Read Waray Samarenyo Meaning Based Deuteronomio 5 Bible Online

Deuteronomio 5 - Waray Samarenyo Meaning Based bible

Deuteronomio 5

¹Gintirok ni Moises an ngatanan nga mga tawo ha Israel ngan ginsiring hira, “Mga tawo ha Israel, pamatii an ngatanan nga mga balaod nga ihahatag ko ha iyo yana nga adlaw. Pag-admi ngan talinguhaa nga pagtumanon gud ini niyo.

²Didto ha Bukid Sinai naghimo hin ginsaaran an GINOO nga aton Dyos

³diri la ha aton mga ginikanan, kundi ha aton ngatanan nga mga buhi pa yana nga adlaw.

⁴Didto han bukid nakig-atubang ha iyo hin pakighimangraw an GINOO tikang ha butnga han kalayo.

⁵Hito nga takna nagpabutnga ako ha iyo ngan han GINOO hin pagsumat ha iyo han iginsiring niya, kay nahadlok kamo han kalayo ngan waray kamo sumagka han bukid. “Nagsiring an GINOO,

⁶‘Ako amo an GINOO nga iyo Dyos nga nagpagawas ha iyo tikang ha Ehipto diin mga oripon kamo.

⁷“‘Ayaw kamo pagsingba hin lain nga diyos labot ha akon.

⁸“‘Ayaw kamo paghimo para ha iyo ngahaw hin mga ladawan hin bisan ano nga butang nga aadto ha langit, o aanhi ha tuna, o aadto ha tubig ha ilarom han tuna.

⁹Ayaw kamo pagyukbo o pagsingba hin bisan ano nga diyosdiyos, kay ako amo an GINOO nga iyo Dyos ngan maabugho ako nga Dyos. Kinakastigo ko adton mga nagdudumot ha akon ngan an ira mga tulin tubtob han ikatulo ngan ikaupat nga katulinan.

¹⁰Kundi ipinapakita ko an akon paghigugma ngadto ha yinukot nga mga katulinan[6] hadton mga nahigugma ha akon ngan nagsusugot han akon mga balaod.

¹¹“‘Ayaw niyo paggamita an akon ngaran hin maraot nga panuyo, kay ako, nga GINOO nga iyo Dyos, makastigo han bisan hin-o nga magamit han akon ngaran hin diri kaangayan.

¹²“‘Tumana niyo an Adlaw nga Igparahuway ngan ini nga adlaw sumala han iginsugo ha iyo han GINOO nga iyo Dyos.

¹³May-ada niyo unom ka adlaw hin pagtuman han ngatanan niyo nga mga buruhaton,

¹⁴kundi adlaw hin pagpahuway an ikapito nga adlaw, ngan ighahalad ini niyo ha akon. Dida hito nga adlaw kinahanglan waray magtrabaho—bisan hi kamo, an iyo mga anak, an iyo mga oripon, an iyo mga hayop, o an mga lumalangyaw nga nag-uokoy dida han iyo nasod. Kinahanglan pumahuway an iyo mga oripon sugad ha iyo.

¹⁵Hinumdomi nga mga oripon kamo didto ha Ehipto ngan ako nga GINOO nga iyo Dyos an nagtalwas ha iyo pinaagi han akon dako nga gahom ug kusog. Amo ito nga nagsusugo ako ha iyo nga iyo pagtumanon an Adlaw nga Igparahuway.

¹⁶“‘Tahora niyo an iyo amay ngan an iyo iroy sugad nga ako nga GINOO nga iyo Dyos an nagsusugo ha iyo, basi maghingaupay kamo ngan maghilawig an iyo kinabuhi didto han tuna nga ihinahatag ko ha iyo.

¹⁷“‘Ayaw kamo pagpatay.

¹⁸“‘Ayaw kamo panlibog.

¹⁹“‘Ayaw kamo pangawat.

²⁰“‘Ayaw kamo pagsumbong hin buwa kontra han iyo igkasi tawo.

²¹“‘Ayaw kamo kaipa han asawa hin iba nga tawo. Ayaw kaipa han iya balay, han iya tuna, han iya mga oripon, han iya mga baka, han iya mga asno, o han bisan ano nga iya mga butang.’

²²“Amo ini an mga sugo nga iginhatag ha iyo ngatanan han GINOO han pagkatirok niyo didto han bukid. Han paghimangraw niya hin makusog nga tingog tikang ha butnga han kalayo ngan tikang han magdakmol nga mga dampog, iginhatag niya ini nga mga sugo ngan waray na iba. Katapos iya iginsurat ini dida hin duha nga mga papan nga bato ngan iginhatag ini ha akon.

²³“Han naglalarab na an bug-os nga bukid ngan hinbatian niyo an tingog tikang han kasisidman, dinmaop ha akon an iyo mga pangulo ngan an mga puno han iyo mga tribo

²⁴ngan nagsiring, ‘Iginpakita ha aton han GINOO nga aton Dyos an iya pagkagamhanan ngan an iya pagkaharangdon han pakabati ta ha iya nga nagyayakan tikang ha butnga han kalayo! Yana nga adlaw aton hinkit-an nga mahihimo pa mabuhi in usa ka tawo bisan kon naghimangraw ha iya an Dyos.

²⁵Kundi kay ano nga igbubutang ta na liwat an aton kinabuhi ha kataragman han kamatayon? Pagpupuohon kita hito nga makalilisang nga kalayo. Magkakamatay kita kon hibatian ta na liwat nga magyayakan an GINOO nga aton Dyos.

²⁶May-ada na ba tawo nga nabuhi katapos niya pakabati han buhi nga Dyos nga nagyayakan tikang hin kalayo?

²⁷Pakadto, Moises, ngan pamatii an ngatanan nga igsisiring han GINOO nga aton Dyos. Katapos balik ngahaw ngan sumati kami han iya iginsiring ha imo. Mamamati ngan magsusugot kami.’

²⁸“Han pakabati hini han GINOO, nagsiring hiya ha akon, ‘Hinbatian ko an iginsiring hini nga mga tawo, ngan husto an ira iginsiring.

²⁹Kon dayuday la unta nga sugad hini an ira pagbati! Kon dayuday la unta nga matahod hira ha akon ngan magsusugot han ngatanan ko nga mga sugo, basi maghingaupay hira ngan an ira mga tulin, ha kadayonan!

³⁰Kadto ngan pabalika hira ngadto han ira mga tulda.

³¹Kundi ikaw, Moises, pabilin dinhe ha akon, ngan ighahatag ko ha imo an ngatanan ko nga mga balaod ngan mga sugo. Igtutdo ini ngadto han mga tawo, basi pagtumanon ini nira didto han tuna nga akon ihahatag ha ira.’

³²“Mga tawo han Israel, talinguhaa nga pagbuhaton gud niyo an ngatanan nga iginsugo ha iyo han GINOO nga iyo Dyos. Ayaw niyo pagsupaka an bisan ano han iya mga balaod.

³³Tumana ini ngatanan, basi maghingaupay kamo ngan basi magpadayon kamo hin pag-ukoy didto han tuna nga iyo pagtatag-iyahon.