Read Waray Samarenyo Meaning Based Mga Maghurukom 8 Bible Online

Mga Maghurukom 8 - Waray Samarenyo Meaning Based bible

Mga Maghurukom 8

¹Niyan nagsiring an mga tawo ni Efraim ngadto kan Gideon, “Kay ano nga waray mo kami pagtawaga han pakig-away mo han mga Madianitanhon? Kay ano hin pagsugara mo hini ha amon?” Nagngurutob hira hin duro hiunong hini.

²Kundi iya ginsiring hira, “An akon nabuhat diri gud ikakatanding han iyo ginbuhat. Bisan an gutiay la nga ginbuhat niyo nga mga tawo ni Efraim, labaw pa gud han nabuhat han bug-os ko nga banay.

³Ngani, pinaagi han gahom han Dyos ginpatay niyo an duha nga mga punoan nga Madianitanhon nga hira Oreb ngan Zeb. Ano an akon nabuhat nga ikakatanding hito?” Han pagsiring niya hini, waray na hira masina hin duro.

⁴Hini nga panahon nakaabot ngan nakatabok na han Salog Jordan hi Gideon ngan an iya tulo ka gatos nga mga tawo. Kinakapoy na hira, kundi nagpapadayon gihapon hin pagbukod han ira mga kaaway.

⁵Han pag-abot nira didto ha Socot, nagsiring hiya han mga tawo han bungto, “Tagi gad an akon mga tawo hin pira la ka bug-os nga tinapay. Kinakapoy na hira ngan ginbubukod ko hira Zeba ug Zalmuna nga mga hadi nga Madianitanhon.”

⁶Kundi nagsiring an mga pangulo han Socot, “Kay ano nga tatagan namon hin pagkaon an imo kasondalohan? Waray pa ngani nimo mabihag hira Zeba ug Zalmuna.”

⁷Sanglit nagsiring hi Gideon, “Ta hala! Kon itubyan na ha akon han GINOO hira Zeba ug Zalmuna, paghahampakon ko kamo hin mga tunok ngan mga sapinit tikang ha kamingawan!”

⁸Nagpadayon hi Gideon ngadto ha Penuel ngan naghangyo gihapon han mga tawo didto hin pagkaon, kundi iginhatag han mga tawo han Penuel in sugad nga baton han mga tawo han Socot.

⁹Sanglit nagsiring hiya ha ira, “Mabalik ako nga waray ako maano, ngan kon bumalik na ako, rurumpagon ko ini nga torre!”

¹⁰Nakadto ha Carcor hira Zeba ug Zalmuna upod an ira kasondalohan. Han ngatanan nga kasondalohan han mga tribo ha kamingawan, mga 15,000 nala an nahibilin; 120,000 nga mga sondalo an pinamatay na.

¹¹Nagpadayon hi Gideon didto han dalan ha ligid han kamingawan nga sinirangan han Noba ug Jogbeha, ngan ginpakalasan hin pagsulong an kasondalohan.

¹²Namalagiw hira Zeba ug Zalmuna nga mga hadi nga Madianitanhon, kundi iya ginbukod ngan ginbihag hira, ngan nakapalisang ini han ngatanan nira nga kasondalohan.

¹³Han nabalik na hi Gideon tikang han pag-awayan pinaagi han Agianan han Hares,

¹⁴ginbihag niya in usa nga batan-on nga lalake nga taga-Socot ngan ginpakianhan hiya nira. Iginsurat hini nga batan-on para kan Gideon an mga ngaran han 77 nga dumagko nga mga tawo han Socot.

¹⁵Niyan kinmadto hi Gideon han mga tawo han Socot ngan nagsiring, “Nahinumdom pa ba kamo han diri niyo pagbulig ha akon? Nagsiring kamo nga diri kamo makakahatag hin pagkaon han akon kinakapoy na nga kasondalohan kay waray ko pa mabihag hira Zeba ug Zalmuna. Yana iini na hira!”

¹⁶Niyan kinmuha hiya hin mga tunok ngan mga sapinit tikang ha kamingawan ngan ginggamit ini hin pagkastigo han mga pangulo han Socot.

¹⁷Iya liwat ginrumpag an torre didto ha Penuel ngan pinamatay an kalalaken-an hito nga syudad.

¹⁸Niyan ginpakianhan ni Gideon hira Zeba ug Zalmuna, “Ano gud an iyo pagkita han pinamatay niyo nga kalalaken-an didto ha Tabor?” Binmaton hira, “Supo hira ha imo—an tagsa-tagsa ha ira sugad han anak hin usa nga hadi.”

¹⁹Nagsiring hi Gideon, “Mga kabugtoan ko hira kay mga anak han akon kalugaringon nga iroy. Nagsusumpa ako nga kon waray niyo pamataya hira, diri ko unta kamo pamamatayon.”

²⁰Niyan ginsiring niya hi Jeter nga suhag niya nga lalake, “Hala, pamataya hira!” Kundi waray an bata humulbot han iya espada. Nag-alang hiya kay bata pa hiya.

²¹Niyan nagsiring hira Zeba ug Zalmuna kan Gideon, “Sigi na, ikaw ngahaw an pagpatay ha amon. Kay diri ini mahimo buhaton hin usa la nga bata.” Sanglit ginpatay hira ni Gideon ngan ginkuha an mga sabong nga nakada ha liog han ira mga kamelyo.

²²Katapos, nagsiring kan Gideon an mga Israelita, “Ikaw na an amon pangulo—ikaw ngan an imo mga tulin nga masunod ha imo. Gintalwas mo kami ha mga Madianitanhon.”

²³Binmaton hi Gideon, “Diri ako o an akon anak an iyo mga pangulo. An GINOO amo an iyo pangulo.”

²⁴Kundi nagsiring pa hiya, “Tugoti ako hin paghangyo hin usa nga butang ha iyo. Ihatag ha akon an mga ariyos nga iyo ginkuha.” (Sugad han iba nga mga tawo ha kamingawan, nagsul-ot an mga Madianitanhon hin ariyos nga bulawan.)

²⁵Binmaton an mga tawo, “Malilipay kami hin paghatag hini ha imo.” Nagbitad hira hin dugnit ngan iginbutang dida hini han kada usa an mga ariyos nga iya ginkuha.

²⁶Tinmimbang hin mga 20 ka kilo an mga ariyos nga bulawan nga nakuha ni Gideon, ngan labot la ini han mga rayandayan, mga kwentas, ngan granate nga mga panapton nga iginsul-ot han mga hadi nga Madianitanhon, ngan han mga sabong dida ha liog han ira mga kamelyo.

²⁷Naghimo hi Gideon hin diyosdiyos nga bulawan ngan iginbutang ini didto han natawhan niya nga bungto han Ofra. Binmaya han Dyos an ngatanan nga mga Israelita ngan kinmadto hira hin pagsingba han diyosdiyos. Usa ini nga pagbitik kan Gideon ngan han iya panimalay.

²⁸Sanglit ginpirde han mga Israelita an Madian ngan diri na ini hira kinahahadlokan. Nagkamay-ada kalinaw an tuna sulod hin 40 ka tuig, tubtob han kamatay ni Gideon.

²⁹Binmalik hi Gideon ngadto han iya kalugaringon nga balay ngan didto hiya nag-ukoy.

³⁰May-ada hiya 70 nga mga anak nga kalalaken-an, kay damo an iya asawa.

³¹May-ada liwat hiya babaye didto ha Sequim; nag-anak ini hiya hin lalake ngan ginngaranan niya nga Abimelec.

³²Namatay hi Gideon nga anak ni Joas ha hitaas na gud nga panuigon ngan iginlubong hiya didto han lubnganan ni Joas nga iya amay ha Ofra nga bungto han banay ni Abiezer.

³³Han kamatay na ni Gideon, waray na liwat magmatinumanon han Dyos an mga tawo han Israel ngan ginsingba nira an mga Baal. Ginhimo nira nga ira diyos hi Baal-han-Ginsabotan,

³⁴ngan waray na hira mag-alagad han GINOO nga ira Dyos nga nagtalwas ha ira ha ngatanan nira nga mga kaaway nga hirani la ha ira.

³⁵Bungalos hira han panimalay ni Gideon ngan hinngalimtan nira an ngatanan nga kaupayan nga iya nabuhat para han Israel.