Read Waray Samarenyo Meaning Based 3 Juan 1 Bible Online

3 Juan 1 - Waray Samarenyo Meaning Based bible

3 Juan 1

¹Tikang han usa nga Tigurang han singbahan— Ngadto han akon minahal nga Gayo nga hinigugma ko hin tinuod.

²Hinigugma ko nga sangkay, igin-aampo ko nga magmainuswagon ka unta han ngatanan mo nga mga butang, ngan nga magkaada ka maupay nga panlawas—sugad nga sayod ako nga maupay an imo espirituhanon nga kinabuhi.

³Nalipay gud ako han pagkaabot hin pira nga kabugtoan nga mainampoon, ngan nagsumat han imo pagkamatinumanon han kamatuoran—sugad nga dayuday ka nag-uokoy dida han kamatuoran.

⁴Waray na labaw nga nakakalipay ha akon kay hin pakabati nga an akon mga anak nag-uokoy dida han kamatuoran.

⁵Hinigugma ko nga sangkay, matinumanon ka gud dida han imo pag-alagad han imo mga igkasi Cristianos, bisan kon diri hira taga dida hito nga dapit.

⁶Iginsumat nira han singbahan didi an imo gugma. Alayon hin pagbulig ha ira nga makagpadayon hira han ira paglakaton dida hin pakalipay han Dyos.

⁷An tuyo han ira paglakaton amo an pag-alagad kan Cristo, ngan waray kumarawat hin bulig tikang han diri mga magtinuohon.

⁸Sanglit, an mga Cristianos kinahanglan bumulig hini nga mga tawo, basi makaangbit kita han ira buruhaton para han kamatuoran.

⁹Nagpadara ako hin halipot nga surat ngadto han singbahan, kundi waray pamatii an akon iginisiring ni Deotrefes nga karuyag magpangulo ha ira.

¹⁰Sanglit kon mahingada ako, igsusumat ko an ngatanan nga iya ginbuhat ngan an mga buwa nga ginbutangbutang ha akon. Kundi diri amo la ini; diri niya kinakarawat an kabugtoan kon naabot hira, ngan gindidid-an pa gud niya an karuyag kumarawat ha ira, ngan ginpapagawas hira ha singbahan.

¹¹Hinigugma ko nga sangkay, ayaw pagsubad han maraot, kundi subda an maupay. Kanan Dyos an bisan hini-o nga magbuhat hin maupay; ngan waray pa makakita han Dyos an bisan hin-o nga magbuhat hin maraot.

¹²Gindadayaw han ngatanan hi Demetrio ngan an kamatuoran nagpapamatuod hini. Ngan kami makakapatapod ha imo, ngan maaram ka nga matuod an iginsisiring namon.

¹³Damo pa an akon isurumat ha imo, kundi gabay ko diri ipaagi hin pagsurat.

¹⁴Naglalaom ako hin pakigkita dayon ha imo, ngan maghihimangraw na la kita nga duha.

¹⁵Maada unta ha imo an kamurayaw. Nangungumosta an ngatanan mo nga kasangkayan. Ipangumosta liwat kami han ngatanan naton nga kasangkayan.