Read Waray Samarenyo Meaning Based Josue 18 Bible Online

Josue 18 - Waray Samarenyo Meaning Based bible

Josue 18

¹Katapos nira pakaagaw han tuna, an bug-os nga katilingban han Israel nagtitirok didto ha Silo ngan nagtindog han Tulda han GINOO.

²May-ada pa pito nga mga tribo han mga tawo han Israel nga waray pa katagi han ira malon.

³Sanglit sinmiring hi Josue ha mga tawo, “Tubtob san-o an iyo paghulat san-o kamo sumulod ngan magtag-iya han tuna nga iginhatag ha iyo han GINOO, an Dyos han iyo mga ginikanan?

⁴Tagi ako hin tolo ka tawo ha tagsa nga tribo. Papagsudoyon ko hira han bug-os nga katunaan hin pag-usisa han tuna nga karuyag nira maangkon. Ngan mabalik hira ngadi ha akon.

⁵An tuna pagbabahinbahinon hin pito ka bahin; magpapabilin an Juda didto han katunaan ha timogan ug hi Jose, didto ha amihanan.

⁶Isurat niyo an mga pag-ultan han pito ka bahin nga tuna ngan dad-a ini niyo ngadi ha akon. Kahuman magriripa[11] ako basi hisabotan an kaburot-on sa Dyos hiunong ha iyo.

⁷Kundi an mga Levita diri makarawat hin bahin han tuna sugad ha iyo tungod kay an ira malon amo an pag-alagad hin pagkapadi han GINOO. An mga tribo ni Gad, Ruben, ug ni Manases ha sinirangan natagan na han ira malon han tuna ha sinirangan han Jordan nga iginhatag ha ira ni Moises, an surugoon han GINOO.”

⁸Nagkalakat an mga tawo hin panginano han katunaan kahuman tugona hira ni Moises: “Sudoya niyo an bug-os nga tuna ngan isurat niyo an mga pag-ultan hini, ngan balik kamo ngadi ha akon. Ngan dinhe ha Silo magriripa ako basi hisabotan ko an kaburut-on han GINOO hiunong ha iyo.”

⁹Nagsudoy an mga tawo han bug-os nga tuna ngan ira ginsurat an pagbahinbahin nira han tuna hin pito ka bahin ngan naglista liwat hira han mga bungto. Ngan binmalik hira ngadto kan Josue didto ha kampo ha Silo.

¹⁰Nagripa hi Josue basi hisabotan niya an kaburot-on han GINOO hiunong ha ira ngan gintagan han iya malon nga tuna an tagsa han nasasalin nga tribo han Israel.

¹¹An tuna nga gintatag-iya han mga panimalay han tribo ni Benjamin amo an syahan nga malon nga iginhatag. Ini nga ira tuna nakada ha butnga han mga tribo ni Juda ug Jose.

¹²An pag-ultan ha amihanan natikang ha Jordan ngan nasagka han bakilid ha amihanan han Jerico ngan nagtipakatundan latas han sagkahon nga tuna tubtob han kamingawan han Betaben.

¹³Nagpadayon ini nga pag-ultan ngadto han bakilid ha timogan nga dapit han Luz (ginngaranan liwat nga Betel), ngan nagtilugsong ngadto ha Atarot Adar, didto han timogan nga dapit han bukid han Ubos nga Betoron.

¹⁴An pag-ultan linmiko ha timogan tikang ha katundan nga dapit hini nga bukid ngan nagpadayon ngadto ha Cariatbaal (o Cariatiarim) nga gintatag-iya han tribo ni Juda. Amo ini an pag-ultan ha katundan.

¹⁵An pag-ultan ha timogan natikang ha utlanan han Cariatiarim ngan natipakadto[12] han mga burabod han Neptoa.

¹⁶Kahuman nalugsong ngadto ha ubos han bukid nga natangbo han Kahamub-an Hinom, didto ha amihanan nga kataposan han Kahamub-an Refaim. Ngan nagtipatimogan latas han Kahamub-an Hinom, ha timogan han tagaytay han mga Jebuseohanon tipakadto ha Enrogel.

¹⁷Kahuman naliko ini tipaamihanan ngadto ha Ensemes ngan padayon ngadto ha Gelilot, atbang han Aragian Adomim. Linmugsong an pag-ultan ngadto han Bato ni Bohan (anak ni Ruben hi Bohan)

¹⁸ngan inmagi tipaamihanan han tagaytay nga natangbo han Kahamub-an Jordan. Katapos linmugsong ini ngadto han kahamub-an,

¹⁹nga nag-agi ha amihanan han tagaytay han Bethogla, ngan natapos didto han surok ha amihanan han Dagat nga Patay, diin naawas ngadto an Salog Jordan. Amo ini an pag-ultan ha timogan nga dapit.

²⁰An Jordan amo an pag-ultan ha sinirangan. Amo ini an mga pag-ultan han katunaan nga kinarawat nga ira malon han mga panimalay han tribo ni Benjamin.

²¹An mga syudad nga gintatag-iya han mga panimalay han tribo ni Benjamin amo an Jerico, Bethogla, Emecases,

²²Betaraba, Samaraim, Betel,

²³Avim, Para, Opra,

²⁴Sefaramomi, Opni ug Geba: 12 nga mga syudad upod an mga bungto nga harani ha ira.

²⁵Nakadto liwat an Gabaon, Rama, Berot,

²⁶Mispa, Capara, Amosa,

²⁷Requem, Jarepel, Tarela,

²⁸Sela, Elep, Jebus (o Jerusalem), Gabaa ug Cariatiarim: 14 nga mga syudad upod an mga bungto nga harani nira. Amo ini an tuna nga nakarawat nga ira malon han mga panimalay han tribo ni Benjamin.