Read Waray Samarenyo Meaning Based Josue 9 Bible Online

Josue 9 - Waray Samarenyo Meaning Based bible

Josue 9

¹An mga pagdarag-an han Israel nahisamwak ha ngatanan nga kahadian ha may katundan han Jordan—didto ha mga sagkahon nga mga tuna, ha ubos han mga pungtod, ug ha kabaybayonan han Dagat Mediteraneo ngadto pa gud ha may amihanan nga dapit han Libano; amo ini hira an mga hadi han mga Hiteohanon, mga Amoreohanon, mga Canaanhon, mga Periseohanon, mga Hibeohanon ngan mga Jebuseohanon.

²Nagtitirok hira ngatanan ngan gin-urosa nira an ira mga kasondalohan hin paggubat kan Josue ug han mga Israelita.

³Kundi an mga tawo ha Gabaon nga mga Hibeohanon nakabati han mga ginbuhat ni Josue didto ha Jerico ug Ai,

⁴ngan nagsarabot hira hin paglipat ha iya. Kinmadto hira hin pagkuha hin mga pagkaon ngan ira ginkarga ha mga asno an mga dumog nga sako ug tinangkopan nga mga anit nga surudlan hin bino.

⁵Nagbado hira hin dunot nga mga panapton ug mga upos na nga mga sandalyas nga ira na la gin-ayad. An ira gindara nga mga tinapay bahaw ug alamagon na.

⁶Kinmadto hira han kampo ha Gilgal ngan ginsiring nira hi Josue ug an mga Israelita, “Tikang kami ha higrayo nga tuna. Karuyag namon nga makigsabot kamo hin kalinaw ha amon.”

⁷Kundi sinmiring an mga Israelita, “Kay ano nga makigsabot man kami ha iyo? Bangin hiraniay la an iyo gin-uokyan.”

⁸Sinmiring hira kan Josue, “Andam kami hin pag-alagad ha imo.” Pinmakiana hi Josue ha ira, “Hira hino kamo? Tikang kamo diin?”

⁹Ginsumatan nira hini nga susumaton: “Tikang kami hin hirayo nga tuna ug kinmanhi kami kay nakabati man kami mahitungod han GINOO nga iyo Dyos. Nakabati kami mahitungod han ngatanan nga iya ginbuhat didto ha Ehipto

¹⁰ug han iya ginbuhat han mga Amoreohanon nga kahadian ha sinirangan han Jordan: hira hadi Sihon han Hesebon ug hadi Og han Basan, nga nag-ukoy didto ha Astarot.

¹¹An amon mga pangulo ug an ngatanan nga mga tawo nga nag-uokoy dinhe hinin amon tuna nagsugo ha amon hin pagkuha hin pagkaon ug andamon para han paglakat ngan hin pakigkita ha iyo, basi makasabot kamo nga andam kami hin pag-alagad ug pakigsabot ha iyo.

¹²Kitaa an amon tinapay. Han paggikan namon tipakanhi mapaso pa ini, kundi yana, bahaw ngan gin-alamag na.

¹³Pagsudli namon hini nga mga surudlan hin bino nga anit, mga bag-o pa ini, kundi kitaa, yana, mga burit na. An amon mga bado ug sandalyas mga daan na tungod han kaharayo han amon ginbaktasan.”

¹⁴Kinmarawat an mga tawo han Israel han pagkaon nga tikang ha ira, kundi waray hira pakiana han GINOO hiunong hini.

¹⁵Nakigsabot hin pakigsangkay hi Josue han mga tawo han Gabaon ngan gintugotan hira nga mabuhi. An mga pangulo han bungto han Israel nagsumpa nga pagtutumanon nira an ira ginkasabotan.

¹⁶Tulo ka adlaw tikang han kahimo han ginsabotan, nahibaro an mga Israelita nga ini nga mga tawo nag-uokoy haraniay la ha ira.

¹⁷Sanglit pinmakadto an mga tawo han Israel ug katapos hin tulo ka adlaw inmabot hira ha mga syudad nga ira gin-uokyan: Gabaon, Cafira, Berot, ug Cariatiarim.

¹⁸Kundi waray makahimo an mga Israelita hin pagpatay ha ira, kay an ira mga pangulo nagsumpa man ha ira ha ngaran han GINOO, an Dyos han Israel. An ngatanan nga mga tawo nagngurutob han ira mga pangulo hiunong hini,

¹⁹kundi binmaton hira, “Nagsumpa kami ha ira ha ngaran han GINOO nga Dyos han Israel. Yana diri kita makakaghuka ha ira.

²⁰Kinahanglan tugotan ta hira nga mabuhi tungod han aton saad; kon diri, sisirotan kita han Dyos.

²¹Ayaw naton hira pagpataya, kundi mangangahoy ug mangangalog hira para ha aton.” Amo ini an iginsagdon han mga pangulo.

²²Ginpatawag ni Josue an mga tawo ha Gabaon ngan iya hira ginpakianhan, “Kay ano nga ginlipat man niyo kami ug nagsumat kamo nga tikang kamo hin hirayo nga dapit, kundi aanhi man la ngay-an kamo pag-uokoy?

²³Tungod kay ginbuhat niyo ini, sisirotan kamo han Dyos. An iyo mga tawo dayuday mauoripon nga mangangahoy ug mag-aalog hira para han balay han akon Dyos.”

²⁴Binmaton hira, “Amon ini ginbuhat, tungod kay nahibaro kami nga tinuod gud nga nagsugo an GINOO nga iyo Dyos kan Moises, an iya surugoon, hin paghatag ha iyo hini nga tuna ug pagpatay han mga tawo nga nag-uokoy dinhe samtang nga nasulong kamo. Amon ini ginbuhat tungod kay nahadlok kami ha iyo; bangin kami pamatayon niyo.

²⁵Yana aada kami ha iyo pagbuot; buhata ha amon an iyo nahuhunahunaan nga angay niyo buhaton.”

²⁶Ug amo ini an ginbuhat ni Josue: ginpanalipdan hira ug waray niya tugoti an mga tawo ha Israel nga pamatayon hira.

²⁷Kundi ginhimo niya hira nga mga oripon hin pangahoy ug pag-alog para han mga tawo han Israel ug para han altar han GINOO. Nagpadayon hira pagtuman hini nga buhat tubtob ngada yana didto han dapit nga ginpili han GINOO nga hiya pagsisingbahon.