Read Waray Samarenyo Meaning Based Josue 11 Bible Online

Josue 11 - Waray Samarenyo Meaning Based bible

Josue 11

¹Han kasumati kan Jabin, an hadi han Asor, hiunong han mga pagdarag-an han mga Israelita, nagpadara hiya hin pulong ngadto kan Joab, an hadi ha Madon, ngadto han mga hadi ha Semeron ug Acsaf,

²ngan ngadto han kahadian han mga sagkahon nga tuna ha amihanan nga dapit, han Kahamub-an Jordan ha timogan nga dapit han lanaw han Galilea, han mga kapatagan ngan han baybayon harani han Dor.

³Nagpadara liwat hiya hin pulong ngadto han mga Canaanhon didto ha pataboktabok han Jordan, ngadto han mga Amoreohanon, mga Hiteohanon, mga Pereseohanon, ngan mga Jebuseohanon didto han sagkahon nga katunaan, sugad man ngadto han mga Hibeohanon nga nag-uokoy ha ubos han Bukid Hermon didto han tuna han Mispa.

⁴Pinmakadto ini ngatanan dara an ngatanan nira nga kasondalohan—kasondalohan nga sugad hin kadamo han kabadsan ha baybayon. Damo liwat an ira dara nga mga kabayo ug karuwahe.

⁵Nagkaurosa ini ngatanan nga kahadian ug nagtitirok hira ngan magkampo didto ha may Sapa Merom hin pakig-away han Israel.

⁶Nagsiring kan Josue an GINOO, “Ayaw kahadlok ha ira. Buwas, ha sugad hini nga takna, uuboson ko na hira pamataya para han Israel. Bigtingi niyo an ira mga kabayo ngan sunoga niyo an ira mga karuwahe.”

⁷Sanglit kinmalit hin pagsulong ha ira didto han Sapa Merom hi Josue ug an iya mga tawo.

⁸Iginhatag han GINOO ha mga Israelita an pagdarag-an kontra ha ira; ginsulong hira han mga Israelita ug ginbukod hira tubtob ha may amihanan nga dapit han Masirapotnaim ug Sidon ngan tubtob ha may sinirangan han kahamub-an han Mispa. Nagpadayon an away tubtob nga waray nahisalin nga buhi han mga kaaway.

⁹Gibuhat ha ira ni Josue sugad han sugo ha iya han GINOO: pinanigtingan niya an ira mga kabayo ngan ginsunog niya an ira mga karuwahe.

¹⁰Niyan, binmalik hi Josue, iya nakuha an Asor ngan iya ginpatay an hadi. (Hadto nga panahon an Asor amo an labi ka makusog nga nasod hito ngatanan nga ginhadian.)

¹¹Pinamatay nira didto an ngatanan nga mga tawo; waray may nasalin nga buhi ngan ginsunog pa nira an syudad.

¹²Gin-agaw ni Josue an ngatanan nga mga syudad ug an ira mga hadi, pinamatay an ngatanan nga mga tawo hini nga mga syudad sugad han sugo ha iya ni Moises, an surugoon han GINOO.

¹³Kundi waray sunoga han mga Israelita an mga syudad nga gintindog ha mga pungtod labot han Asor nga ginsunog gud ni Josue.

¹⁴Ginkuha han mga tawo han Israel an ngatanan nga mga mahal nga butang ug mga kahayopan hini nga mga syudad ngan ginhipos nira para ha ira ngahaw. Kundi pinamatay nira an ngatanan nga mga tawo ngan waray gud nahisalin nga buhi.

¹⁵Ginhatag han GINOO an iya mga sugo ngadto kan Moises, ihinatag liwat ini ni Moises ngadto kan Josue ngan gintuman ini ni Josue. Ginbuhat niya an ngatanan nga ginsugo han GINOO kan Moises.

¹⁶Naagaw ni Josue an ngatanan nga katunaan—an mga sagkahon nga tuna ug an kapatagan, tipakadto ha amihanan ug ha timogan, an ngatanan nga tuna han Gosen ngan an banika nga katunaan tipakadto ha timogan han Gosen, sugad man an Kahamub-an Jordan.

¹⁷Ini nga katunaan natikang han bukid Halac ha timogan, harani han Edumea tubtob ha Baalgad ha may amihanan, didto han Kahamub-an Libano ha may timogan han Bukid Hermon. Naiha an pakig-away ni Josue kontra han kahadian hini nga katunaan kundi iya ini ngatanan nakuha ngan iya hira ngatanan pinamatay.

¹⁹Usa gud la nga syudad an nakigsabot hin kalinaw han mga tawo han Israel. Amo ini an syudad han Gabaon diin nag-ukoy in mga Hibeohanon. An ngatanan nga iba ubos nakuha pinaagi hin pag-awayan.

²⁰Gin-aghat hira han GINOO hin pakig-away kontra han mga Israelita basi hira mapuo ngatanan ngan mamatay hira hin waray kalooy. Amo ini an sugo han GINOO kan Moises.

²¹Hini nga panahon ginsulong ni Josue ug iya ginpuo an tulin hin mga higante nga ginngaranan nga Anakim nga nag-ukoy didto hin sagkahon nga tuna—didto ha Hebron, Dabir, Anab, ug didto han ngatanan nga sagkahon nga tuna han Juda ug Israel. Ini ngatanan ginpuo ni Josue upod an ira mga syudad.

²²Waray bisan usa han mga Anakim in nahisalin didto ha tuna han Israel; may-ada pipira nga nahibilin didto ha Gaza, Gat, ug Asdod.

²³Ginbihag ni Josue an bug-os nga katunaan sugad han sugo han GINOO kan Moises. Ihinatag ini ni Josue ngadto han mga Israelita nga ira na kalugaringon ngan ginbahinbahin ini para han tagsa nga tribo. Ngan pinmahuway hin pakig-away an mga tawo.