Read Waray Samarenyo Meaning Based 1 Samuel 13 Bible Online

1 Samuel 13 - Waray Samarenyo Meaning Based bible

1 Samuel 13

²[31] Nagpili hi Saul hin tulo ka yukot nga kalalaken-an, nga ginbilin niya an duha ka yukot nga kaupod niya didto ha Micmas ngan didto han sagkahon nga tuna han Betel, ngan an usa ka yukot ginpaupod niya kan Jonatan nga iya anak ngadto ha Gabaa, didto han katunaan han tribo ni Benjamin. Ginpaoli ni Saul an iba nga mga tawo.

³Ginpatay ni Jonatan an kapitan nga Filisteohanon[32] didto ha Geba, ngan hinbaroan ini han ngatanan nga mga Filisteohanon. Niyan nagpadara hi Saul hin mga surugoon basi maandam an mga Hebreo hin pagsulong pinaagi hin pagpatunog han trompeta ha bug-os nga nasod.

⁴Ginsumatan an ngatanan nga mga Israelita nga ginpatay ni Saul an kapitan nga Filisteohanon ngan nagdudumot ha ira an mga Filisteohanon. Sanglit napakadto an mga tawo hin pagtampo kan Saul didto ha Gilgal.

⁵Nagtirok an mga Filisteohanon hin pakig-away han mga Israelita; may nira 30,000 nga mga karuwahe, 6,000 nga mga dikabayo nga mga sondalo, ngan mga sondalo nga sugad kadamo han baras ha baybayon. Kinmadto hira ha Micmas ha sinirangan han Betaben, ngan nagkampo hira didto.

⁶Niyan ginsulong nira an mga Israelita, ngan makuri an kamutangan han mga Israelita kay ginlibotan hira. Nanago an iba nga mga Israelita didto hin mga lungib ngan mga buho o didto hin mga kababtoan, o hin mga luong ngan mga atabay;

⁷tinmabok an iba han salog Jordan ngadto han katunaan han Gad ug Galaad. Nakadto pa hi Saul ha Gilgal. Nangungurog hin kahadlok an mga tawo nga kaupod niya.

⁸Naghinulat hiya kan Samuel sulod hin pito ka adlaw, sumala han tugon ni Samuel ha iya, kundi waray gihapon umabot hi Samuel ngadto ha Gilgal. Nagtikang na hin pagbaya kan Saul an mga tawo,

⁹sanglit nagsiring hiya ha ira, “Dad-a niyo ngadi ha akon an mga halad nga tinubod ngan an mga halad hin pagkadait.” Naghalad hiya,

¹⁰ngan han tikahuruman na hiya, inmabot hi Samuel. Ginmawas hi Saul hin pagtapo ha iya,

¹¹kundi nagsiring hi Samuel, “Ano an imo ginbuhat?” Binmaton hi Saul, “Binayaan ako han mga tawo, ngan waray ka pa man aabot sumala han imo siring. Labot pa hito, nagkatirok na an mga Filisteohanon didto ha Micmas.

¹²Sanglit naghunahuna ako, ‘Susulongon ako han mga Filisteohanon dinhe ha Gilgal, ngan waray pa ako makalipay han GINOO.’ Sanglit nakahunahuna ako hin paghalad ha iya.”

¹³Binmaton hi Samuel, “Tinuyaw ito nga buhat. Waray mo pagtumana an iginsugo ha imo han GINOO nga imo Dyos. Kon nagsugot ka la, tinutugotan unta niya ikaw ngan an imo mga tulin hin paghadi han Israel ha kadayonan.

¹⁴Kundi yana diri magpapadayon an imo paghadi. Tungod nga sinmupak ka ha iya, magbibiling an GINOO han tawo nga iya karuyag igliwan ha imo hin paghadi han iya mga tawo.”

¹⁵Binmaya hi Samuel han Gilgal ngan nagpadayon han iya paglakat. An iba han mga tawo sinmunod kan Saul han pakigtampo niya han iya mga sondalo. Tikang ha Gilgal[33] kinmadto hira ha Gabaa, didto han katunaan ni Benjamin. Gin-usisa ni Saul an iya mga sondalo nga mga unom nala ka gatos ka tawo.

¹⁶Nagkampo hira Saul, Jonatan nga iya anak, ngan an iya mga tawo didto ha Geba, didto han katunaan ni Benjamin; nakadto ha Micmas an kampo han mga Filisteohanon.

¹⁷Tikang han ira kampo sinmulong in tulo ka hugpo nga mga sondalo nga Filisteohanon; nagtipakadto an usa ka hugpo ha Ofra, didto han katunaan han Sual,

¹⁸nagtipakadto in lain nga hugpo ha Betoron, ngan an ikatulo nagtipakadto han pag-ultan nga natangbo han Kahamub-an han Zeboim ngan han kamingawan.

¹⁹Waray pa hadto mga panday hin puthaw didto ha Israel kay waray tugoti han mga Filisteohanon an mga Hebreo hin paghimo hin mga espada ngan hin mga bangkaw. (

²⁰Napakadto ha mga Filisteohanon an mga Israelita kon nagpapabaid hira han ira mga arado, mga piko, mga parakol, ngan mga garab;[34]

²¹usa la ka salapi an bayad hin pagbaid hin parakol ngan hin pag-ayad hin tugsok,[35] ngan duha la ka salapi an bayad hin pagbaid hin arado o piko.)

²²Sanglit dida han adlaw han araway waray mga espada o mga bangkaw an mga sondalo nga Israelita labot la kan Saul ngan kan Jonatan nga iya anak.

²³Nagpadara an mga Filisteohanon hin usa nga hugpo hin mga sondalo hin pagpanalipod han Aragian han Micmas.