Read Waray Samarenyo Meaning Based Josue 3 Bible Online

Josue 3 - Waray Samarenyo Meaning Based bible

Josue 3

¹Han pagkabuwas han aga binmuhat hin temprano hira Josue ug an ngatanan nga mga tawo han Israel, binmaya hira han kampo ha Acacia ngan pinmakadto hira ha Jordan diin nagkampo hira samtang naghuhulat hira hin pagtabok.

²Kahuman han ikatolo ka adlaw, an mga pangulo nagsudoy han kampo

³ug ginsiring nira an mga tawo, “Kon kumita kamo han mga padi nga nagpapas-an han Kahon han Ginsaaran han GINOO nga iyo Dyos, pamutos kamo ngan sunod ha ira.

⁴Syahan pa la ini niyo nga paghinganhi, sanglit ipapakita nira ha iyo an dalan nga iyo pag-aagian. Kundi ayaw kamo paghirani han Kahon han Ginsaaran; paorhe kamo hin mga usa ka kilometro.”

⁵Ginsiring ni Josue an mga tawo, “Paglinis kamo ha iyo kalugaringon kay buwas an GINOO magbubuhat hin mga milagro dida ha iyo.”

⁶Ngan ginsiring niya an mga kapadian nga dad-on nira an Kahon han Ginsaaran ug mag-una hira han mga tawo. Gintuman ini nira sugad han siring niya ha ira.

⁷Nagsiring kan Josue an GINOO, “An akon bubuhaton yana nga adlaw makakaaghat han ngatanan nga mga tawo hin pagpasidungog ha imo nga usa nga dako nga pagkatawo ngan makakasabot hira nga kaupod ako nimo sugad nga hadto kaupod ako ni Moises.

⁸Sumati an mga kapadian nga nagpapas-an han Kahon han Ginsaaran nga ha pag-abot nira ha salog, kinahanglan lumugsong hira ha tubig ngan umukoy hira nga natukdaw hirani han pangpang.”

⁹Ngan nagsiring hi Josue han mga tawo, “Pakadi kamo ngan pamati kamo kon ano an ighihimangraw ha iyo han GINOO nga iyo Dyos.

¹⁰Ha iyo pagsulong, bubukoron gud niya an mga Canaanhon, mga Hiteohanon, mga Hibeohanon, mga Pereseohanon, mga Girgaseohanon, mga Amoreohanon, ngan an mga Jebuseohanon. Hibabaroan niyo nga aada ha iyo an buhi nga Dyos

¹¹kon an Kahon han Ginsaaran han GINOO han ngatanan nga tuna tumalabok han Jordan una ha iyo.

¹²Yana pagpili kamo hin dose nga mga kalalaken-an, usa ha kada tribo han Israel.

¹³Kon an mga kapadian nga nagpapas-an han Kahon han Ginsaaran han GINOO han ngatanan nga tuna lumugsong na ngadto ha tubig, maukoy hin pag-awas an Jordan ug an tubig nga tipailawod magpupundok ha usa nga dapit.”

¹⁴Panahon adto hin kat-ani ngan binmaha an salog. Han pagbaya han kampo han mga tawo hin pagtabok han Jordan, nag-una ha ira an mga kapadian nga nagdadara han Kahon han Ginsaaran. Ha paglugsong gud la ha salog han kapadian,

¹⁶inmukoy dayon hin pag-awas an tubig ngan nagpundok didto ha may iraya, didto ha Adam, an syudad nga sapit la han Zaretan. Naukoy gud an pag-awas tipailawod ngadto han Patay nga Dagat ngan nakahimo an mga tawo hin pagtalabok harani ha Jerico.

¹⁷Samtang an mga tawo natalabok dida hin mamara nga tuna, tinmukdaw an kapadian nga nagpapas-an han Kahon han Ginsaaran dida hin mamara nga tuna ha butnga han Jordan tubtob han pakatabok han ngatanan nga mga tawo.