Read Waray Samarenyo Meaning Based Santiago 4 Bible Online

Santiago 4 - Waray Samarenyo Meaning Based bible

Santiago 4

¹Diin ba titikang an iyo mga aruaraway ngan mga pagkabirubingkil? Natikang ini ha iyo mga karuyagon han kahilayan nga agsob mag-inaraway ha sakob niyo.

²Karuyag niyo in mga butang, kundi diri niyo naangkon, sanglit andam kamo pagpatay; makusog an iyo pag-ungara hin mga butang, kundi diri niyo nakukuha, sanglit nagkakabirubingkil ngan nag-aaragway kamo. Diri niyo naaangkon an iyo kinaruruyag, kay diri man kamo nangangaro han Dyos.

³Ngan kon nangangaro kamo, diri kamo nakakarawat, kay maraot man an iyo katuyoanan; nangangaro kamo basi gamiton la niyo para han iyo kalugaringon nga mga kahilayan.

⁴Mga tawo nga waray pagtoo! Diri ba kamo maaram nga an pakigsangkay han kalibutan amo an pakig-away han Dyos? Magigin kaaway han Dyos an karuyag magin sangkay han kalibutan.

⁵Ayaw kamo paghunahuna nga waray la kahulogan an kasuratan nga nasiring, “An espiritu nga iginhatag ha aton han Dyos puno hin magpintas nga mga ungara.”[2]

⁶Kundi makurukusog pa an grasya nga iginhahatag han Dyos. Sumala han siring han kasuratan, “Kontra sa Dyos an mga mapahitas-on, kundi nahatag hiya hin grasya han mga mapaubsanon.”

⁷Sanglit, pagsugot kamo han Dyos. Atohi niyo an Yawa ngan mapahirayo hiya ha iyo.

⁸Pahirani kamo han Dyos, ngan mapahirani hiya ha iyo. Hugasi niyo an iyo mga kamot, kamo nga mga makasasala! Linisi niyo an iyo mga kasingkasing, kamo nga mga maglabyaw!

⁹Pagmabidoon kamo, pagnguyngoy, ngan pagtangis; saliwani niyo hin pagtangis an iyo katatawa, ngan kabidoan an iyo kalipayan!

¹⁰Pagpaubos kamo ha atubangan han Ginoo ngan pagpapahitas-on kamo niya.

¹¹Ayaw kamo maggipasusonsuson, kabugtoan ko. Kon hin-o in nasuson o naghuhukom han iya bugto nasuson liwat ngan naghuhukom han Balaod. Sanglit kon nahuhukom ka han Balaod, diri ka na nagsusugot han Balaod, kundi ikaw an naghuhukom han Balaod.

¹²An Dyos la an magbaralaod ngan maghurukom. Hiya la an nakakatalwas ngan makakapuo. Baga hin-o ka nga maghuhukom han imo igkasi-tawo?

¹³Yana pamatii ako niyo, kamo nga nasiring, “Yana o buwas makadto kami hini nga syudad, diin magpapabilin kami hin usa ka tuig, ngan magpapakabuhi kami basi makapanalapi kami.”

¹⁴Diri ngani kamo maaram kon ano an mapaabot ha iyo buwas! Sugadsugad la kamo han manipis nga burong nga nakikita hin usa ka dali, ngan nagpapapas dayon.

¹⁵Amo unta ini an angay niyo igsiring, “Kon tumugot an Ginoo, mabubuhi pa kami, ngan magbubuhat kami hini o hadto.”

¹⁶Kundi yana mapinahitas-on ngan nanhahambog kamo; sayop in sugad nga panhambog.

¹⁷Sanglit, nakakasala an tawo nga diri nagbubuhat han maupay nga iya hinbabaroan nga angay niya buhaton.