Read Waray Samarenyo Meaning Based Josue 5 Bible Online

Josue 5 - Waray Samarenyo Meaning Based bible

Josue 5

¹Hinbatian han ngatanan nga kahadian nga Amoreohanon ha katundan han Jordan ug han ngatanan nga kahadian nga Canaanhon ha ligid han Dagat Mediteraneo nga ginpahubas han GINOO an salog han Jordan tubtob nga an mga tawo han Israel nakatabok ngatanan. Nagkahadlok ini hira ngan nagmatalaw na hira tungod han mga Israelita.

²Ginsiring han GINOO hi Josue, “Paghimo hin mga kutsilyo tikang hin bato bantilis ngan toria an mga Israelita.”

³Gintuman ini ni Josue sugad han sugo ha iya han GINOO, ngan iya gintori an mga Israelita didto hin dapit nga ginngaranan Torian nga Pungtod.

⁴Han pagbaya han Ehipto han mga tawo han Israel tinori na an ngatanan nga kalalaken-an. Kundi ha sakob hin 40 ka tuig nga pag-ukoy nira ha kamingawan, waray gintori bisan ma usa han kalalaken-an nga puya. Labot pa, katapos hini nga panahon an ngatanan nga kalalaken-an nga igo na magsondalo han paggawas nira han Ehipto ubos na pagkamatay kay waray hira magsugot han GINOO. Sugad han iya ginpanaad, waray hira tugoti nga kumita hira han hura ngan maglangbo nga tuna nga iginsaad niya han ira mga ginikanan.

⁷An mga anak nga kalalaken-an hini nga mga tawo waray gud may natori ug amo ini nga bag-o nga tulin an ginpanori ni Josue.

⁸Kahuman han pagtoria han kalalaken-an, pinmabilin ini hira ha kampo tubtob han kaupay han katorian.

⁹Nagsiring an GINOO kan Josue, “Yana ginkuha ko ha iyo an makaarawod nga kahimtang hin pagkaoripon didto ha Ehipto.” Sanglit ginngaranan hin Gilgal[2] an dapit ngada yana.

¹⁰Samtang an mga Israelita nagkampo didto ha Gilgal dida han kapatagan harani han Jerico, nagsaurog hira han Paglabay dida han gab-i han ika-14 nga adlaw han bulan.

¹¹An pagkabuwas nga adlaw amo an ira syahan nga pagkaon hin mga abot ha Canaan: sinanlag nga trigo ug tinapay nga waray patubo.

¹²Inmukoy na an mana hin kahulog tikang ha kahitas-an ug nawarayan na hini an mga Israelita. Tikang hadto an ira mga pagkaon tikang na han mga abot ha Canaan.

¹³Han haraniay na hi Josue ha Jerico, nakakita hiya hin tawo nga tinmukdaw ha iya atubangan nga nakakadara hin espada. Gindaop ini ni Josue ngan pinmakiana hiya, “Usa ka ba han amon mga sondalo kon kaaway ka ba namon?”

¹⁴“Waray hito nga duha,” binmaton an tawo. “Aanhi ako sugad nga kapitan han mga kasondalohan han GINOO.” Hinmapa hi Josue ha tuna hin pagsingba ha iya ngan sinmiring hiya, “Ako an imo surugoon. Ano an imo karuyag nga akon pagbuhaton?”

¹⁵Ug an kapitan han kasondalohan han GINOO nagsiring ha iya, “Hukasa an imo mga sandalyas, kay natukdaw ka dida hin baraan nga tuna.” Ngan gintuman ini ni Josue sugad han siring ha iya.