Read Waray Samarenyo Meaning Based Mga Maghurukom 10 Bible Online

Mga Maghurukom 10 - Waray Samarenyo Meaning Based bible

Mga Maghurukom 10

¹Han kamatay ni Abimelec, hi Tola nga anak ni Pua ngan apo ni Dodo amo an nagpangulo hin pagtalwas han Israel. Sakop hiya han tribo ni Isacar ngan nag-ukoy hiya didto ha Samir ha sagkahon nga nasod han Efraim.

²Pangulo hiya han Israel sulod hin 23 ka tuig. Katapos namatay hiya ngan ginlubong didto ha Samir.

³Katapos ni Tola inmabot hi Jair nga taga-Galaad. Nangulo hiya han Israel sulod hin 22 ka tuig.

⁴May-ada hiya 30 nga mga anak nga kalalaken-an nga an tagsa may-ada asno nga sarakyan. May-ada hira 30 nga mga syudad didto han tuna han Galaad, nga gintatawag pa gihapon ngada yana nga kabaryohan ni Jair.

⁵Namatay hi Jair ngan iginlubong didto ha Camon.

⁶Nakasala na liwat han GINOO an mga Israelita pinaagi hin pagsingba han mga Baal ngan han mga Astarte, sugad man han kadiyosan han Siria, han Sidon, han Moab, han Amon, ngan han Filistia. Ginsikway nira an GINOO ngan waray na hira magsingba ha iya.

⁷Sanglit nasina han mga Israelita an GINOO, ngan ginpasakop hira han mga Filisteohanon ngan han mga Amonitanhon.

⁸Sulod hin 18 ka tuig ginraogdaog nga ginpakurian nira an ngatanan nga mga Israelita nga nag-ukoy didto han Amoreohanon nga tuna ha sinirangan han Salog Jordan didto ha Galaad.

⁹Tinmabok pa ngani han Jordan an mga Amonitanhon hin pakig-away han mga tribo han Juda, Benjamin, ug Efraim. Makuri an kamutangan han Israel.

¹⁰Niyan nagsangpit han GINOO an mga Israelita ngan nagsiring, “Nakasala kami kontra ha imo kay ginsalikway ka namon nga amon Dyos ngan ginsingba namon an mga Baal.”

¹¹Ginhatag ha ira han GINOO ini nga baton: “Hadto nga panahon ginraogdaog kamo han mga Ehiptohanon, mga Amoreohanon, mga Amonitanhon, mga Filisteohanon,

¹²mga Sidonianhon, mga Amalekanhon, nga han mga Moanitanhon, ngan nagtawag kamo ha akon. Waray ko ba kamo pagtalwasa tikang ha ira?

¹³Kundi iyo ako gihapon ginbayaan ngan ginsingba niyo an iba nga kadiyosan, sanglit diri ko na kamo pagtatalwason liwat.

¹⁴Kadto ngan tawga niyo an kadiyosan nga iyo ginpili. Hira an patalwasa ha iyo kon magkukuri kamo.”

¹⁵Kundi nagsiring ha GINOO an mga tawo han Israel, “Nakasala kami. Buhata an imo karuyag, kundi talwasa gad kami yana nga adlaw.”

¹⁶Sanglit iginsikway nira an ira langyaw nga kadiyosan ngan gin-alagad nira an GINOO; ngan iginmasakit han GINOO tungod han kakurian han Israel.

¹⁷Niyan nag-andam hin pakig-away an kasondalohan nga Amonitanhon ngan nagkampo hira didto ha Galaad. Nagtitirok an mga tawo han Israel ngan nagkampo hira didto ha Mizpa ha Galaad.

¹⁸Didto naggiparupakiana an mga tawo ngan an mga pangulo han mga tribo nga Israelita, “Hin-o an mangungulo han araway kontra han mga Amonitanhon? An magpangulo ha aton, amo an magigin pangulo han ngatanan didto ha Galaad.”