Read Waray Samarenyo Meaning Based 1 Samuel 24 Bible Online

1 Samuel 24 - Waray Samarenyo Meaning Based bible

1 Samuel 24

¹Han pagbalik ni Saul tikang han pakig-away niya han mga Filisteohanon, nasumatan hiya nga nakadto hi David han kamingawan hirani han Engadi.

²Gindara ni Saul in tulo ka yukot han gimamaupayi nga mga sondalo ha Israel ngan kinmadto hira hin pamiling kan David ngan han iya mga tawo ha sinirangan han dapit nga ginngangaranan nga kababtoan han Ihalas nga Kanding.

³Inmabot hiya didto hin usa nga lungib nga hirani hin mga toril hin kakarnerohan ha ligid han dalan, ngan sinmulod hiya hin pag-uro. Nahinabo nga amo ngahaw ini an lungib nga tinatagoan ni David ngan han iya mga tawo, ngan nakadto hira ha surusulod han lungib.

⁴Nagsiring an mga tawo kan David, “Higayon mo na ini! Itinutubyan han GINOO ha imo gahom an imo kaaway, ngan makakagbuhat ka ha iya han bisan ano nga imo karuyag.” Naghinayhinay hi David hin pagkamang ngan gintabasan niya an bado ni Saul nga waray makasabot hi Saul.

⁵Kundi kahuman hini, nagbasol hi David,

⁶ngan nagsiring hiya han iya mga tawo, “Pugngan unta ako han GINOO hin pagdaot han akon agaron nga ginpili han GINOO nga hadi! Kinahanglan diri ko gud hiya pagdaoton, kay amo hiya an hadi nga ginpili han GINOO!”

⁷Sanglit tinmoo kan David an iya mga tawo ngan waray nira sulonga hi Saul. Binmuhat hi Saul, ginmawas han lungib, ngan nagpadayon hin paglakat.

⁸Niyan ginmawas hi David sunod ha iya ngan gintawag ni David hi Saul, “Harangdon nga Hadi!” Linmingi hi Saul ngan yinmukbo hi David ha tuna hin paghatag hin katalahuran,

⁹ngan nagsiring, “Kay ano nga tinmoo ka man hin mga sumat hin mga tawo nga nasiring nga may-ada ako maraot nga nahuhunahunaan ha imo?

¹⁰Hinkit-an mo na nga yana didto ha sakob han lungib igintubyan ka han GINOO ha akon gahom. Ginsiring ako han akon mga tawo nga patayon ko ikaw, kundi nalooy ako ha imo ngan ginsiring ko hira nga diri gud ako maglalabot ha imo, kay amo ikaw an ginpili han GINOO nga hadi.

¹¹Kitaa, amay ko, kitaa an tinabas han imo bado nga akon kinakaptan! Pinapatay ko unta ikaw, kundi gintabas ko la lugod ini. Angay na unta tuohan ini nga waray gud ako hunahuna hin pag-ato ha imo o hin pagpatay ha imo. Karuyag nimo hin pagpatay ha akon, bisan kon waray ako nabuhat nga sayop ha imo.

¹²Maghukom unta ha aton an GINOO kon hin-o ha aton an sayop! Kastigohon ka unta tungod han imo pagkontraha ha akon, kay diri gud ako magdadaot ha imo.

¹³Maaram ka man han daan nga darawhonon, ‘Magraot la nga mga tawo an nagbubuhat hin maraot.’ Sanglit diri ko ikaw pagdadaoton.

¹⁴Hin-o an gin-iiparatay han hadi han Israel? Hin-o an iya ginbubukod! Usa nga patay nga ayam, usa nga purgas?

¹⁵An GINOO amo an maghuhukom, ngan hiya an magbubuot kon hin-o ha aton an sayop. Hiya unta an manalipod ha akon, ngan magtalwas ha akon ha imo mga kamot!”

¹⁶Han katapos na ni David pagyakan, nagsiring hi Saul, “Ikaw ba hi David nga akon anak?” Ngan nagtangis hiya.

¹⁷Niyan nagsiring hiya kan David, “Matadong ka, ngan sayop ako. Maupay an imo mga ginbuhat ha akon, samtang ginbuhat ko in dako nga sayop ha imo!

¹⁸Yana nga adlaw nagpakita ka han imo pagkamaupay ha akon, kay waray mo ako pataya, bisan kon igintubyan ako han GINOO ha imo gahom.

¹⁹Kon in usa ka tawo makadakop han iya kaaway, bubuhian pa niya? Bendisyonan ka unta han GINOO tungod han imo ginbuhat ha akon yana nga adlaw!

²⁰Yana maaram ako nga ikaw an magigin hadi han Israel, nga magpapadayon an ginhadian ha ubos han imo pagdumara.

²¹Kundi pagsaad ha akon ha ngaran han GINOO nga imo tatalwason an akon mga tulin, basi diri gud hingalimtan an ngaran ko ngan han akon panimalay.”

²²Nagsumpa hi David nga iya ini tutumanon. Niyan inmoli hi Saul, ngan binmalik hi David ngan an iya mga tawo ngadto han ira taragoan.