Read Waray Samarenyo Meaning Based 1 Samuel 31 Bible Online

1 Samuel 31 - Waray Samarenyo Meaning Based bible

1 Samuel 31

¹Nakig-away an mga Filisteohanon kontra han mga Israelita didto ha Bukid Gilboa. Damo nga mga Israelita in pinamatay didto, ngan nangalagiw an iba ha ira, lakip hi Hadi Saul ngan an iya mga anak nga kalalaken-an.

²Kundi hin-abutan hira han mga Filisteohanon, ngan ginpatay hira Jonatan, Abinadab, ug Malquisua, an tulo nga mga anak ni Saul.

³Naalikosan hi Saul han iya mga kaaway, ngan naigo hiya hin mga pana ngan grabe an iya mga samad.

⁴Ginsiring niya an batan-on nga paradara han iya mga hinganiban, “Hulbota an imo espada ngan pataya ako, basi diri ako pagduyagan la ngan basi diri ini nga diri nakilala hin dyos nga mga Filisteohanon an makamatay ha akon.” Kundi nahadlok hin duro an batan-on hin pagbuhat hini. Sanglit hinulbot ni Saul an iya kalugaringon nga espada ngan nag-unay hiya.

⁵Hinkit-an han batan-on nga patay na hi Saul, sanglit nag-unay liwat hiya han iya kalugaringon nga espada ngan namatay hiya upod kan Saul.

⁶Amo ini an kaagi han kamatay ni Saul, han iya tulo nga mga anak nga kalalaken-an, ngan han batan-on nga lalake; nagkamamatay hito nga adlaw an ngatanan nga mga tawo ni Saul.

⁷Han paghibaro han mga Israelita didto ha luyo nga dapit han Kahamub-an han Jezrael ngan didto ha sinirangan han Salog Jordan nga nangalagiw na an mga sondalo han Israel ngan ginpatay na hira Saul ngan an iya mga anak nga kalalaken-an, binayaan nira an ira mga bungto ngan nangalagiw hira. Niyan nagkaabot an mga Filisteohanon ngan ginrikopohan nira an mga bungto.

⁸Han pagkabuwas, kinmadto an mga Filisteohanon hin pagtikas han mga patay, ngan ira hin-agian an mga lawas nira Saul ngan han iya tulo nga mga anak nga kalalaken-an nga nalunay didto ha Bukid Gilboa.

⁹Ginpugotan nira hi Saul, ginhukas an iya mga hinganiban, ngan iginpadara ini hin mga magsarangyaw ngadto han bug-os nga Filistia hin pagsumat han ira mga diyosdiyos ngan han ira mga tawo.

¹⁰Niyan iginbutang nira an mga hinganiban ni Saul didto han templo han diyosa nga hi Astarte, ngan iginraysang nira an iya lawas ngadto han pader han syudad han Betsan.

¹¹Han paghibaro la han mga tawo han Jabes didto ha Galaad han ginbuhat han mga Filisteohanon kan Saul,

¹²nagkagawas an duro kamag-isog nga mga tawo ngan nagbaktas hira ngadto ha Betsan ha bug-os nga gab-i. Gintanggal nira an mga lawas nira Saul ngan han iya mga anak nga kalalaken-an tikang han pader, iginbalik ini nira ngadto ha Jabes ngan ginsunog ini nira didto.

¹³Katapos ginkuha nira an mga tul-an ngan iginlubong ini didto han bungto han Jabes ha puno han kahoy nga tuog ngan nagpuasa hira sulod hin pito ka adlaw.