Read Waray Samarenyo Meaning Based 1 Samuel 14 Bible Online

1 Samuel 14 - Waray Samarenyo Meaning Based bible

1 Samuel 14

¹Usa ka adlaw ginsiring ni Jonatan an batan-on nga lalake nga paradara han iya mga hinganiban, “Tabok kita ngadto han kampo han mga Filisteohanon.” Kundi waray pagsumati ni Jonatan hi Saul nga iya amay

²nga nagkampo didto ha sirong hin kahoy nga granada ha Migron nga diri harayo tikang ha Gabaa; may upod niya nga mga 600 ka tawo.

³(Hi Ahias amo an padi nga nakakasul-ot han efod. Anak hiya ni Ahitob nga bugto ni Icabod nga anak ni Pinehas ngan apo ni Eli nga padi han GINOO didto ha Silo.) Waray kalibutan an mga tawo nga linmakat hi Jonatan.

⁴Didto han Aragian han Micmas nga aagian ni Jonatan hin pagkadto han kampo han mga Filisteohanon, may-ada duha nga dagko nga magtarom nga mga bato, paluyo han aragian: gintawag nga Boses an usa ngan Sene an ikaduha.

⁵Nakadto an usa ha amihanan nga naatubang han Micmas, ngan an ikaduha ha timogan nga naatubang han Geba.

⁶Ginsiring ni Jonatan an batan-on nga lalake, “Tabok kita ngadto han kampo hito nga pagano nga mga Filisteohanon. Bangin pa buligan kita han GINOO; kon buligan kita niya, waray makakapugong ha iya hin paghatag ha aton han pagdarag-an, bisan kon diri damo kita.”

⁷Binmaton an batan-on, “Upod ako ha imo bisan ano an imo karuyag pagbuhaton.”[36]

⁸“Maupay,” nagsiring hi Jonatan. “Matabok ngan mapakita kita han mga Filisteohanon.

⁹Kon pahulaton kita nira ngan dumaop hira ha aton, magpapabilin la kita dida han aton hinmumutangan.

¹⁰Kundi kon padaopon kita nira, makadto kita, kay usa ini nga tigaman nga iginhatag ha aton han GINOO an pagdarag-an kontra ha ira.”

¹¹Sanglit pinmakita hira han mga Filisteohanon, ngan nagsiring an mga Filisteohanon, “Kitaa! Nagkakaguwa na in pipira nga mga Hebreo tikang han mga buho nga ira gintinagoan.”

¹²Niyan ira ginoliatan nira hira Jonatan ngan an batan-on nga lalake, “Sagka kamo ngadi! May-ada namon igsusumat[37] ha iyo!” Ginsiring ni Jonatan an batan-on nga lalake, “Sunod ha akon. Iginhatag na han GINOO an pagdarag-an han Israel kontra ha ira.”

¹³Nagkamang hi Jonatan paggawas han aragian ngan sinmunod ha iya an batan-on nga lalake. Pinakiawayan ni Jonatan ngan gintiupay hin pagsontoka an mga Filisteohanon ngan ginpatay hira han batan-on nga lalake.

¹⁴Dida hito nga syahan nga pamatay, mga baynte ka tawo an pinamatay nira Jonatan ngan han batan-on nga lalake, dida la hin haligutay la nga dapit.[38]

¹⁵Nagkahadlok hin duro an ngatanan nga mga Filisteohanon didto han kaumhan; nangurog hin kahadlok an mga sumurulong ngan an mga sondalo didto han kampo; nabay-og an tuna, ngan nagkalilisang gud hira.

¹⁶Hinkit-an han nagbabantay nga mga tawo ni Saul didto ha Gabaa, didto han katunaan han Benjamin, nga nagdadalagan an mga Filisteohanon tungod hin kalisang.

¹⁷Sanglit nagsiring hi Saul ngadto han iya mga tawo, “Ihapa an mga sondalo ngan kitaa kon hin-o an waray dinhe.” Gin-ihap nira ini ngan ira hinbaroan nga waray didto hi Jonatan ngan an batan-on nga lalake nga iya paradara han mga hinganiban.

¹⁸“Dad-a nganhi an efod,”[39] ginsiring ni Saul hi Ahias nga padi. (Hito nga adlaw gindadara ini ni Ahias ha atubangan han mga tawo han Israel.)[40]

¹⁹Samtang naghihimangraw hi Saul ngadto han padi, nagtitikadugang man an pagkalilisang didto ha kampo han mga Filisteohanon, sanglit nagsiring ha iya hi Saul, “Waray na panahon hin pagpakiana han GINOO!”

²⁰Niyan ginsulong niya ngan han iya mga tawo an mga Filisteohanon nga nag-uurugnay na hin pag-araway tungod han ira kalisang.

²¹May pipira nga mga Hebreo nga dapig anay han mga Filisteohanon nga yana binmunyog ha ira ngadto han kampo, nagbalhin ngahaw han ira pagdapig[41] ngan tinmampo na liwat hira kanda Saul ug Jonatan.

²²An iba nga nagtitinago didto han kapungtoran han Efraim nakabati nga nanmamalagiw na an mga Filisteohanon, sanglit nakiaway liwat hira han mga Filisteohanon.

²³Nakig-away gud hira unhan pa han Betaben. Gintalwas han GINOO an Israel hito nga adlaw.

²⁴Magluya na tungod hin gutom an mga Israelita hito nga adlaw, kay hi Saul upod hin pagsumpa nagsugo: “Maghihingaraot an bisan hin-o nga kumaon yana nga adlaw samtang nga diri pa ako nakakabulos han akon mga kaaway.” Sanglit waray gud may kinmaon hin bisan ano ha bug-os nga adlaw.

²⁵Napasingadto hira ngatanan[42] hin usa nga kagurangan ngan nakaagi hira hin dugos ha ngatanan nga dapit.

²⁶Luob hin dugos an kagurangan, kundi waray tawo nga kinmaon hini kay nahadlok hira ngatanan han panhimaraot nga ginsiring ni Saul.

²⁷Kundi waray makasabot hi Jonatan han pagpanhimaraota ni iya tatay han mga tawo; sanglit kinmuha hiya han dugos pinaagi han tungkod nga iya gindara, ngan ginkuhit niya ini dida hin balay han putyokan, ngan kinmaon hiya han dugos. Inmabat hiya dayon hin kakusog.

²⁸Kundi ginsumatan hiya hin usa han mga tawo, “Maluya na kita ngatanan hin gutom, kundi gintarhog kami han imo amay nga nagsiring, ‘Maghihingaraot an bisan hin-o nga kumaon yana nga adlaw.’”

²⁹Binmaton hi Jonatan, “Nakasamok la han mga tawo an ginbuhat han akon amay! Kitaa hin kamaupay na han akon pagbati nga kinmaon ako hin dugos!

³⁰Mauruupay pa gud unta kon kinmaon an aton mga tawo han pagkaon nga ira nakuha yana nga adlaw han pagpirdeha nira han kaaway. Hunahunaa daw damo pa unta nga mga Filisteohanon an ira mapapatay!”

³¹Hito nga adlaw ginpirde han mga Israelita an mga Filisteohanon dida han ira pakig-away tikang ha Micmas ngadto ha Aiyalon. Hini nga takna magluya na hin duro tungod hin gutom an mga Israelita,

³²sanglit nag-aragaw hira pagkuha han ira natikas ha ira mga kaaway, kinmuha hira hin mga karnero ngan hin mga baka, gin-ihaw ini nira dayon, ngan ginkaon an karne nga may-ada pa dugo.

³³Ginsumatan hi Saul, “Kitaa, nakakasala an mga tawo supak han GINOO pinaagi hin pagkaon hin karne nga may-ada dugo.” Ginmoliat hi Saul, “Mga maglingo kamo! Kalidinga niyo in bato ngadi[43] ha akon.”

³⁴Niyan nagsugo liwat hiya: “Sudoya an ngatanan nga mga tawo ngan ipadara nganhi an ira mga baka ngan mga karnero. Iihawon ngan kakaonon ini nira dinhe; kinahanglan diri hira makasala han GINOO pinaagi hin pagkaon hin karne nga may-ada dugo.” Sanglit hito nga gab-i gindara nira ngatanan an ira kabakahan ngan gin-ihaw ini didto.

³⁵Nagtindog hi Saul hin altar ngadto han GINOO, syahan ini nga altar nga iya gintindog.

³⁶Nagsiring hi Saul han iya mga tawo, “Lugsong kita ngan sulonga ta ha gab-i an mga Filisteohanon, panikasi ta hira ngada han pagkaaga, ngan pamataya ta hira ngatanan.” Binmaton hira, “Buhata an imo ginhuhunahuna nga maupay.” Kundi nagsiring an padi, “Pakianhi ta anay an Dyos.”

³⁷Sanglit nagpakiana hi Saul han Dyos, “Susulongon ko ba an mga Filisteohanon? Padadag-on mo ba kami?” Kundi waray bumaton an Dyos hito nga adlaw.

³⁸Niyan nagsiring hi Saul han mga pangulo han mga tawo, “Kadi kamo ngan panginanoa ta kon ano nga sala an nabuhat yana nga adlaw.

³⁹Nagsasaad ako pinaagi han buhi nga GINOO nga nagpapadaog han Israel, nga papatayon an salaan, bisan kon akon anak hi Jonatan.” Kundi waray gud may sinmagbang.

⁴⁰Niyan nagsiring ha ira hi Saul, “Tindog kamo ngatanan didto, ngan matindog kami ngan hi Jonatan didi.” Binmaton hira, “Buhata an imo ginhuhunahuna nga maupay.”

⁴¹Nagsiring hi Saul han GINOO nga Dyos han Israel, “GINOO, kay ano nga waray mo ako pamatii yana nga adlaw? O GINOO nga Dyos han Israel, pamatii ako pinaagi han baraan nga mga bato. Kon adto nga sala kan Jonatan o akon ba, pamatii ako pinaagi han Urim; kundi kon kanan imo mga tawo nga Israel,[44] pamatii ako pinaagi han Tumim.”[45] Hinsabotan nga salaan hira Jonatan ug Saul; ngan natalwas an mga tawo.

⁴²Niyan nagsiring hi Saul, “Pilia kon hi ako ba o hi Jonatan nga akon anak.” Ngan hi Jonatan an salaan.

⁴³Niyan nagpakiana hi Saul kan Jonatan, “Ano ba an imo ginbuhat?” Binmaton hi Jonatan, “Kinmaon ako hin gutiay nga dugos. Iini ako—andam ako hin kamatay.”

⁴⁴Nagsiring ha iya hi Saul, “Patayon unta ako han Dyos kon diri ta ikaw patayon!”

⁴⁵Kundi nagsiring an mga tawo kan Saul, “Papatayon ba hi Jonatan nga nakahatag hini nga dako nga pagdarag-an para han Israel? Diri! Nagsasaad kami pinaagi han buhi nga GINOO, nga waray bisan usa nga buhok han iya ulo in mawawara. An iya ginbuhat yana nga adlaw iya ginbuhat binuligan han Dyos.” Sanglit gintalwas han mga tawo hi Jonatan ngan waray pagpataya.

⁴⁶Katapos hito hinmunong hi Saul hin pagbukod han mga Filisteohanon, ngan inmoli hira ngadto han ira kalugaringon nga katunaan.

⁴⁷Han hadi na han Israel hi Saul pinakiawayan niya an ngatanan niya nga mga kaaway bisan diin nga dapit: an mga tawo han Moab, han Amon, ngan han Edom, an kahadian han Zoba, ngan an mga Filisteohanon. Madaogon[46] hiya bisan diin hiya pakig-away.

⁴⁸Maisog hiya hin pakig-away ngan ginpirde niya an mga Amalekanhon. Gintalwas niya an mga Israelita tikang han ngatanan nga nagtikas ha ira.

⁴⁹An kan Saul mga anak nga kalalaken-an amo hira Jonatan Isbi, ug Malquisua. An iya mga anak nga kababayen-an amo hira Merab nga magurang ngan hi Mical nga manghod.

⁵⁰An iya asawa amo hi Ahinoam nga anak ni Ahimaas. An kapitan han iya kasondalohan amo hi Abner nga iya patod, nga anak ni Ner nga iya bata.

⁵¹Mga anak ni Abiel hira Cis nga amay ni Saul, ug Ner nga amay ni Abner.

⁵²Samtang buhi pa hi Saul, nakig-away hiya hin mapintas kontra han mga Filisteohanon. Sanglit kada pakakaagi niya hin tawo nga makusog o maisog iya ginhihimo nga kaapi han iya kasondalohan.