Read Waray Samarenyo Meaning Based 1 Samuel 27 Bible Online

1 Samuel 27 - Waray Samarenyo Meaning Based bible

1 Samuel 27

¹Nagsiring hi David ha iya kalugaringon, “Usa hini nga mga adlaw papatayon ako ni Saul. Maupay pa nga kumalagiw ako ngadto ha Filistia. Niyan maundang hi Saul hin pagbiniling ha akon didto ha Israel, ngan mahigagawas ako ha kataragman.”

²Sanglit kinmadto dayon hi David ngan an iya 600 nga mga tawo kan Aquis nga hadi han Gat, nga anak ni Maoc.

³Nag-ukoy hi David ngan an iya mga tawo upod an ira mga panimalay didto ha Gat. Upod ni David an iya duha nga asawa: hira Ahinoam nga taga-Jezrael, ngan Abigail nga balo ni Nabal nga taga-Carmelo.

⁴Han paghibaro ni Saul nga pinmalagiw na hi David ngadto ha Gat, inmundang hiya hin pagpinamiling ha iya.

⁵Nagsiring hi David kan Aquis, “Kon sangkay ka man nakon, tagi ako hin usa nga gutiay nga bungto nga akon pag-uokyan. Diri kinahanglan nga mag-ukoy ako tampo ha imo didto han kapital nga syudad.”

⁶Sanglit iginhatag ha iya ni Aquis an bungto han Siclag, ngan tungod hini gintag-iya an Siclag han kahadian han Juda tikang pa hadto.

⁷Naukoy hi David didto ha Filistia sulod hin 16 ka bulan.

⁸Sulod hito nga panahon, ginsulong ni David ngan han iya mga sakop an mga tawo han Gesur, Girzi, ug Amalec nga maiha na hin duro nga mga umurokoy didto hini nga mga katunaan. Ginsulong niya an ira tuna tubtob ha Sur, ngan ngadto pa gud ha Ehipto,

⁹ngan pinamamatay nira an ngatanan nga kalalaken-an ug kababayen-an ngan gintikas nira an kakarnerohan, kabakahan, kaasnohan, kakamelyohan, ngan bisan pa an mga panapton. Katapos binmalik hiya ngadto kan Aquis,

¹⁰nga napakiana ha iya, “Diin ka man sulong yana nga panahon?” Nagsumat ha iya hi David nga kinmadto hiya han timogan nga bahin han Juda, o han katunaan han tribo ni Jerameel, o han katunaan nga gin-ukyan han mga Kenitanhon.

¹¹Ginhurot hin pamatay ni David an kalalaken-an ug kababayen-an, basi waray usa nga makabalik hin pagsumat kan Gat han tinuod nga ginbuhat niya ngan han iya mga tawo. Amo ini an ginbuhat ni David ha bug-os nga panahon han nakadto hiya ha Filistia.

¹²Kundi sinmarig hi Aquis kan David ngan naghunahuna hiya, “Nasisinahan hiya hin duro han iya kalugaringon nga mga tawo nga mga Israelita sanglit mag-aalagad hiya ha akon ha bug-os niya nga kinabuhi.”