Read Weh Matyo 11 Bible Online

Matyo 11 - Weh bible

Matyo 11

¹Ambə Yeso dza may tsunə ghəə ghə tə̀ ngəd tə wi tey ighəm n ghii tə təbəghə, tə n zəghə tsu naʼ zey, bwey ndòw naʼa tə̀ naʼa n mboʼ i tii zə, dii ndòw aghə̂ naʼlə ndòw soʼo ghəə a Kəzə̀.

²Ambə Jɔn wù fuu u mmuu n Kəzə̀ mə, zow tsunə zɔŋ u Klisto wə n ndaw tsaʼ, tə n tûm tsu dzûmə tə wi tə loʼ tə nə̀ ghə ndow koʼ wi.

³Ghə n ndòw bəb tə̀ Yeso nə̀, “À loʼ wɔ Klisto wən Jɔn â dza nə̀ tə khə ni bə ə, nkee a ləmə tsu wù nuu ə?”

⁴Nghee dzûmə tey bə bəb tsunə, Yeso n dza tə̀ ghə nə̀, “Ndòw dza ndòw na tə̀ Jɔn, ghəə ghey ghaa zownə, nsə ghəə ghey ghaa koʼnə.

⁵Ghə̂ a fəbə a nya koʼo təluʼu, kə̀ŋŋə u nya bweynu, ghə̂ ghey ghə â dzaŋanə kə̀m wə n taw, kùʼ wə a zownə tuŋŋə wə, ghə̂ à kpuu ghə a zhəm dzəŋŋə bə nə ivə, ghə a naʼlə soʼonə tûm i dzuŋu zə tə ghə̂ a laa ghə.

⁶Ndzuŋ loʼ tə̀ wù wey tə səmə way bòʼ mə̀.”

⁷Nghee dzûmə tə Jɔn tə nuulə ndownə, Yeso n kaʼ ndòw ni khəə aghəə bòʼ Jɔn tə̀ nɔɔ wə aghə̂ wey, dza tə̀ ghə nə̀, “Ghaa â ndòw n mbvən ə ntsaŋ ni ndòw koʼ kee? Ghaa â ndow ni ndow koʼ kədzaŋ, kɔŋŋə kə fəəbənə ə? Eh ngaŋ!

⁸Ghaa â baa ndòw ni ndòw koʼ kee? Ghaa â ndow ni ndow koʼ wù nə̀ tə n wû u lab dzɔb ə? Eh ngaŋ! Ghə̂ ghey ghə labənə wû zə, muu n bii u ghə baʼatum.

⁹Ghaa â kee ndòw ni ndòw koʼ kee? Ghaa â ndow ni ndow koʼ wù tûm Kəzə̀ ə? Ow, n dza bə tə̀ ghaa nə̀ tə buʼ tsəghəshi wù tûm Kəzə̀.

¹⁰À wən loʼ wù wey ghə â tɔ̀ɔ naŋanə n màʼlə K-a-zə̀ kuum wi nə̀, ‘Mə̀ î tûm bə tsəndəghə zuŋ isə, Tə bə bayyə naŋa tsu jìi tə̀ wɔ̀.’”

¹¹“N kùm dza bə tə̀ ghaa nə̀, wù loʼ way dzə fa n mbi, tə tsəghəshinə Jɔn Wù fuu u mmuu n Kəzə̀ mə, a kee loʼ nə̀ wù wey tə təb tsəghəshinə ghə̂ ghə adzəm n fɔɔ wə idəŋ wə tsəghəshinu Jɔn.

¹²Ni ney nuu tsu n tsuʼu n Jɔn Wù fuu u mmuu n Kəzə̀ mə, bə kuum bə nya, fɔ̀ɔ wə idəŋ wə n ngii fəghə ni bwey ndòw tsətsəghə n wɔ ngaamə tə aghə̂ tə, ngaamə tə aghə̂ tə a dəmə soʼonə ni bəəbə maʼa fɔ̀ɔ u tii wə.

¹³N təŋkey, tûm tə Kəzə̀ tədzəm nsə laŋ u Mushi u mâ ngii khəə ghəə ghə bòʼ fɔ̀ɔ u tii wə, ni bə kuum bə nya n nəŋə i Jɔn.

¹⁴Nə̀ ghaa ləghənu ni bəghəm tûm tii, ghaa khə ni keeli nə̀ Jɔn loʼ Elayja wən ghə â dza naŋanə nə̀ tə khə ni bə.

¹⁵Wù wey tə khənə tuŋŋə wə, tə zow!”

¹⁶“N loʼ ni dza nə̀ ghə̂ a nùm tən loʼ ngee? Ghə loʼ tə̀ a loʼ aghinətəghə ghə naamənə ndaw tə n faabə tə jii, tə wən n dza tə̀ waazə nə̀,

¹⁷‘A tsəm tɔŋ ndɔŋ nə̀ ghaa bən, ghaa a ka bən. A u zhimnə ndzaŋa tə ivə tə, ghaa a ka dey.’

¹⁸Jɔn â bənu, zə̂ə way, məə soʼo way nlə mə, ghaa n dza nə̀, ‘Zay kə bəbə kə loʼ n kow wi.’

¹⁹Waa weynum n ndòw bə, zə̂ə, məə soʼo nlə, ghə̂ adzəm n dza nə̀, ‘Koʼo kə wù wən, tə mèy zə̂ənu, tə məə khəə soʼo nlə, fə̂ a wi a loʼ ghə̂ a kwɔɔ a kəmàʼlə ghə nsə ghə̂ a bəbə ghə!’ A kee loʼ kə nə̀ tɔb u Kəzə̀ u dii bə kə isəŋə n ghəə a wi a ghəŋŋə ghə.”

²⁰Yeso n daŋŋə kaʼ ndòw ni kpaa ghə̂ ghey tə â ngii diinə ghəə a faalə ghə n naʼa tə ghə, ghə̂ a tii ghə n ka nam kwey fə̀ŋ tə ghə n ghəə a bəbə ghə. Tə n dza tə̀ ghə nə̀,

²¹“Ngoʼ loʼ tə ghaa ghə̂ a Korazin ghə! Ngoʼ loʼ tə̀ ghaa ghə̂ a Bedsayda ghə! N təŋkey, abə mə â ghəŋŋənə ghəə a faalə ghən n naʼ i Tayra nsə n naʼ i Sidɔn, tə̂ ghə mâ dzəŋə ndzə̂ tə ivə tə, tsoʼlə soʼo udzəm nə iwû, ni dii nə̀ ghə n kweyyə fə̀ŋ tə ghə tə n ghəə a bəbə ghə.

²²N fa dza n kee dza bə tə̀ ghaa nə̀, abə tsuʼ fə saʼa fə təsaʼ fə i bənə, Zə̀ kə î kwɔɔlə way sî zə n kow ghaa tə̀ tə i kwɔɔlənə n kow naʼ i Tayra zə nsə naʼ i Sidɔn zə.

²³Abə ghaa ghə̂ a Kapenum ghə, ghaa moʼlə nə̀ ghaa loʼ ni kɔʼlə wû i ghaa idəŋ ə? Ngaŋ! Zə̀ kə î maʼa tsu ndòw ghaa n luʼu key ghə̂ a fəʼlənə tii. N təŋkey, abə a mə loʼ nə̀ ghəə a faalə ghey ghə â ghəŋənə n naʼ i ghaa, nə̀ ghə â ghəŋə n naʼ i Sodom, tə̂ Sodom mə nam loʼ ni bə shi na.

²⁴N dza n kee dza bə tə̀ ghaa nə̀, n tsuʼ fə təsaʼ, Zə̀ kə i kwɔɔlənu sî n kow naʼ i Sodom zə tsəghəshi nghee tə i kwɔɔlənə sî zə n kow ghaa.”

²⁵Yeso n gɔŋŋə tsu n nəŋə i tii zə nə̀, “N fuu bə kəzɔŋŋə tə̀ wɔ a Bày wuŋ, Muu ə kədəŋ nsə ghəlitsə kə, n təŋkey, wə̀ â nyi naŋa ghəə ghən tə̀ ghə̂ a tɔbə ghə nsə ghə̂ a kəmàʼlə ghə, wə̀ u dii fu tsunə tə̀ ghinətəghə ghə.

²⁶Ow a Bày wuŋ, a wən loʼ nghee wə̀ â ləghə nə̀ i bə doʼo.”

²⁷Nghee tə̀ Yeso gɔŋŋə may tsunə, tə n dza tə̀ ghə̂ ghə nə̀, “Bày wuŋ n fuu ghəə ghə adzəm tə̀ mə, wù loʼ khə way Waa tii à may kə Bày, wù loʼ khə soʼo way Bày à may kə Waa nsə wù wey Waa tsəm tsunə ni dii Bày tə̀ wi.”

²⁸“Ghaa ghey ghaa loʼ nə̀ ghaa n ngii fəghə ni boʼo fə u dədlə wə, bə na n tənə mə, n ney naŋa ghaa, ghaa zayyə tsu wû i ghaa.

²⁹Ney kɔʼ na fwaʼ kuŋ kə n wû i ghaa zə, ghaa zoʼlə tsu aghəə n wɔ mə̀, n təŋkey, n loʼ zəələ kə wù, khə soʼo fə̀ŋ i dzuŋu zə, ghaa i keeli izayyə.

³⁰Təŋkey fwaʼ kuŋ key mə fuu tə ghaa, kə taw way ni fwaʼ, fə wuŋ wey mə i fuunə ghaa boʼo, u zaŋŋənu.”