Read Waray Samarenyo Meaning Based Ruth 2 Bible Online

Ruth 2 - Waray Samarenyo Meaning Based bible

Ruth 2

¹May-ada hi Naomi uropod nga ginngaranan kan Boos, usa nga riko ngan hinangad nga tawo nga sakop han panimalay ni Elimelec nga iya bana.

²Usa ka adlaw nagsiring kan Naomi hi Ruth, “Tugoti ako hin pagkadto han kaumhan basi mag-ani ako han mga nalikatan han mga mag-arani. Waray ruhaduha may-ada tawo nga matugot ha akon hin pag-ani.” Binmaton hi Naomi, “Kadto na, anak.”

³Sanglit kinmadto hi Ruth han kaumhan, nagsunod han mga mag-arani, ngan nag-ani han ira mga nalikatan. Nahinabo nga nahingadto hiya hin uma nga gintatag-iya ni Boos.

⁴Waray pag-iha inmabot hi Boos tikang ha Betlehem ngan ginsiring niya an mga mag-arani, “An GINOO maada unta ha iyo!” Binmaton hira, “Bendisyonan ka unta han GINOO!”

⁵Ginpakianhan ni Boos an iya tinaporan, “Hin-o ito nga batan-on nga babaye?”

⁶Binmaton an tawo, “Amo hiya an taga langyaw nga babaye nga upod ni Naomi hin pag-oli tikang ha Moab.

⁷Nagsarit hiya nga masunod hiya han mag-arani hin panhiligad han inani. Naghiligad hiya tikang pa han aga ngan yana pa la hiya sisirong hin pagpahuway madaliay.”

⁸Niyan nagsiring kan Ruth hi Boos, “May-ada ko ha imo igsasagdon. Ayaw na pagkadto hin iba nga uma hin pag-ani. Dinhe na la pag-ani upod han kababayen-an.

⁹Inawa hira kon diin hira pag-aani, ngan upod ha ira. Gintugon ko na an akon mga tawo nga diri ka paglabtan. Ngan kon uuhawon ka, pakadto ngan inom han tubig tikang han mga biso nga ira ginsudlan.”

¹⁰Hinmapa hi Ruth ngan nagsiring kan Boos, “Kay ano nga nanginginano ka ha akon? Kay ano nga nalolooy ka man hin usa nga taga langyaw?”

¹¹Binmaton hi Boos, “Hinbatian ko an ngatanan nga imo ginbuhat para han imo ugangan nga babaye tikang mamatay an imo bana. Sayod ako han pagbaya nimo han imo iroy ug amay ngan han imo kalugaringon nga tuna, ngan han imo pagkanhi hin pag-ukoy tampo hin mga tawo nga hadto diri nimo kinikilala.

¹²Baloson ka unta han GINOO tungod han imo ginbuhat. Maangkon mo unta in tim-os nga balos tikang han GINOO nga Dyos han Israel, nga imo dinangpan hin pagpanalipod!”

¹³Binmaton hi Ruth, “Maloloy-on ka hin duro[6] ha akon. Gindasig mo ako pinaagi han imo manamit nga mga pulong ha akon, bisan kon diri ako tupong han usa han imo mga surugoon.”

¹⁴Ha takna na han pangaon nagsiring kan Ruth hi Boos, “Kadi na, kaon hin tinapay ngan itunlob ini ha sawsawan.” Sanglit linmingkod hiya tampo han mga mag-arani, ngan dinalhan hiya ni Boos hin sinanlag nga kan-on. Kinmaon hiya ngada han iya kabusog, ngan may-ada pa nasalin han iya pagkaon.

¹⁵Han paglakat na niya basi mag-ani, gintugon ni Boos an mga mag-arani, “Papag-aniha la hiya bisan dida han binubutangan han mga upong, ngan ayaw hiya pagdid-i. Labot hito, ibani an mga upong ngan bayai an mga iniban basi niya pamuruton.”

¹⁷Sanglit nanhiligad hi Ruth ngada han pagkagab-i. Kahuman niya paggiok hini nga iya gin-ani, nakatirok hiya hin kapin hin napulo ka kilo.

¹⁸Gindara ini niya han pagbalik niya ngadto ha bungto, ngan iginhatag ini niya han iya ugangan. Iginhatag liwat niya an salin han iya ginkaon.

¹⁹Pinmakiana ha iya hi Naomi, “Diin ka pag-ani yana nga adlaw? Kanay uma an imo gin-anihan? Bendisyonan unta han Dyos an tawo nga nanginano ha imo!” Sanglit ginsumatan ni Ruth hi Naomi nga didto hiya pag-ani hin uma nga gintatag-iya hin tawo nga ginngaranan kan Boos.

²⁰Nagsiring hi Naomi, “Bendisyonan unta han GINOO hi Boos! Dayuday nagtutuman an GINOO han iya mga saad ngadto han mga buhi ug mga minatay.” Ngan nagsiring pa hiya, “Amon suok nga uropod ito nga tawo ngan usa hiya hadton may katungod hin panimangno ha amon.”

²¹Niyan nagsiring hi Ruth, “Labaw han ngatanan, ginsiring pa ako niya hin pagpadayon hin pag-ani upod han iya mga mag-arani tubtob han katubas.”

²²Nagsiring kan Ruth hi Naomi, “Tinuod, anak ko, maupay gud nga didto ka mag-ani han uma ni Boos tampo han kababayen-an. Bangin ka pag-durugasan kon didto ka mag-ani hin iba nga uma.”

²³Sanglit nag-ani hi Ruth tampo ha ira, ngan damo an natirok niya tubtob han kaani ngatanan han sebada ug trigo. Ngan nagpadayon hiya pakiglungan han iya ugangan nga babaye.