Read Waray Samarenyo Meaning Based 1 Samuel 19 Bible Online

1 Samuel 19 - Waray Samarenyo Meaning Based bible

1 Samuel 19

¹Ginsumatan ni Saul hi Jonatan nga iya anak ngan an ngatanan nga iya mga opisyal nga nakahunahuna hiya hin pagpatay[55] kan David. Kundi nahigugma hin duro hi Jonatan kan David,

²sanglit iya ginsumatan hi David, “Gin-iiparatay ka han akon amay. Sanglit likay gud buwas han aga; pakadto hin usa nga tago nga dapit ngan pagpabilin didto.

³Makadto ako ngan uupdan ko an akon amay didto han uma nga imo tinatagoan, ngan makikighimangraw ako ha iya hiunong ha imo. Susumatan ta na la ikaw kon ano an akon hibaroan.”

⁴Gindayaw ni Jonatan hi David ha atubangan ni Saul ngan nagsiring, “Kay ano nga karuyag man nimo pagpatay kan David nga imo surugoon? Waray man hiya nabuhat ha imo nga maraot; lugod maupay man hiya mag-alagad ha imo.

⁵Igin-unong niya an iya kinabuhi han pagpataya niya kan Goliat, ngan ginbuhat han GINOO in dako nga pagdarag-an para han Israel. Nalipay ka ngani han pakakita mo hini. Sanglit kay ano nga karuyag mo buhaton yana hin maraot hini nga tawo nga waray sala ngan patayon hi David hin waray ano man nga hinungdan?”

⁶Pinamatian ni Saul an ginsiring ni Jonatan ngan nagsumpa hiya ha ngaran han GINOO nga diri niya papatayon hi David.

⁷Sanglit gintawag ni Jonatan hi David ngan ginsumatan niya han ngatanan; niyan iya gindara hi David ngadto kan Saul ngan nag-alagad hi David han hadi sugad han iya ginbuhat han una.

⁸May-ada na liwat araway kontra han mga Filisteohanon. Ginsulong hira ni David ngan damo an iya pinamatay sanglit nangalagiw an mga Filisteohanon.

⁹Usa ka adlaw sinmakob na liwat kan Saul in usa nga maraot nga espiritu nga tikang han GINOO. Nalingkod hiya didto han iya balay nga nakapot han iya bangkaw, ngan nakadto hi David nagtotokar han iya arpa.

¹⁰Gintinguha ni Saul hin pagtaod kan David ha bungbong pinaagi han iya bangkaw, kundi nakalikay hi David, ngan ginmuot an bangkaw ha bungbong. Dinmalagan hi David ngan kinmalagiw.

¹¹Hito ngahaw nga gab-i nagsugo hi Saul hin mga tawo hin pagbantay han balay ni David ngan pagpatay ha iya pagkaaga. Ginpahimatngonan hi David ni Mical nga iya asawa, “Kon diri ka kumalagiw yana nga gab-i, mapatay ka buwas.”

¹²Ginpalusad hi David ni Mical ha bintana, ngan dinmalagan ngan kinmalagiw hiya.

¹³Niyan kinuha ni Mical an diyosdiyos han panimalay, iginhigda ini niya dida han higdaan, ginpaolon ini hin ulonan nga hinimo hin barahibo hin kanding, ngan gintahoban.

¹⁴Han pag-abot na han mga tawo ni Saul pagkuha kan David, ginsumatan hira ni Mical nga masakit hiya.

¹⁵Kundi ginpabalik hira ni Saul. Ginsugo hira, “Dad-a hiya nganhi dida ha iya higdaan ngan papatayon ko hiya.”

¹⁶Sinmakob hira ngan ira hin-agian didto han higdaan an diyosdiyos han balay ngan an ulonan nga barahibo hin kanding nga inoonlan.

¹⁷Nagpakiana hi Saul kan Mical, “Kay ano nga ginlimbongan mo ako hin sugad hini ngan ginpakalagiw mo an akon kaaway?” Binmaton hiya, “Nagsiring hiya nga papatayon ako niya kon diri ko hiya buligan hin pagkalagiw.”

¹⁸Kinmalagiw hi David ngan kinmadto hiya kan Samuel didto ha Rama ngan iya ginsumatan hi Samuel han ngatanan nga ginbuhat ha iya ni Saul. Niyan kinmadto hiya ngan hi Samuel ha Naiot ngan nagpabilin hira didto.

¹⁹Ginsumatan hi Saul nga nakadto hi David ha Naiot didto ha Rama,

²⁰sanglit nagsugo hiya hin mga tawo hin pagdakop ha iya. Hinkit-an nira[56] an hugpo hin mga manaragna nga sigi an panagna ngan hi Samuel amo an nag-uuna ha ira. Niyan sinmakob an espiritu han Dyos han mga tawo ni Saul, ngan sigi liwat an ira panagna.

²¹Han paghibaro hini ni Saul, nagpadara hiya hin darudamo pa nga mga sinugo, ngan nanagna liwat ini hira. Nagpadara pa hiya hin mga sinugo ha ikatulo na, ngan amo gihapon an nahinabo ha ira.

²²Sanglit hiya na gud an kinmadto ha Rama. Han pag-abot niya ngadto han dako nga atabay didto ha Secu, nagpakiana hiya kon hain hira Samuel ug David ngan ginsumatan hiya nga nakadto hira ha Naiot.

²³Han nagtitipakadto na hiya, sinmakob liwat ha iya an espiritu han Dyos, ngan nanagna hiya dida han dalan asta ngadto ha Naiot.

²⁴Ginlubas niya an iya panapton ngan nanagna ha atubangan ni Samuel, ngan hinmigda hiya nga hubo ha bug-os nga adlaw ug gab-i. (Amo ini an pagtikang han darawhonon, “Manaragna na ngay-an hi Saul?”)