Read Waray Samarenyo Meaning Based 1 Samuel 16 Bible Online

1 Samuel 16 - Waray Samarenyo Meaning Based bible

1 Samuel 16

¹Nagsiring an GINOO kan Samuel, “Tubtob san-o an imo pagkamasulob-on tungod kan Saul? Iginsikway ko na hiya nga hadi han Israel. Kundi yana pun-a hin lana hin olibo an surudlan nga sungay ngan pakadto kan Isai nga taga-Betlehem, kay ginpili ko nga magin hadi in usa han iya mga anak nga kalalaken-an.”

²“Uunanhon ko hin pagkadto?” nagpakiana hi Samuel. “Kon mahiaro hini hi Saul, papatayon ako niya!” Binmaton an GINOO, “Pagdara hin usa nga nati nga baka ngan siring nga nakadto ka hin paghalad han GINOO hin hayop nga tutuboron.

³Dapita hi Isai hin paghalad, ngan susumatan ko ikaw kon ano an imo bubuhaton. Didihogan mo nga hadi an akon igsumat ha imo.”

⁴Gintuman ni Samuel an iginsiring ha iya han GINOO ngan kinmadto hiya ha Betlehem. Gintapo hiya han mga pangulo han syudad, nga nangungurog nga nagsiring ha iya, “Malinawon ba ini nga imo pagduaw ha amon?”

⁵“Oo,” binmaton hiya. “Kinmanhi ako hin paghalad han GINOO hin hayop nga tutuboron. Linisi an iyo kalugaringon ngan bunyog kamo ha akon.” Iya liwat pinapaglinis hi Isai ngan an iya mga anak nga kalalaken-an, ngan gindapit hira hin paghalad.

⁶Han pag-abot nira, hinkit-an ni Samuel hi Eliab nga anak ni Isai ngan naghunahuna hiya, “Amo gud ada ini nga tawo nga natindog dinhe ha atubangan han GINOO an iya ginpili.”

⁷Kundi nagsiring ha iya an GINOO, “Ayaw pagtan-awa an iya kahitaas ngan kagwapo. Nadiri ako ha iya, kay an akon paghunahuna diri sugad hin paghukom hin tawo. Tinatan-aw han tawo an iya pamahongpahong, kundi tinatan-aw ko an kasingkasing.”

⁸Niyan gintawag ni Isai an iya anak nga hi Abinadab ngan gindara hiya ha atubangan ni Samuel. Kundi nagsiring hi Samuel, “Diri, waray liwat hiya pagpilia han GINOO.”

⁹Niyan gindara ni Isai hi Sama. Nagsiring hi Samuel, “Diri, waray liwat hiya pagpilia han GINOO.”

¹⁰Ha sugad hini nga paagi gindara ni Isai ha atubangan ni Samuel an pito han iya mga anak nga kalalaken-an. Ngan nagsiring ha iya hi Samuel, “Diri, waray usa hini ha ira nga ginpili han GINOO.”

¹¹Niyan nagpakiana ha iya hi Samuel, “May-ada ka pa ba iba nga anak nga kalalaken-an?” Binmaton hi Isai, “May-ada pa gimamanghori, kundi aadto hiya nagmamangno han mga karnero.” Nagsiring hi Samuel, “Pakanhia hiya. Diri kita maghahalad ngada han iya pag-abot.”

¹²Sanglit ginpasugoan hiya ni Isai. Usa hiya nga gwapo, maupay an panlawas nga batan-on nga lalake, ngan maanyag an iya mga mata. Nagsiring an GINOO kan Samuel, “Amo ini hiya—dihogi hiya!”

¹³Kinuha ni Samuel an lana hin olibo ngan gindihogan niya hi David ha atubangan han iya kabugtoan. Ha gilayon pinakada kan David an espiritu han GINOO ngan waray na bumulag ha iya tikang hito nga adlaw. Katapos, binmalik hi Samuel ngadto ha Rama.

¹⁴Binmaya kan Saul an espiritu han GINOO, ngan ginsakit hiya hin usa nga maraot nga espiritu nga iginpadara han GINOO.

¹⁵Nagsiring ha iya an iya mga surugoon, “Maaram kami nga ginsasakit ka hin usa nga maraot nga espiritu nga iginpadara han Dyos.

¹⁶Sanglit sugoa kami ngan magbibiling kami hin tawo nga maaram magharpa. Niyan kon makada ha imo an maraot nga espiritu, makakagtukar an tawo han iya arpa ngan hiuulian ka na liwat.”

¹⁷Ginsugo hira ni Saul, “Igbiling ako hin usa ka tawo nga maupay magtukar ngan dad-a hiya nganhi ha akon.”

¹⁸Nagsiring in usa han iya mga surugoon, “May-ada tawo nga hi Isai nga taga-Betlehem, nga may anak nga lalake nga maupay magtokar hin arpa. Maisog ngan gwapo liwat hiya nga tawo, maupay nga sondalo, ngan maaram magpahimutang hin pulong. Aada ha iya an GINOO.”

¹⁹Sanglit nagpadara hi Saul hin mga surugoon ngadto kan Isai hin pagsiring, “Ipadara ha akon hi David nga imo anak nga nagmamangno han mga karnero.”

²⁰Ginpadara ni Isai hi David ngadto kan Saul, ngan nagdara hi David hin usa nga nati nga kanding, usa nga asno nga kargado hin tinapay, ngan hin usa nga supot nga anit nga puno hin bino.

²¹Kinmadto hi David kan Saul ngan nag-alagad hi David ha iya. Naruyagan hiya ni Saul ngan ginpili hiya nga paradara han iya mga hinganiban.

²²Niyan nagpatugon hi Saul kan Isai: “Naruruyag ako kan David. Tugoti hiya hin pag-alagad didi ha akon.”

²³Tikang hadto, kon naabot kan Saul an maraot nga espiritu nga iginpadara han Dyos, nagtotokar dayon hi David han iya arpa. Nabaya an maraot nga espiritu, nagaan an lawas ni Saul, ngan nahiuulian na liwat hiya.