Read Waray Samarenyo Meaning Based Josue 22 Bible Online

Josue 22 - Waray Samarenyo Meaning Based bible

Josue 22

¹Gintawag ni Josue an ngatanan nga mga tawo han mga tribo ni Ruben, Gad, ug Manases ha sinirangan.

²Ginsiring niya hira, “Gintuman niyo an ngatanan nga ginsugo ha iyo ni Moises, an surugoon han GINOO, ngan nagsugot kamo han akon mga sugo.

³Ha ngatanan hini nga panahon waray kamo magpasibaya han iyo igkasi mga Israelita. Naghirot kamo ha pagtuman niyo han mga sugo han GINOO nga iyo Dyos.

⁴Niyan, sugad han iya saad, ihinatag han GINOO nga iyo Dyos, in kalinaw ha iyo mga igkasi Israelita. Sanglit uli kamo ngadto han tuna nga iyo malon, an tuna ha sinirangan nga dapit han Jordan nga ihinatag ha iyo ni Moises, an surugoon han GINOO.

⁵Talingohaa nga tumanon niyo an balaod nga ginsugo ha iyo: higugmaa niyo an GINOO nga iyo Dyos, tumana an iya kaburut-on, sugta an iya mga sugo, pagmatinumanon kamo ha iya, ngan pag-alagad ha iya ha bug-os niyo nga kasingkasing ug kalag.”

⁶Pinauli hira ni Josue upod an iya bendisyon ngan ini nga mga pulong, “Mauli kamo yana nga riko hin duro; damo in mga kahayopan, salapi, bulawan, bronse, puthaw ug damo nga mga panapton. Bahini an iyo igkasi mga taga tribo han iyo naagaw ha iyo mga kaaway.” Ngan nanguli hira. Ihinatag ni Moises in tuna ha sinirangan han Jordan ngadto han katunga han tribo ni Manases, ngan ngadto han ikaduha nga katunga ihinatag an tuna ha katundan han Jordan ngan han iba nga mga tribo.

⁹Sanglit nanguli an mga tawo han mga tribo ni Ruben, Gad, ug Manases ha sinirangan. Binayaan nira an iba nga mga tawo han Israel didto ha Silo ha tuna han Canaan ngan nagkalakat hira tipakadto han ira kalugaringon nga tuna, an tuna han Galaad nga ira kinuha nga malon sugad han sugo han GINOO pinaagi kan Moises.

¹⁰Han pag-abot han mga tribo nira Ruben, Gad, ug Manases ha sinirangan didto ha Gelilot, nga bahin pa han katundan[16] nga dapit han Jordan, nagtindog hira hin dako ug maanyag nga altar ha ligid han salog.

¹¹An iba nga mga tawo han Israel ginsumatan, “Pamati kamo! An mga tawo han mga tribo ni Ruben, Gad, ug Manases ha sinirangan nagtindog hin altar didto ha Gelilot nganhi ha aton dapit han Jordan.”

¹²Han pakabati han mga tawo han Israel hiunong hini, nagtitirok an bug-os nga katilingban didto ha Silo hin pakig-away kontra han mga tribo ha sinirangan.

¹³Ngan an mga tawo han Israel nagpadara kan Pinehas, anak ni Eleazar, an padi, ngadto han mga tawo han mga tribo ni Ruben, Gad, ug Manases ha sinirangan didto han tuna han Galaad.

¹⁴Inmupod kan Pinehas in napulo nga dumagko nga mga tawo, an tagsa ha ira tikang hin usa han mga tribo ha katundan ug puno hin panimalay hin usa han mga banay.

¹⁵Kinmadto hira ha tuna han Galaad, ngadto han mga tawo ni Ruben, Gad, ug Manases ha sinirangan

¹⁶ngan ha ngaran han katilingban han GINOO nagsiring ini hira ha ira, “Kay ano nga ginbuhat man niyo ini nga karat-an kontra han Dyos han Israel? Sinmupil kamo han GINOO pinaagi hin pagtindog hini nga altar para ha iyo. Diri na kamo nagsusunod ha iya.

¹⁷Nahanunumdom ba kamo han aton sala didto ha Peor nga ginkastigo han GINOO an iya kalugaringon nga mga tawo pinaagi hin paghatag hin makamaratay nga matapon nga sakit? Nag-iinantos pa kita tungod hini. Diri ba igo na adto nga sala?

¹⁸Isasalikway ba niyo yana hiya? Kon sumupil kamo yana han GINOO, magdudumot hiya buwas han ngatanan nga mga tawo han Israel.

¹⁹Niyan kon an iyo tuna diri angay pagsingbahan, tabok kamo ngadto ha tuna han GINOO diin aadto an iya Tulda. Pagtag-iya kamo hin tuna dinhe ha amon. Kundi ayaw pagsupil han GINOO o nga himoon kami niyo nga masupilon han GINOO pinaagi hin pagtindog hin altar nga dugang han altar han GINOO nga aton Dyos.

²⁰Panumdom nga hi Acan, anak ni Sera, waray magtuman han sugo hiunong hin mga butang nga ginhukman na nga pagbubungkagon; ginsirotan an bug-os nga katilingban han Israel. Diri la hi Acan an namatay tungod han iya sala.”

²¹An mga tawo han mga tribo ni Ruben, Gad, ug Manases ha sinirangan nagbaton han mga puno han mga panimalay han mga tribo ha katundan:

²²“An makagarahum amo an Dyos! Hiya an GINOO. An makagarahum amo an Dyos! Hiya amo an GINOO! Maaram hiya kay ano nga ginbuhat ini namon ngan amon karuyag nga mahibaro liwat kamo. Kon sinmupil kami ngan waray kami pagtoo han GINOO, ayaw na itugot nga mabuhi pa kami!

²³Kon waray kami magsugot han GINOO ngan nagtindog kami hin altar para hin pagtubod hin mga unong ug para hin mga halad nga pagkaon o mga halad hin pagdait, pagsirotan unta kami han GINOO.

²⁴Diri! Ginbuhat namon ini kay nahadlok kami nga ha tiarabot nga panahon an mga tulin niyo masiring ha mga tulin namon, ‘Ano man an iyo labot han GINOO, an Dyos han Israel?

²⁵Ginhimo niya an Jordan nga pag-ultan han tuna namon ug niyo nga mga tawo ni Ruben ug ni Gad. Waray niyo labot han GINOO.’ Niyan an iyo nga sumurunod bangin magpaukoy han amon sumurunod hin pagsingba han GINOO.

²⁶Sanglit nagtindog kami hin altar, diri para hin pagtubod hin mga unong ug iba pa nga mga halad,

²⁷kundi lugod mahimo nga usa nga tigaman para han amon ug han iyo mga tawo ngan para han mga sumurunod ha aton nga kami tinuod nagsisingba han GINOO ha atubangan han iya sagrado nga Tulda dara an amon mga halad nga pagtutuboron ug an iba nga mga halad hin pagdait ug mga unong. Ginbuhat ini basi an iyo mga sumurunod diri makasiring nga an amon ginbuhat waray labot han GINOO.

²⁸Amon ito nahunahunaan nga kon pananglitan mahitabo ini, makakasiring an amon sumurunod, ‘Kitaa! An amon mga ginikanan naghimo hin altar sugad han altar han GINOO. Diri para hin pagtubod hin mga halad ug unong kundi usa nga tigaman para han amon ug han iyo mga tawo.’

²⁹Ha pagkatinuod diri kami masupil han GINOO o diri na mag-alagad ha iya yana pinaagi hin pagtindog hin altar nga pagtutuboran hin mga halad, bubutangan hin mga halad hin pagkaon o mga unong. Diri kami magtitindog hin lain nga altar labot han altar han GINOO nga aton Dyos, nga natindog ha atubangan han Tulda han GINOO.”

³⁰Hi Pinehas, an padi, ug an napulo nga mga dumagko nga tawo han katilingban nga upod niya, an mga puno han mga panimalay han mga tribo ha katundan nakabati han ginsiring han mga tawo han mga tribo ni Ruben, Gad, ug Manases ha sinirangan ngan tinmunga hira.

³¹Nagsiring ha ira hi Pinehas, an anak ni Eleazar nga Padi, “Yana maaram na kami nga kaupod naton an GINOO. Waray kamo pagsupil ha iya, sanglit ginggawas niyo an mga tawo han Israel han sirot han GINOO.”

³²Ngan binayaan ni Pinehas ug han mga dumagko nga pagkatawo an mga tawo ni Ruben ug Gad didto ha tuna han Galaad ngan inmoli hira ngadto ha Canaan, ngadto han mga tawo han Israel ngan ira hira ginsumatan.

³³Tinmunga an mga Israelita ngan nagdayaw hira han Dyos. Waray na hira maghinabi hin pakig-away para paggun-ob han tuna nga inuokyan han mga tawo ni Ruben ug Gad.

³⁴Sinmiring an mga tawo ni Ruben ug Gad, “Ini nga altar amo an saksi ha aton ngatanan nga Dyos an GINOO.” Sanglit ira ginngaranan ini nga “Saksi.”