Read Waray Samarenyo Meaning Based Santiago 3 Bible Online

Santiago 3 - Waray Samarenyo Meaning Based bible

Santiago 3

¹Kabugtoan ko, diri damo ha iyo in magin magturutdo, kay maaram kamo nga kita nga mga magturutdo paghuhukman hin masigpit kay han iba.

²Agsob makasayop kita ngatanan. Hingpit an tawo nga diri nagsasayop han iya ginyayakan, ngan maaram liwat magpugong han iya kalugaringon.

³Itinataod ta an bukado ha baba hin kabayo, basi sumugot ha aton, ngan nakakahimo kita pagdara hini ngadto ha bisan diin nga dapit nga aton karuyag.

⁴O paghunahunaa daw an usa nga barko: bisan kon dako ngan ginduduso hin magkusog nga mga hangin, nawawaring an barko pinaagi hin gutiay hin duro nga timon, ngan napakadto bisan diin an karuyag han timonil.

⁵Amo man an dila: bisan kon gutiay la, nakakahimo hin pagparayaw mahitungod hin dagko nga mga butang. Hunahunaa la kon ano kahiluag nga kagurangan an nadadagkotan hin gutiay la nga kalayo!

⁶Ngan sugad hin kalayo an dila. Usa ini nga katig-oban han ngatanan nga karat-an; usa la nga bahin han aton lawas kundi nagpapasarang hin karat-an ha aton bug-os nga pagkatawo. Ginsusuritan hini an bug-os naton nga kinabuhi han kalayo nga natikang ha impyerno ngahaw.

⁷Makakahimo an tawo hin pagpaanad ngan nakagpaanad na han ngatanan nga mga binuhat—ihalas nga mga mananap ngan mga tamsi, mga hayop nga nagkakamang ha tuna ngan mga isda.

⁸Kundi waray pa gud tawo nga nakagpaanad han dila. Maraot ngan makuri kapugngan, ngan puno hin makamaratay nga hilo.

⁹Ginagamit ta an dila hin pagpasalamat han aton Ginoo ngan Amay, ngan ginagamit ta liwat pagpakaraot han aton igkasi-tawo nga ginhimo nga ladawan han Dyos.

¹⁰Naguwa ha usa la nga baba in mga pulong hin pagpasalamat ngan pagpakaraot. Kabugtoan ko, diri ini angay mahinabo!

¹¹Diri mahihimo nga matikang hin usa ngan amo la ngahaw nga burabod in matam-is ug mapait nga tubig.

¹²Kabugtoan ko, diri mabunga hin mga olibo an kahoy nga igos; diri mabunga hin mga igos an balagon nga ubas; ngan diri man makakahimo nga maawas in marasa nga tubig tikang hin mapag-ad nga burabod hin tubig.

¹³May-ada ba usa ha iyo nga may-ada kinaadman ngan hibaro? Kinahanglan hikit-an ini pinaagi han iya maupay nga kinabuhi, ngan pinaagi han iya mag-upay nga mga buhat nga gintutuman dida hin pagpaubos ngan ha kamaaram.

¹⁴Kundi kon ha imo kasingkasing maabugho, madumot, ngan halot ka, ayaw pakasala supak han kamatuoran pinaagi hin pagparayaw han imo kinaadman.

¹⁵Diri natikang ha langit ini nga kinaadman; kinalibutanon la ini, yawan-on ngan diri espirituhanon.

¹⁶Kon hain an pangabugho ngan kahalot, aadto man an kasamok ngan ngatanan nga karat-an.

¹⁷Kundi una han ngatanan, putli an kinaadman nga tikang sa Dyos: malinawon, mapuangoron, ngan makisasangkayon; puno hin pagkalooy ngan nabunga hin mag-upay nga mga buhat; waray pinalabi ngan diri malabyaw.

¹⁸Ngan an pagkamatadong amo an naaani nga bunga han mga binhe nga itinatanom han mga nagbubuhat dida hin kalinaw.