Read Waray Samarenyo Meaning Based Deuteronomio 8 Bible Online

Deuteronomio 8 - Waray Samarenyo Meaning Based bible

Deuteronomio 8

¹“Pagsugta nga matinumanon an ngatanan nga mga balaod nga akon iginsugo ha iyo yana nga adlaw, basi mabuhi, magdamo, ngan magtag-iya kamo han tuna nga iginsaad han GINOO ha iyo kaapoy-apoyan.

²Hinumdomi an pagpangulo ha iyo han GINOO nga iyo Dyos dida hini nga maiha nga pagtalabok niyo han kamingawan hini nga naglabay nga 40 ka tuig, nga nagpadara hiya hin mga kakurian hin pagsari ha iyo, basi hibaroan niya an karuyag niyo pagbuhaton, ngan kon magsusugot ba kamo han iya mga sugo.

³Ginpagutoman kamo niya ngan gintagan kamo niya hin mana nga iyo kakaonon, nga waray pa gud katilawi niyo ngan han iyo kaapoy-apoyan. Ginbuhat ini niya hin pagtutdo ha iyo nga kinahanglan an tawo diri ikada ha pagkaon an iya pagtapod basi mabuhi hiya, kundi ha ngatanan nga iginyayakan han GINOO.

⁴Sulod hini nga 40 ka tuig waray madumog an iyo mga panapton ngan waray manhubag an iyo mga tiil.

⁵Hinumdomi niyo nga nasaway ngan nakastigo ha iyo an GINOO nga iyo Dyos sugad hin usa nga amay nga nagtatadong han iya mga anak.

⁶Sanglit pagbuhata niyo sumala han iginsugo ha iyo han GINOO: pag-ukoy kamo hin kinabuhi nga subay han iya mga balaod, ngan pagtahora niyo hiya.

⁷Dadad-on kamo han GINOO nga iyo Dyos ngadto hin matambok nga tuna—usa nga tuna nga may-ada mga salog ngan mga burabod, ngan hin mga sapa ha ilarom han tuna nga nag-aawas ngadto han mga kahamub-an ngan kapungtoran;

⁸usa nga tuna nga hura hin trigo ug sebada, mga ubas, mga igos, mga granada, mga olibo, ug dugos.

⁹Diri gud kamo gugutomon o kukulangon hin pagkaon didto. May-ada puthaw an mga bato ngan ha mga bukid makakagmina kamo hin bronse.

¹⁰Magkakamay-ada kamo han ngatanan nga karuyag niyo kaonon, ngan kinahanglan magpasalamat kamo ha GINOO nga iyo Dyos tungod han matambok nga tuna nga iya iginhatag ha iyo.

¹¹“Talinguhaa nga diri gud niyo hingalimtan an GINOO nga iyo Dyos; ayaw kamo pagpasibaya hin pagsugot han iya mga sugo nga ihahatag ko ha iyo yana nga adlaw.

¹²Kon mahura na kamo hin pagkaon, ngan makatindog na kamo hin mag-upay nga mga balay nga iyo pag-uokyan,

¹³ngan kon magdamo na an iyo mga baka ngan mga karnero, an iyo salapi ug bulawan, ngan an iba pa nga iyo gintatag-iya,

¹⁴talinguhaa gud nga diri kamo magmapinahitas-on ngan mahingalimot han GINOO nga iyo Dyos nga nagtalwas ha iyo tikang ha Ehipto diin mga oripon anay kamo.

¹⁵Ginpangulohan kamo niya hin pagtalabok hito nga namamarapara ngan makaharadlok nga kamingawan nga lukop hin maglara nga mga halas ngan mga bungad. Bangkil ngan mamara adto nga tuna kundi tungod ha iyo ginpaawas niya in tubig tikang hin bato nga bantilis.

¹⁶Didto ha kamingawan gintagan kamo niya hin mana nga pagkaon nga waray pa gud katilawi han iyo kaapoy-apoyan. Ginpadad-an kamo hin mga kakurian hin pagsari ha iyo, basi ha kataposan makagbendisyon hiya ha iyo hin mag-upay nga mga butang.

¹⁷Sanglit ayaw kamo paghunahuna nga nagriko kamo pinaagi han iyo kalugaringon nga gahom ug kusog.

¹⁸Hinumdomi nga an GINOO nga iyo Dyos amo an nahatag ha iyo hin gahom basi madamo an iyo bahandi ug manggad. Ginbuhat ini niya kay matinumanon pa hiya ngada yana nga adlaw han ginkasabotan nga iya ginhimo ha iyo kaapoy-apoyan.

¹⁹Ayaw gud kamo hingalimot han GINOO nga iyo Dyos o hin pagsingba ngan pag-alagad hin iba nga kadiyosan. Kon pagbuhaton niyo ini, ginpapahimatngon ko kamo yana nga adlaw nga mapupuo gud kamo.

²⁰Kon diri kamo magsugot han GINOO, mapupuo kamo sugad hadton mga nasod nga iya pupuohon samtang masulong kamo.