Read Waray Samarenyo Meaning Based Josue 14 Bible Online

Josue 14 - Waray Samarenyo Meaning Based bible

Josue 14

¹Inin masunod amo an sumat hiunong han pagbahin han tuna han Canaan ha katundan han Jordan para han mga tawo han Israel. Ginbahinbahin ini ngadto han mga tawo nira Eleazar, an padi, ni Josue, an anak ni Nun, ug han mga punoan han mga panimalay han mga tribo han Israel.

²Sumala han sugo han GINOO kan Moises, an mga katunaan han siyam ug tunga nga mga tribo ha katundan han Jordan iginhatag ini pinaagi hin ripa.[8]

³Daan na ginggahin ni Moises an tuna ha sinirangan han Jordan ngadto han duha ug tunga nga mga tribo. (An mga sumurunod ni Jose ginduha nga tribo: Manases ug Efraim.) Kundi waray ni Moises gahini hin tuna an mga Levita; lugod, ihinatag ha ira in mga syudad nga ira uokyan, upod in mga uma para han ira kabakahan ug mga panon hin karnero.

⁵Ginbahin han mga tawo ha Israel an tuna sumala han sugo han GINOO kan Moises.

⁶Usa ka adlaw may-ada mga tawo tikang han tribo ni Juda nga kinmadto kan Josue didto ha Gilgal. Usa ha ira, hi Caleb, anak ni Jefone nga Kenizitanhon, sinmiring ha iya, “Maaram ka kon ano an ginsiring han GINOO didto ha Cades Barnea kan Moises, an tawo han Dyos mahitungod ha imo ug ha akon.

⁷Kwarenta an akon panuigon han pagsugoa ha akon ni Moises, an surugoon han GINOO, tikang ha Cades Barnea hin pag-inaw hini nga tuna. Ginsumatan ko hiya bahin han akon hinsayoran didto.

⁸Kundi an mga tawo nga inmupod ha akon amo an naghadlok han aton mga tawo. Kundi nagtuman ako hin pagsugot han GINOO, an akon Dyos.

⁹Tungod kay gintuman ko ini, nagsaad hi Moises ha akon nga an akon mga anak ug ako waray ruhaduha makarawat nga amon malon han tuna nga akon ginlaktan.

¹⁰Kundi kitaa, 45 ka tuig na tikang ini igyakan han GINOO kan Moises. Amo adto nga panahon han pagbaktas ha kamingawan han Israel ug an GINOO, sugad han iya ginsaad, amo in naghatag ha akon hin kinabuhi tubtob yana. Kitaa ako! Otsentay singko na inin akon panuigon ug

¹¹makusog la ako gihapon sugad hadto han pagsugoa ha akon ni Moises. Makusog pa ako para hin pakig-away kon bisan ano nga butang.

¹²Ngan yana, ihatag gad ha akon an sagkahon nga tuna nga iginsaad ha akon han GINOO hadto nga adlaw han pagsumat ha iyo nakon ug han akon mga tawo. Nagsumat kami ha iyo nga nakadto ha mga kinuta nga syudad in mga higante nga ginngaranan nga Anakim. Bangin an GINOO umupod ha akon ug akon hira tabogon sugad han siring han GINOO.”

¹³Ginbendisyonan ni Josue hi Caleb, anak ni Jefone, ngan iginhatag ha iya nga iya malon an syudad han Hebron.

¹⁴Gintatag-iya la gihapon an Hebron han mga tulin ni Caleb, anak ni Jefone nga Kenizitanhon, tungod kay matinumanon gud hiya hin pagsugot han GINOO, an Dyos han Israel.

¹⁵Hadto anay, ginngaranan nga Arba an Hebron. (Hi Arba amo an labi ka gamhanan han mga Anakim.) May-ada na kalinaw yana didto hito nga dapit han tuna.