Read Waray Samarenyo Meaning Based Santiago 2 Bible Online

Santiago 2 - Waray Samarenyo Meaning Based bible

Santiago 2

¹Kabugtoan ko, kay mga magtinuohon man kamo han aton Ginoo Jesu-Cristo, an harangdon nga Ginoo, kinahanglan upayon niyo an pagtagad han mga tawo.

²Pananglit sumulod ha iyo katirok in usa nga riko nga nakakasingsing hin bulawan ngan nakakasul-ot hin mahal nga mga panapton, ngan may sumulod liwat nga usa nga kablas nga gisigisi an iya panapton,

³kon tagdon niyo hin mauroupay an tawo nga diliwan ngan sumiring kamo ha iya, “Didi lingkod hadin maupay nga lingkoran,” kundi sidngon niyo an kablas, “Tindog la didto,” o “Lingkod na la ha salog hirani ha akon tiilan,”

⁴dida hito nakakasala na kamo hin ka may-ada niyo pinili nga mga tawo ngan hin paghukom nga pinasikad hin magraot nga mga panuyo.

⁵Pamatii niyo, hinigugma ko nga kabugtoan! Ginpili han Dyos an kablas nga mga tawo hini nga kalibutan, basi mariko hira hin pagtoo ngan makaangkon han Ginhadian nga iginsaad niya hadton mga nahigugma ha iya.

⁶Kundi gintatamay la niyo an mga kablas! Hin-o man an nagpapaantos ha iyo ngan nagdadanas ha iyo ngadto ha atubangan han mga maghurukom? An mga riko!

⁷Amo hira an nagmiminanggad hito nga maupay nga ngaran nga iginhatag han Dyos ha iyo.

⁸Matadong an iyo ginbubuhat kon gintutuman niyo an balaod han Ginhadian nga aada ha kasuratan, “Higugmaon mo an imo igkasi-tawo sugad ha imo ngahaw.”

⁹Kundi kon tagdon niyo an mga tawo sumala han iyo nakita ha ira, nakakasala kamo, ngan ginhuhukman kamo han Balaod sugad nga nagtatalapas kamo hin balaod.

¹⁰An nagtatalapas hin usa nga sugo han Balaod, nagtatalapas han ngatanan.

¹¹Kay an nagsiring, “Diri ka manlibog,” nagsiring liwat, “Diri ka magpatay.” Bisan kon diri ka manlibog, nakatalapas ka han balaod kon magpatay ka.

¹²Pagyakan ngan panggawi kamo sugad hin mga tawo nga paghuhukman han balaod nga nagtatalwas han mga tawo.

¹³Kay diri malolooy an Dyos kon maghukom na hiya han tawo nga waray pagkalooy. Kundi dinadaog gud han kalooy an paghukom.

¹⁴Kabugtoan ko, ano man in pulos para hin usa nga nasiring, “May-ada ko pagtoo,” kundi diri man ini hinkikit-an dida han iya mga buhat? Makakatalwas ba ha iya ito nga pagtoo?

¹⁵Pananglit may-ada kabugtoan nga nagkikinahanglan hin mga panapton ngan kulang hin pagkaon.

¹⁶Ano man in pulos kon magsiring la kamo ha ira, “Paglipayon unta kamo han Dyos! Pagbado ngan kaon kamo hin maupay!”—kon diri niyo tagan han mga kinahanglanon han ira kinabuhi?

¹⁷Amo man ini an pagtoo: kon pagtoo la, ngan waray padis nga buhat, patay ito nga pagtoo.

¹⁸Kundi may-ada masiring, “May pagtoo in usa ka tawo ngan may-ada mga buhat an iba.” Amo ini an baton ko, “Pakitaa ako kon uunanhon hin usa ka tawo pakaangkon hin pagtoo nga waray mga buhat. Pakikitaon ko ikaw han akon pagtoo pinaagi han akon mga buhat.”

¹⁹Natoo ka ba nga may uusa la nga Dyos? Maupay! Natoo man liwat hini an mga yawa ngan nangungurog hira hin kahadlok.

²⁰Lurong ka! Karuyag ba nimo hikit-an nga waray kapulsanan[1] an pagtoo nga diri inupdan hin mga buhat?

²¹Gin-unan-o man pag-isip nga matadong sa Dyos hi Abraham nga aton ginikanan? Pinaagi adto han iya mga buhat han paghalaran niya ha altar kan Isaac nga iya anak.

²²Diri ka ba nakita? Nagkausa an iya pagtoo ngan an iya mga buhat; nahingpit an iya pagtoo pinaagi han iya mga buhat.

²³Ngan natuman an kasuratan nga nagsiring, “Tinmoo han Dyos hi Abraham ngan tungod han iya pagtoo, gin-isip han Dyos nga matadong hiya.” Sanglit gintawag hi Abraham nga sangkay han Dyos.

²⁴Sanglit nakikita niyo nga gin-iisip nga matadong sa Dyos an tawo pinaagi han iya ginbubuhat ngan diri tungod la han iya pagtoo.

²⁵Amo man liwat an nahinabo han maraot nga babaye nga hi Rahab. Gin-isip hiya nga matadong sa Dyos tungod han iya mga buhat, pinaagi han pagpasudla niya han mga espiya nga mga Judiyo, ngan pagbuligi niya ha ira hin pagpalagiw pinaagi hin iba nga dalan.

²⁶Sanglit, sugad nga patay an lawas kon waray espiritu; patay man an pagtoo kon waray mga buhat.