Read Waray Samarenyo Meaning Based Josue 21 Bible Online

Josue 21 - Waray Samarenyo Meaning Based bible

Josue 21

¹Pinmakadto an mga puno han mga panimalay han mga Levita ngadto kan Eleazar, an padi, kan Josue, an anak ni Nun, ug han mga puno han mga panimalay han ngatanan nga mga tribo han Israel.

²Didto ha Silo, ha tuna han Canaan, nagsiring ini hira ha ira, “Nagsugo an GINOO pinaagi kan Moises nga ihahatag ha amon in mga syudad nga amon pag-uokyan sugad man hin mga panibsiban nga mga uma nga harani han mga syudad para han amon kahayopan.”

³Sugad han sugo han GINOO an mga tawo han Israel naghatag han mga Levita hin mga syudad ug mga uma nga panibsiban tikang han ira mga katunaan.

⁴An syahan nga tagan hin mga syudad amo an mga panimalay han Levita nga banay ni Cohat. An mga panimalay nga tulin ni Aaron, an padi, tinagan hin 13 nga mga syudad tikang han katunaan han Juda, Simeon, ug Benjamin.

⁵An iban han banay ni Cohat tinagan hin 10 nga mga syudad tikang han katunaan han Efraim, Dan, ug Manases ha katundan.

⁶Tinagan an banay ni Gerson hin 13 nga mga syudad tikang han katunaan han Isacar, Aser, Neftali, ug Manases ha sinirangan.

⁷Tinagan an banay ni Merari hin 12 nga mga syudad tikang han katunaan han Ruben, Gad, ug Zabulon.

⁸Pinaagi hin ripa,[15] iginhatag ini nga mga syudad ug an ira mga uma nga panibsiban ngadto han mga Levita sumala han sugo han GINOO kan Moises.

⁹Amo ini an ngaran han mga syudad tikang han katunaan han Juda ug Simeon nga ihinatag

¹⁰han mga tulin ni Aaron nga tikang han banay ni Cohat nga tulin ni Levi. Amo ini an syahan nga ipinanhatag.

¹¹Ihinatag ha ira an syudad han Arba (tatay ni Anak ini hi Arba), yana ginngaranan nga Hebron, didto han sagkahon nga tuna han Juda, upod an mga panibsiban nga uma nga sapit hini.

¹²Kundi, an mga uma han syudad ug an iya mga bungto daan na ihinatag kan Caleb, anak ni Jefone, nga iya malon.

¹³Labot han Hebron (usa han mga syudad nga darangpan), inin masunod ihinatag han mga tulin ni Aaron, an padi: Libna,

¹⁴Jeter, Estemo,

¹⁵Holon, Dabir,

¹⁶Ain, Jeta, ug Betsemes, upod an ira mga uma nga panibsiban: siyam nga mga syudad tikang han mga tribo ni Juda ug Simeon.

¹⁷Tikang han katunaan ni Benjamin, tinagan hira hin upat nga mga syudad: Gabaon, Geba,

¹⁸Anatot, ug Almon upod an ira mga uma nga panibsiban.

¹⁹Dies y nuebe ngatanan nga mga syudad upod an mga uma nga panibsiban an nahatag ngadto han kapadian nga tulin ni Aaron.

²⁰An iba nga mga panimalay han Levita nga banay ni Cohat tinagan han mga syudad tikang han katunaan han Efraim.

²¹Tinagan hira hin upat nga mga syudad: Siquem ug an iya mga uma nga panibsiban didto han sagkahon nga tuna han Efraim (usa han mga syudad nga darangpan), Gezer,

²²Kibsaim ug an Betoron upod an ira mga uma nga panibsiban.

²³Tikang han katunaan han Dan tinagan hira hin upat nga mga syudad: Elteco, Gabaon,

²⁴an Aiyalon ug an Gatremon, upod an mga uma nga panibsiban.

²⁵Tikang han katunaan han Manases ha katundan tinagan hira hin duha nga mga syudad: Tanac ug Gatremon upod an ira mga uma nga panibsiban.

²⁶Ini nga mga panimalay han banay ni Cohat kinmarawat hin napulo nga mga syudad upod an ira mga uma nga panibsiban.

²⁷May lain liwat nga hugpo hin mga Levita, an banay ni Gerson, kinmarawat tikang han katunaan han Manases ha sinirangan hin duha nga mga syudad: Golan didto ha Basan (usa han mga syudad nga darangpan) ug Bosra upod an ira mga uma nga panibsiban.

²⁸Tikang han katunaan han Isacar, kinmarawat hira hin upat nga mga syudad: Kision ug Daberat,

²⁹Jaramut ug Enganim upod an ira mga panibsiban nga uma.

³⁰Tikang han katunaan han Aser, kinmarawat hira hin upat nga mga syudad: Masal, Abdon,

³¹Helcat, ug Rohob upod an ira mga panibsiban nga uma.

³²Tikang han katunaan han Neftali, kinmarawat hira hin tulo nga mga syudad: Cades ha Galilea, upod an iya mga uma nga panibsiban (usa han mga syudad nga darangpan), Hamotdor, ug Cartan upod an mga panibsiban nga uma.

³³An magkalainlain nga panimalay han banay ni Gerson kinmarawat hin 13 nga mga syudad upod an ira mga panibsiban nga uma.

³⁴An nahibilin nga mga Levita, an banay ni Merari, kinmarawat tikang han katunaan han Zabulon hin upat nga mga syudad: Jecnan, Karta,

³⁵Damna ug Naalol upod an ira mga panibsiban nga uma.

³⁶Tikang han katunaan han Ruben, kinmarawat hira hin upat nga mga syudad: Boser, Jasin,

³⁷Cademot ug Mefaat upod an ira mga panibsiban nga uma.

³⁸Tikang han tribo ni Gad, kinmarawat hira hin upat nga mga syudad: Ramot ha Galaad, upod an iya mga panibsiban nga uma (usa han mga syudad nga darangpan), Manaim,

³⁹Hesebon ug an Jaser upod an ira panibsiban nga mga uma.

⁴⁰An banay ni Merari natagan hin 12 nga mga syudad.

⁴¹Tikang han katunaan nga gintag-iya han Israel, 48 nga mga syudad lakip an ira mga panibsiban nga uma an iginhatag nga malon ha mga Levita.

⁴³Ngan ginhatag han GINOO kan Israel an ngatanan nga katunaan nga iya ginsaad ha ira mga ginikanan. Han pakatag-iya nira hini, didto hira hini nga tuna pag-ukoy.

⁴⁴Tinagan hira han GINOO hin kalinaw ha bug-os nga katunaan, sugad nga iginsaad ini niya ha ira mga ginikanan. Waray bisan usa han ira mga kaaway nga nakadaog ha ira, tungod kay ihinatag ha ira han GINOO an pagdarag-an kontra han ira mga kaaway.

⁴⁵Gintuman han GINOO an ngatanan nga mga saad nga iya ginhimo ha mga tawo han Israel.