Read Waray Samarenyo Meaning Based Josue 17 Bible Online

Josue 17 - Waray Samarenyo Meaning Based bible

Josue 17

¹Usa ka bahin han katunaan ha katundan han Jordan ihinatag ngadto hin mga panimalay nga tulin ni Manases, an magurang nga anak ni Jose. Hi Makir nga amay ni Galaad amo an gimamagurangi nga anak ni Manases ngan usa hiya nga sondalo, sanglit ihinatag ha iya an Galaad ug Basan, ha sinirangan han Jordan.

²An katunaan ha katundan han Jordan ihinatag ha iba nga mga panimalay ni Manases: hira Abieser, Helec, Asriel, Siquem, Heper ug Semida. Amo ini an mga sumurunod nga kalalaken-an ni Manases, an anak ni Jose, ngan mga puno hira hin panimalay.

³Hi Salfaad, anak ni Heper nga anak ni Galaad nga anak ni Maquir nga anak ni Manases waray kalalaken-an nga anak, kundi ubos la kababayen-an. Amo ini hira Maala, Noa, Hegla, Melca ug Tersa.

⁴Pinmakadto hira kan Eleasar, an padi, ngan kan Josue, an anak ni Nun, ngan ngadto han mga puno, ngan sinmiring hira, “Nagsugo an GINOO kan Moises nga tagan kami, sugad man an amon mga kauropdan nga kalalaken-an hin bahin han tuna nga amon malon.” Sanglit, sugad han sugo han GINOO, tinagan hira hin tuna upod an ira kalalaken-an nga kauropdan.

⁵Sanglit kinmarawat hi Manases hin napulo ka bahin nga dugang han iginhatag kan Galaad ug Basan ha may sinirangan nga dapit han Jordan,

⁶tungod kay natagan hin tuna an iya mga sumurunod nga kababayen-an sugad man an kalalaken-an. An tuna han Galaad ihinatag ngadto han iba nga sumurunod ni Manases.

⁷An katunaan ni Manases natikang ha Aser ngadto ha Macmetat, ha sinirangan han Siquem. An pag-ultan nagpapadayon ngadto ha timogan ngan nahiuupod hini dinhe an mga tawo han Tapua.

⁸An tuna nga nalibot han Tapua hi Manases an nakakatag-iya kundi an bungto han Tapua, ha may pag-ultan, gintatag-iya han mga sumurunod ni Efraim.

⁹An pag-ultan nagtitipalawod ngadto ha sapa han Cana. An mga syudad ha timogan han sapa gintatag-iya ni Efraim, bisan kon nasasakob hira han katunaan ni Manases. An pag-ultan han Manases nagpapadayon ngadto ha amihanan nga dapit han sapa ngan natatapos didto ha Dagat Mediteraneo.

¹⁰An kan Efraim tipakadto ha timogan, ug an kan Manases tipakadto ha amihanan ug an Dagat Mediteraneo amo an ira pag-ultan ha katundan. An Aser tipakadto ha amihan-katundan ug an Isacar ha amihan-sinirangan.

¹¹Ha sakob han katunaan ni Isacar ug Aser, gintatag-iya ni Manases an Betsan ug Jeblaam upod an mga bungto nga harani hini, sugad man an Dor (an nakadto ha baybayon),[10] an Endor, Tenac, Megido ug an ira harani nga mga bungto.

¹²An mga tawo han Manases waray makahimo hin pagpaiwas han mga tawo nga nag-ukoy didto hini nga mga syudad, sanglit nagpadayon an mga Canaanhon hin pag-ukoy didto.

¹³Bisan han pagtikakusog na han mga Israelita, waray nira paiwasa an ngatanan nga mga Canaanhon, kundi ira ini hira gin-oripon.

¹⁴An mga sumurunod ni Jose sinmiring kan Josue, “Kay ano nga usa man la ka bahin an iginhatag nimo ha amon han katunaan nga amon malon? Damo kami hin duro kay ginbendisyonan kami han GINOO.”

¹⁵Binmaton hi Josue, “Kay damo na gud kamo ngan haligutay na para ha iyo an sagkahon nga tuna han Efraim, pakadto kamo ha mga kagurangan ngan paghawan kamo didto han tuna han mga Periseohanon ug han mga Refaim.”

¹⁶Binmaton hira, “An sagkahon nga katunaan diri makakasadang ha amon kundi an mga Canaanhon didto ha kapatagan may-ada mga karuwahe nga puthaw, adton nag-uokoy didto ha Betsan ug han iya mga harani nga mga bungto ngan adton nag-uokoy didto han Kahamub-an Jezrael.”

¹⁷Sinmiring hi Josue ha mga tribo ni Efraim ug Manases ha katundan, “Tinuod nga damo na gud kamo ngan gamhanan na kamo, sanglit diri usa la ka bahin an iyo.

¹⁸An sagkahon nga katunaan pagtatag-iyahon niyo. Bisan kon kagurangan ini, iyo ini paghahawanan ngan magtatag-iya kamo hini tikang ha usa ngadto ha luyo nga kataposan. Paiwasa niyo an mga Canaanhon bisan kon may-ada nira mga karuwahe nga puthaw ngan mga magkusog nga tawo.”