Read Waray Samarenyo Meaning Based 1 Mga Taga-Tesalonica 5 Bible Online

1 Mga Taga-Tesalonica 5 - Waray Samarenyo Meaning Based bible

1 Mga Taga-Tesalonica 5

¹Kabugtoan, waray na kinahanglan nga magsurat pa ako ha iyo mahitungod han mga takna ngan mga panahon, kon san-o mahinanabo ini nga mga butang.

²Kay maaram gud kamo ngahaw nga maabot an Adlaw han Ginoo sugad hin pag-abot hin kawatan ha kagab-ihon.

³Samtang nasiring an mga tawo, “Malinaw na an ngatanan ngan waray na kataragman,” tigda la nga maabot ha ira an pagkapukan! Diri hira makakalikay; kay sugad ini han kamasakit nga naabot hin babaye nga tipag-aranak.

⁴Kundi, kabugtoan, diri na kamo aada ha kasisidman, sanglit diri na kamo hikakalitan hito nga Adlaw nga maabot sugad hin kawatan.

⁵Kamo ngatanan nga mga tawo nga sakop han kapawa, ngan sakop han adlaw; diri kita sakop han kagab-ihon o han kasisidman.

⁶Sanglit kinahanglan diri kita mangaturog sugad han iba; kundi kinahanglan mag-agma kita ngan magmalinaw an panhunahuna.

⁷Batasan han mga tawo an pagkaturog ngan paghubog ha gab-i.

⁸Kundi kinahanglan magmalinaw an aton panhunahuna kay mga sakop man kita han adlaw. Kinahanglan isul-ot naton an pagtoo ngan paghigugma nga tabon han aton dughan, ngan an aton paglaom han katalwasan nga helmet ha aton ulo.

⁹Waray kita pilia han Dyos basi mag-antos han iya kapungot, kundi basi angkonon naton an katalwasan pinaagi han aton Ginoo Jesu-Cristo,

¹⁰nga nagpakamatay para ha aton, basi mag-ukoy kita upod ha iya, buhi o patay kita ha pagbalik niya.

¹¹Tungod hini nga hinungdan, pagdinasigay ngan pagbinuligay kamo sugad gud han iyo binubuhat yana.

¹²Kabugtoan, nahangyo kami ha iyo nga tahoron niyo hin kaangayan adton mga nagbubuhat dida ha iyo, hira nga ginpile han Ginoo pagmando ngan pagtutdo ha iyo.

¹³Timangnoa niyo hira upod an gidadakoi nga pagtahod ngan paghigugma, tungod han buruhaton nga ira gintutuman. Magmalinawon unta an tagsatagsa ha iyo.

¹⁴Nag-aaghat kami ha iyo, kabugtoan: sagdoni an mga hubya, dasiga an mga awdanon, buligi an mga magluya, ngan ipakita ha ngatanan an iyo kamailobon.

¹⁵Ayaw niyo bulsa hin maraot an nagbubuhat hin maraot, kundi tinguhaa niyo nga an pagbuhat hin maupay hiagoman han tagsa tagsa ngan ha ngatanan nga mga tawo.

¹⁶Dayuday pagmalipayon kamo,

¹⁷pag-ampo ha ngatanan nga panahon,

¹⁸pagpasalamat kamo han bisan ano nga nadangat ha iyo. Amo ini an karuyag han Dyos ha iyo, han iyo kinabuhi ha pag-alagad kan Cristo Jesus.

¹⁹Ayaw niyo pagpugngi an Espiritu Santo.

²⁰Ayaw niyo pagtamaya an dyosnon nga mga mensahe.

²¹Sarihi an ngatanan nga mga butang: tipigi an maupay

²²ngan likayi an ngatanan nga karat-an.

²³An Dyos nga nahatag ha aton hin kamurayaw, magsantos unta ha iyo ngan bantayan an iyo bug-os nga pagkatawo—an iyo espiritu, kalag, ug lawas, nga mawaray dum-it ngada han pag-abot han aton Ginoo Jesu-Cristo.

²⁴Bubuhaton ito niya nga nagtatawag ha iyo, kay matinumanon hiya.

²⁵Kabugtoan, ig-ampo liwat kami niyo.

²⁶Ipangumosta kami han ngatanan nga kabugtoan hin minagburugto nga harok.

²⁷Nag-aaghat ako ha iyo, ha pagburut-an han Ginoo, nga basahon niyo ini nga surat ha ngatanan nga mga magtinuohon.

²⁸An grasya han aton Ginoo Jesu-Cristo maada unta ha iyo.