Read Waray Samarenyo Meaning Based 1 Mga Taga-Corinto 13 Bible Online

1 Mga Taga-Corinto 13 - Waray Samarenyo Meaning Based bible

1 Mga Taga-Corinto 13

¹Kon makagyakan ako han mga pinulongan han mga tawo ngan bisan pa han mga anghel, kundi kon waray ko gugma, sugad la ako hin maaringasa nga talutang o hin matagingting nga lingganay.

²Ngan kon maangkon ko an katakos hin pagwali; ngan kon maangkon ko pa an ngatanan nga hibaro, ngan matugkad ko an ngatanan nga mga tinago; ngan kon maangkon ko pa an bug-os nga pagtoo nga makakapabalhin han kabukiran—kundi kon waray ko gugma, waray ako kapulsanan.

³Bisan kon uboson ko paghatag an ngatanan ko nga hiagi, ngan bisan itubyan ko pa an akon lawas basi sunogon[14]—kundi kon waray ko gugma, waray ito mahihimo nga kaupayan para ha akon.

⁴Mapailobon ngan maloloy-on an gugma; diri maabugho o mapahitas-on o parayawan an gugma;

⁵maupay an pamatasan ngan diri halot o diri aringit an gugma; diri nagtitipig hin mga pagdumot an gugma;

⁶diri nalilipay han karat-an an gugma, kundi nalilipay han kamatuoran.

⁷An gugma mainantoson: matinuohon, malinaomon, ngan mapailobon.

⁸Waray kataposan an gugma. An mga pagwali nga madasigon lumalabay la; an mga pagyakan hin lain nga mga pinulongan matatapos; an hibaro mahahanaw.

⁹Kay diri bug-os an mga hatag ha aton nga hibaro ngan pagwali hin madasigon;

¹⁰kundi kon umabot na adton hingpit, mapapara na an diri hingpit.

¹¹Han bata pa ako, binatabata an akon pagyakan, pagbati, ngan paghunahuna; yana nga dako na ako, waray ko na kinahanglan han binatabata nga mga panggawi.

¹²Sugad la hin madaparap nga lambong ha salaming an aton nakikita yana. Ha orhe nga adlaw igkakaatubang na gud kita ha iya. Diri hingpit an nahibabaroan ko yana; unina mahihingpit na ito, sugad ka hingpit han kanan Dyos pagkilala ha akon.

¹³Ito yana nagpapabilin ini nga tulo: pagtoo, paglaom, ug paghigugma; ngan an gidadakoi hini nga tulo amo an paghigugma.