Read Waray Samarenyo Meaning Based Josue 12 Bible Online

Josue 12 - Waray Samarenyo Meaning Based bible

Josue 12

¹Nakuha ug gin-ukyan na han mga tawo han Israel an tuna ha sinirangan han Jordan, tikang ha Kahamub-an Arnon ngadto ha Kahamub-an Jordan tubtob ha may amihanan han Bukid Hermon. Duha nga hadi an ira nabihag.

²Usa hini amo hi Sihon, an hadi han mga Amoreohanon nga nag-ukoy didto ha Hesebon. Sakop han iya ginhadian an katunga han Galaad: tikang ha Aroer (ha ligid han Kahamub-an Arnon) ngan tikang han syudad ha[6] butnga hini nga kahamub-an, tubtob han Salog Jaboc, ha pag-ultan han Amon;

³sakop hini an Kahamub-an Jordan tikang ha Lanaw Galilea, ha may timogan tipakadto ha Betsimot (sinirangan han Dagat nga Patay) ngan padayon ngadto ha ubos han Bukid Pisga.

⁴Ira liwat nabihag hi Og nga hadi han Basan, nga usa han kataposan han mga Repaim; naghadi hiya tikang ha Astarot ug Edrei.

⁵Sakop han iya ginhadian an Bukid Hermon, Saleca, ug an bug-os nga Basan tubtob ngadto han mga pag-ultan han Gesuri ug Macati sugad man an katunga han Galaad, tubtob ngadto han katunaan ni hadi Sihon han Hesebon.

⁶Nadaog ini nga duha nga mga hadi nira Moises ug han mga tawo han Israel. Ihinatag ni Moises an ira tuna ngadto han mga tribo nira Ruben, Gad, ngan katunga han tribo ni Manases nga maira na katunaan.

⁷Ginbihag ni Josue ug han mga tawo han Israel an ngatanan nga mga hadi didto han katunaan ha may katundan han Jordan, tikang ha Baalgad didto ha kahamub-an han Libano ngadto han Bukid Halac didto ha may timogan harani han Edumea. Ginbahinbahin ini nga tuna hi Josue ha mga tribo ngan ihinatag niya ha ira nga maira na ha kadayunan.

⁸Nahiuupod hini an sagkahon nga tuna, an kapatagan ha may katundan, an Kahamub-an Jordan ug an iya kapatagan, an mga bakilid ha sinirangan ug an mga banika nga tuna ha timogan. Ini nga tuna amo an gin-ukyan han mga Hiteohanon, mga Amoreohanon, mga Canaanhon, mga Periseohanon, mga Hibeohanon, ngan mga Jebuseohanon.

⁹Nadaog han mga tawo han Israel an mga hadi hini nga mga syudad: Jerico, Ai (harani han Betel),

¹⁰Jerusalem, Hebron,

¹¹Jarmut, Laquis,

¹²Eglon, Gezer,

¹³Dabir, Gader,

¹⁴Herma, Arad,

¹⁵Libna, Adulam,

¹⁶Maceda, Betel,

¹⁷Tapua, Heper,

¹⁸Apec, Lasaron,

¹⁹Madon, Asor,

²⁰Simeron, Acsaf,

²¹Tenac, Megido,

²²Cades, Jacanan (ha Carmelo),

²³Dor (ha may baybayon), Goim (didto ha Galilea[7])

²⁴ug Tirza—ngatanan 31 nga kahadian.