Read Waray Samarenyo Meaning Based 1 Samuel 5 Bible Online

1 Samuel 5 - Waray Samarenyo Meaning Based bible

1 Samuel 5

¹Katapos mabihag han mga Filisteohanon an Kahon han Ginsaaran, gindara ini nira tikang ha Ebenezer ngadto han ira syudad han Asdod.

²Iginsulod ini nira han templo han ira diyos nga hi Dagon, ngan igintupad ini han ladawan ni Dagon.

³Temprano pa han pagkaaga hinkit-an han mga tawo han Asdod nga nakukulob na ha tuna an ladawan ni Dagon ha atubangan han kanan GINOO Kahon han Ginsaaran. Sanglit gin-alsa ini nira ngan iginbalik ngadto han ginbutangan ha iya.

⁴Temprano pa han pagkasunod nga aga, hinkit-an nira nga nakukulob na liwat an ladawan ha atubangan han Kahon han Ginsaaran. Punggot na an ulo ngan an duha nga mga butkon ngan nakadto ini ha aragian han porta; bulag na han lawas. (

⁵Amo ito nga bisan yana nga adlaw linalakdan la ito nga dapit han kapadian ni Dagon ngan han ngatanan nga iya mga maniringba didto ha Asdod ngan diri gud hira natamak hito nga dapit.)

⁶Ginkastigo han GINOO an mga tawo han Asdod ngan iya ginhadlok hira. Iya ginkastigo hira ngan an mga tawo nga naukoy han higrani nga katunaan ngan pinapag-antos hira pinaagi hin mga hubag.[14]

⁷Han pakasabot nira han nahinabo, nagsiring hira “Kinakastigo han Dyos han Israel kita ngan an aton diyos nga hi Dagon. Kinahanglan ipahirayo ha aton an Kahon han Ginsaaran.”

⁸Sanglit ginpasugoan nira an lima nga kahadian han mga Filisteohanon ngan ginpakianhan hira, “Ano an aton bubuhaton han Kahon han Ginsaaran han Dyos han Israel?” Binmaton hira, “Dad-a ini ngadto ha Gat.” Sanglit ira gindara ngadto ha Gat nga lain nga syudad nga Filisteohanon.

⁹Kundi han pag-abot hini didto, ginkastigo liwat han GINOO ito nga syudad ngan narigumok an syudad. Iya kinastigo hira hin mga hubag nga nakasahid han ngatanan nga mga tawo han syudad, han mga batan-on ngan mga tigurang.

¹⁰Sanglit ira ginpadara an Kahon han Ginsaaran ngadto ha Ekron, nga lain liwat nga syudad nga Filisteohanon. Kundi han pag-abot hini didto, ginmoliat an mga tawo, “Ira gindara nganhi an Kahon han Ginsaaran han Dyos han Israel basi pamatayon kita ngatanan.”

¹¹Sanglit ginpasugoan na liwat nira an ngatanan nga Filisteohanon nga kahadian, ngan ginsiring hira, “Igbalik an Kahon han Ginsaaran han Israel ngadto han iya kalugaringon nga dapit, basi diri mamatay kami ngan an amon mga panimalay.” Dako gud an karigumok han bug-os nga syudad kay gintiupay hira hin pagkastigoha han Dyos.

¹²Nagkamay-ada mga hubag bisan adton waray magkamamatay ngan naggogliat an mga tawo ha ira kadiyosan pangaro hin bulig.