Read Waray Samarenyo Meaning Based 1 Samuel 9 Bible Online

1 Samuel 9 - Waray Samarenyo Meaning Based bible

1 Samuel 9

¹May-ada hadto usa nga riko ngan harangdon gud nga tawo nga ginngaranan nga Cis ngan sakop han tribo ni Benjamin. Anak hiya ni Abiel ngan apo ni Zeror, ngan sakop han panimalay ni Becorat nga bahin han banay ni Afia.

²May-ada hiya anak nga ginngaranan nga Saul, gwapo ngan batan-on. Hiruhitaas hiya hin bisan hin-o nga tawo didto ha Israel ngan waray makakalabaw ha iya hin ka gwapo.

³Nagsarang in mga asno ni Cis, sanglit nagsiring hiya kan Saul, “Paupda ha imo in usa han mga surugoon ngan pamilnga an mga asno.”

⁴Ginsudoy nira an sagkahon nga katunaan han Efraim ngan han katunaan han Salisa, kundi waray hira makaagi. Sanglit nagpadayon hira hin pagsudoy han katunaan han Saalim, kundi waray didto an mga asno. Niyan nagsudoy hira han katunaan ni Benjamin, kundi waray gihapon nira hiagii an mga asno.

⁵Han pag-abot nira han katunaan han Zuf, nagsiring hi Saul han iya surugoon, “Pangoli na kita, kay bangin an akon amay mabaraka na ha aton, diri na lugod han mga asno.”

⁶Binmaton an surugoon, “Anay daw! Dinhe hini nga bungto may-ada baraan nga tawo, nga tinahod kaupay, kay natutuman an ngatanan nga iya ginpapamulong. Pakadto kita ha iya kay bangin makagsumat hiya ha aton kon hain ta hiaagii an mga asno.”

⁷Pinmakiana hi Saul, “Kon kumadto kita ha iya, ano man in aton ighahatag ha iya? Naubos na an aton balon nga pagkaon ngan waray na gud kita sadang ihatag ha iya, di ba?”

⁸Binmaton an surugoon, “May-ada ako usa nga sensilyo nga salapi. Ihahatag ko ini ha iya, ngan susumatan kita niya kon hain ta hiaagii ini.”

⁹Binmaton hi Saul, “Maupay nga hunahuna! Tana.” Sanglit kinmadto hira han bungto nga inuokyan han baraan nga tawo. Han nasagka na hira han pungtod tipakadto han bungto, iginkasugat nira in kababayen-an nga nagkakagawas hin pag-alog. Ginpakianhan nira an kababayen-an, “Aanhi ba ha bungto an paratigo?” (Hadto nga panahon paratigo an tawag hin usa nga manaragna, sanglit kon may-ada karuyag pumakiana han Dyos, nasiring hiya, “Pakadto kita han paratigo.”)

¹²Binmaton an kababayen-an, “Oo, aanhi hiya. Ngani, nauuna la hiya ha iyo. Kon magdagmit kamo, hiaabutan niyo hiya. Ha pag sakob niyo han bungto, hiaagian niyo hiya. Inmabot hiya didto ha bungto yana nga adlaw, kay maghahalad an mga tawo didto ha altar han pungtod. Diri mangangaon an mga dinapit kon diri hiya umabot, kay iya anay bebendisyonan an halad nga tinubod. Kon kumadto kamo yana, hiaagian hiya niyo nga diri pa hiya masagka han pungtod hin pagkaon.”

¹⁴Sanglit nagpadayon hira Saul ngan an iya surugoon ngadto han bungto, ngan han nasulod na hira han bungto, hinkit-an nira hi Samuel nga nagawas tipakada ha ira ngan tipakadto na hiya han dapit hin pagsingba.

¹⁵Dida han adlaw han waray pa aabot hi Saul, nagsiring na an GINOO kan Samuel,

¹⁶“Buwas han mga sugad hini nga takna pakakadtoon ko ha imo in usa ka tawo nga sakop han tribo ni Benjamin; dihogi hiya nga pangulo han akon mga tawo nga Israel, kay hiya an magtatalwas han Israel ha mga Filisteohanon. Hinkit-an ko an pag-antos han akon mga tawo, ngan hinbatian ko an ira mga pangaro hin pakibulig.”

¹⁷Han paghikit-i ni Samuel kan Saul, nagsiring ha iya an GINOO, “Amo ini an tawo nga akon iginsumat ha imo. Hiya an maghahadi han akon mga tawo.”

¹⁸Niyan gindaop ni Saul hi Samuel nga nakada hirani han ganghaan, ngan nagpakiana hiya “Sumati daw ako, hain ba pag-uokoy an paratigo?”

¹⁹Binmaton hi Samuel, “Amo ako an paratigo. Pag-una kamo ha akon ngadto han dapit hin pagsingba. Makikigsaro ako ha iyo yana nga adlaw. Buwas han aga babatonon ko an ngatanan niyo nga mga pakiana ngan palalakton ko kamo.

²⁰Mahitungod han mga asno nga nawara hin tulo na ka adlaw, ayaw kamo kabaraka hini; hin-agian na ini. Kundi hin-o gud an kinakaruyag, han mga tawo han Israel?[17] Hi ikaw—ikaw ngan an panimalay han imo amay.”

²¹Binmaton hi Saul, “Sakop ako han tribo ni Benjamin nga amo an gigugutiayi nga tribo han Israel, ngan an akon panimalay amo an giuubosi han tribo ni Benjamin. Sanglit kay ano nga naghihimangraw ka ha akon hin sugad hini?”

²²Niyan gindara ni Samuel hira Saul ngan an iya surugoon ngadto han dako nga kwarto, ngan iginhatag ha ira an syahan nga lingkoran ha lamesa diin nagkakalingkod an mga dinapit nga mga 30 ka tawo ngatanan.

²³Nagsiring hi Samuel han paraluto, “Dad-a ngadi an karne nga akon iginpalain ha imo hin pagluto.”

²⁴Sanglit gindara han paraluto an pinili nga bahin han paa ngan igindurot ini kan Saul. Nagsiring hi Samuel,[18] “Kitaa, iini an bahin han karne nga gin-andam para ha imo. Kaona ini. Ginggahin ko ini para ha imo basi kaonon mo hini nga takna kaupod han mga tawo nga akon gindapit.”[19] Sanglit kinmaon hi Saul upod kan Samuel hito nga adlaw.

²⁵Linmugsong hira ngadto han bungto tikang han dapit hin pagsingba. Gin-andaman nira hi Saul hin higdaan[20] didto han atop,[21]

²⁶ngan didto hiya kinmaturog.[22] Han maagahon pa gintawag ni Samuel hi Saul, “Bangon na. Magpapagikan ako ha imo.” Binmangon hi Saul, ngan nagbunyog hira nga duha ngadto han kalsada.

²⁷Han pag-abot nira ha ligid han bungto, nagsiring hi Samuel kan Saul, “Paunha ha aton an surugoon.” Linmakat an surugoon, ngan nagpadayon hi Samuel, “Hulat anay dinhe, ngan susumatan ko ikaw han iginsiring han Dyos.”