo pagbiling ha iya.

³⁰Kon aada na kamo ha kakurian ngan mahinabo ha iyo ini ngatanan nga mga butang, ha katapostaposan mabalik kamo gihapon ngadto han GINOO ngan magsusugot kamo ha iya.

³¹Maloloy-on hiya nga Dyos. Diri kamo niya babayaan o pupuohon, ngan diri niya hingangalimtan an ginsaaran nga ginhimo niya ha iyo mga ginikanan.

³²“Usisaha daw niyo an naglabay nga panahon, an panahon han waray pa kamo katatawo, ngadto pa gud han panahon han pagtuhaa han Dyos han tawo dinhe ha tuna. Usisaha an bug-os nga tuna. Nahinabo na ba in sugad hini kadako nga butang? May-ada na ba nakabati hin bisan ano nga sugad hini?

³³May-ada ba mga tawo nga nabuhi katapos nira makabati hin diyos nga naghimangraw ha ira ha butnga hin kalayo, sugad han iyo hinbatian?

³⁴May-ada na ba diyos nga nangahas hin pagkadto ngan pagkuha hin mga tawo tikang hin lain nga nasod ngan paghimo ha ira nga iya kalugaringon, sugad han ginbuhat ha iyo han GINOO nga iyo Dyos didto ha Ehipto? Ha atubangan gud han iyo mga mata ginamit niya an iya dako nga gahom ug kusog; ginpadara niya in mga peste ug araway, ginbuhat niya in mga milagro ngan mga orosahon, ngan ginpahinabo in magpakaharadlok nga mga butang.

³⁵Iginpakita ini ha iyo han GINOO, ha pagpamatuod ha iyo nga hiya gudla amo an Dyos ngan waray na iba.

³⁶Ginpabati kamo niya han iya tingog tikang ha langit basi makagtutdo hiya ha iyo; ngan dinhe ha tuna ginpakita kamo niya han iya baraan nga kalayo, ngan naghimangraw hiya ha iyo ha butnga han kalayo.

³⁷Tungod nga iya ginhigugma an iyo kaapoy-apoyan, ginpili kamo niya, ngan pinaagi han iya dako nga gahom, hiya ngahaw an nagpagawas ha iyo ha Ehipto.

³⁸Han pagsulong niyo, iya gintabog in mga nasod nga mas dagko ngan mas gamhanan kay ha iyo, basi pasudlon kamo niya ngan ighatag ha iyo an ira tuna nga naangkon niyo ngada yana.

³⁹Sanglit hinumdomi yana nga adlaw ngan ayaw gud niyo hingalimti: an GINOO amo an Dyos didto ha langit ngan dinhe ha tuna. Waray na iba nga diyos.

⁴⁰Pagsugta niyo an ngatanan niya nga mga balaod nga iginhatag ko ha iyo yana nga adlaw, ngan maghihingaupay kamo ngan an iyo mga tulin. Magpapadayon kamo hin pag-ukoy didto han tuna nga ihahatag ha iyo han GINOO nga iyo Dyos, nga maaangkon niyo ha kadayonan.”

⁴¹Niyan iginggahin ni Moises in tulo nga mga syudad ha sinirangan han Jordan,

⁴²nga sadang kaayopan hin usa ka tawo ngan diri hiya paglabtan kon makamatay hiya, hin diri tinuyo, hin tawo nga diri niya kaaway. Makakapalagiw hiya ngadto hin usa hini nga mga syudad ngan diri hiya papatayon.

⁴³Para han tribo ni Ruben an arayopan nga syudad amo an Beser didto ha kamingawan nga patag nga sampaw han bukid; para han tribo ni Gad, amo an Ramot didto ha katunaan han Galaad; ngan para han tribo ni Manases, amo an Golan didto ha katunaan han Basan.

⁴⁴Iginhatag ni Moises ha mga tawo han Israel an mga balaod ngan mga pagturon-an han Dyos.

⁴⁵Katapos han paggawas nira ha Ehipto ngan nakadto na hira han kahamub-an nga sinirangan han Salog Jordan, nga tugbang han bungto han Betpeor, iginhatag ni Moises ha ira ini nga mga balaod. Didto ini han katunaan nga gintag-iya hadto anay ni Hadi Sihon han mga Amoreohanon, nga naghadi didto ha bungto han Hesbon. Ginpirde hiya ni Moises ngan han mga tawo han Israel han paggawas nira han Ehipto.

⁴⁶

⁴⁷Gintag-iya nira Moises an iya tuna, ngan an tuna ni Hadi Og ha Basan, nga lain nga Amoreohanon nga hadi nga nag-ukoy didto ha sinirangan han Jordan.

⁴⁸An kahiluag hini nga tuna natikang ha bungto han Aroer ha ligid han Salog Arnon ngadto han Bukid Sion[5] didto ha amihanan, nga amo an Bukid Hermon.

⁴⁹Nahiupod liwat hini an ngatanan nga katunaan ha sinirangan han Salog Jordan ngadto han Dagat Patay didto ha timogan ngan ngadto ha ubos han Bukid Pisga didto ha sinirangan.