Read Waray Samarenyo Meaning Based Hebreo 3 Bible Online

Hebreo 3 - Waray Samarenyo Meaning Based bible

Hebreo 3

¹Kabugtoan ko kan Cristo nga gintinawag liwat han Dyos, pagdumdoma niyo hi Jesus nga ginsugo han Dyos nga magin Labaw nga Padi han pagtoo nga aton gintug-an.

²Matinumanon hiya han Dyos nga nagpili ha iya hin pagbuhat han iya sugo, sugad nga nagtuman hi Moises han iya katungdanan dida han balay han Dyos.

³An tawo nga nagtitindog hin balay nakarawat hin darudako nga dungog kay han balay ngahaw. Ha amo nga paagi, angay hin darudako pa nga dungog hi Jesus kay kan Moises.

⁴Matuod, hinimo hin tawo an kada balay—kundi an Dyos an naghimo han ngatanan nga mga butang.

⁵Matinumanon hi Moises ha iya pagkasurugoon dida ha bug-os nga balay han Dyos, ngan naghinabi hiya bahin han mga butang nga igsisiring han Dyos ha tiarabot nga panahon.

⁶Kundi matinumanon hi Cristo ha iya pagkaanak nga ginhimo nga tinaporan han balay han Dyos. Kita amo an iya balay, kon ipadayon naton an aton kadasig ngan pagtapod han mga butang nga aton ginlalaoman.

⁷Sanglit sumala han siring han Espiritu Santo: “Kon hibatian niyo an tingog han Dyos yana nga adlaw,

⁸ayaw patig-aha an iyo kasingkasing sugad han pagsupil han Dyos hadto han iyo kaapoy-apoyan, sugad han pagsarihi nira ha iya hadto nga adlaw didto ha kamingawan.

⁹Ira ako ginsulay ngan ginsarihan didto, nasiring an Dyos, bisan kon hinkit-an nira an akon ginbuhat sulod hin kwarenta ka tuig.

¹⁰Tungod hini, nasina ako hadto nga mga tawo ngan nagsiring ako, ‘Dayuday hira nagsasayop han ira ginhuhunahuna, ngan waray nira hibaroi an akon mga paagi.’

¹¹Napungot ngan nanumpa ako: ‘Diri gud hira makakasulod ngan makakapahuway upod ha akon!’”

¹²Kabugtoan ko, paghirot kamo nga waray usa ha iyo tungod hin kasingkasing nga oraora karaot ngan diri matinuohon, matalikod han buhi nga Dyos.

¹³Lugod, basi waray ha iyo kalimbongan han sala ngan magmatig-a an kasingkasing, kinahanglan magbinuligay kamo ha adlaw-adlaw, samtang an pulong “Yana nga adlaw” ha kasuratan iginpapahinungod pa para ha aton.

¹⁴Kay mga kabulig kita ngatanan ni Cristo, kon ipadayon ta tubtob ha kataposan an marig-on nga pagtapod nga aton naangkon ha tinikangan.

¹⁵Amo ini an siring han kasuratan: “Kon hibatian niyo an tingog han Dyos yana nga adlaw, ayaw na patig-aha an iyo kasingkasing sugad han iyo kaapoy-apoyan han pagsupil nira han Dyos.”

¹⁶Hin-o an binmati han tingog han Dyos, ngan sinmupil ha iya? An ngatanan nga mga tawo nga gin-unhan ni Moises hin paggawas ha Egipto.

¹⁷Hin-o an napungtan han Dyos sulod hin kwarenta ka tuig? An mga tawo nga nagpakasala, nga nagkamatay didto ha kamingawan.

¹⁸Han pagsumpa han Dyos, “Diri gud hira makakasulod ngan makakapahuway upod ha akon”—hin-o an iya hinnanabihan? Adton mga sinmupil han Dyos.

¹⁹Sanglit aton nakikita nga waray hira makasulod, kay waray man hira tumoo.