Read Weh Matyo 12 Bible Online

Matyo 12 - Weh bible

Matyo 12

¹Ambə n tsuʼ inaʼ u Təjuu u loʼ wə, Yeso nsə dzûmə tə wi n bwey tsəghə tɔɔlə ndòw n sum wə asaŋ u loʼ wə, dzəŋ n zabə dzûmə tə wi tey. Sey, ghə n kaʼ ni kpey fə tow wə asaŋ.

²Ambə ghə̂ tə Falasi a koʼ tsunə ghəə ghən, ghə n dza ndòw tə̀ wi nə̀, “Koʼo ndòw, dzûmə tə tə̀ ghəŋŋə ghəə zey laŋ kə dii way nə̀ a i ghəŋŋə n tsuʼ inaʼ.”

³Tə n beeli ndòw ghə dza nə̀, “Ghaa ka kam tɔŋɔ koʼ n màʼlə K-a-zə̀ ghəə ghey fɔ̀ɔ Devid nsə ghə̂ a wi ghə â ghəŋənə n nəŋə zey dzəŋ â zabənə wi ə?

⁴Tə â nyi ndòw n ndaw Kəzə̀, ney kɔʼ baa K-a-zə̀, zə̂ ghi ghə̂ a wi ghə, loʼ sey nə̀ laŋ kə dza nə̀ a khə kə ghə fɔɔngili ni zə̂ baa kə tii kə.

⁵Nkee ghaa ka kam tɔŋɔ koʼ tsə n laŋ u Mushi nə̀ n tsuʼu mə inaʼ n dzəm, ghə fɔɔngili n dzəŋi kə ndaw Kəzə̀ i nii zə n Yerosalem a ndzəmə bwulə maʼa kəlaŋ, laŋ kə n ka kwu ghə ə?

⁶N dza bə tə̀ ghaa nə̀, wù loʼ loʼ fa tə tsəghəshinə Ndaw Kəzə̀ i nii zə n Yerosalem.

⁷Abə ghaa mə khənə ghəə zey ghɔɔmə zən i dzanə nə̀, ‘N ləghə nə̀ ghə̂ ghə i khə sî i kwɔɔlə zə n kow ghə̂ ghə, a kad way kə nə̀ ghə i fəələ maʼlə wə tə̀ mə,’ i diinə, ghaa mə way ni saʼa wù nə̀ wɔɔ a wi a zownu.

⁸N təŋkey, Waa Weynum loʼ Mûkəbii tsuʼ inaʼ.”

⁹Ambə Yeso nuu tsunə n luʼu key, tə n ndòw n Ndaw Kədzəŋi ə ghə̂ a Təjuu.

¹⁰Wù loʼ n loʼ fu nə̀ kpii kə wi kə n tə̀ghə̀ doʼo. Ghə̂ a loʼ ghə n loʼ fu, ghə n kəŋənə jìi ni gaʼ ighəə n tow kə Yeso tə̀ ghə kwu wi. Sey ghə n bəb tə̀ wi nə̀, “Laŋ kə diinu nə̀ a khə ni baŋŋə wù n tsuʼ inaʼ ə?”

¹¹Yeso n beeli ndòw ghə dza nə̀, “Abə wù ghaa u loʼ u khənə njì ə wi, njì ə tii chi bwu nyi tsunə nə kəbùʼ n tsuʼ inaʼ, tə î ndòw shiələ nuulə shiə kɔʼɔ bənu ə, nkee tə i shiələ way ə?

¹²Wù tsəghəshi njì, sey, laŋ kə bəghəmnu nə̀ a i ghəŋə ndzuŋ n tsuʼ inaʼ.”

¹³Sey tə n dza ndòw tə̀ wù wey wɔɔ kə wi kə â təghə doʼonə nə̀, “Naalə shi ndòw wɔɔ kə kə̀.” Wù tii n naalə shi ndòw soʼo. Wɔɔ kə tii kə n daŋŋə taw doʼo dzəŋŋə bə tə̀ a loʼ kə loʼ key.

¹⁴Ghə̂ a tə Falasi ghə n fəd nuu shi ndòw bii, ndòw kaʼ ni saalə nghee tə̀ ghə loʼ ni wey Yeso tii.

¹⁵Ambə Yeso keeli tsunə nə̀ falasi tə bii wi, tə n nuu tsu fu. Nɔɔ kə aghə̂ kə n nuu ndòw soʼo n bàa wi. Tə n baŋŋə ghə̂ ghey ghə a dzaŋanə adzəm.

¹⁶Nghee tə baŋŋə kɔʼnə ghə sey, tə n kee tsəʼlə ndòw kəlaŋ tə̀ ghə nə̀ kə ghə nə dzanə tə̀ ghə̂ a loʼ ghə.

¹⁷Tə â ghəŋə sey ni luulə tsu ghɔɔmə zey Wù tûm Kəzə̀ Ayzaya â dza naŋanə nə̀,

¹⁸“À wən loʼ wù kəfwaʼ wuŋ n sày kɔʼnə, N ngii ləghə wi, fə̀ŋ zuŋ ngii duʼlənu ghi wi. Mə î kuu tsuu zay kuŋ n kow wi, Tə i naʼlə ghəə zey i loʼ tsətsəghə tə̀ ghə̂ ghən ghə way ghə̂ a Təjuu ghə.

¹⁹Tə î bàŋŋə ghɔɔmə way, Tə i buʼlə way bɔŋ mə. Wù nə̂ zow soʼo way dzə̀ ə wi n faabə tə jìi.

²⁰Tə i khəm maʼa way dzaŋ wey u mbvəd doʼonə, Tə i nəm maʼa soʼo way daa key kə nəmmə ndòwnə. Tə i buu doʼo way ni dəm ni koʼ nə̀ ghəə ghey a loʼnə tsətsəghə, a təm zə̂ ghəə ghey a way tsətsəghə.

²¹Sey nə̀, ghə̂ ghən ghə way ghə̂ a Təjuu ghə adzəm loʼ ni khə nə̀ ghə loʼ ibəghəshi n zəd i wi.”

²²Ghə̂ a loʼ ghə n boʼo bə wù loʼ n səə Yeso nə̀ tə n fəb doʼo, ghɔɔmə soʼo way, bòʼ nə̀, zay kə bwu kə â loʼ n kow wi. Yeso n baŋŋə tsu wi, tə n kaʼ dzəŋŋə ndow ni kəm ghɔɔmə, koʼo soʼo təluʼu.

²³Dzuu zə n ngii zum aghə̂ adzəm, ghə n bəbə n wû i ghə nə̀, “À wən sə̀ loʼ Waa Fɔ̀ɔ Devid mɔ?”

²⁴Nghee tə ghə̂ a tə Falasi a kee zow tsunə sey, ghə n dza, “À teeli loʼ Belzebul, tɔŋŋə də̀ŋ kə zay u bwu wə, kə fuunə ghə̂ fən n daʼa kə nə̀ tə i dzum shiə zay u bəbə wə tii.”

²⁵Yeso n khə ghə zey ghə moʼlənə n fə̀ŋ tə ghə, sey, tə n dza tə̀ ghə nə̀, “Naʼ zey i dzawwə doʼonə, təmə baalə tsam n wû u wi, i nə sàʼànu. Naʼ i loʼ i way nkee ndaw i loʼ zə, i bəghəm dzəŋi way n wû i ghə, ghə tsuu bwuu way.

²⁶Abə Satan dzùm shiənə Satan, i sey dii nə̀ tə dzawwə doʼonu n wû u wi. Fɔɔ u wi wə î sə̀ təmi ngee?

²⁷Abə N dzùm shiənə zay u bwu wə n daʼa key Belzebul fuunə tə̀ mə, ghə̂ a ghaa a kee dzùm shiə n daʼa kə ghaa kə? À loʼ ghə, ghə î saʼanə ghaa.

²⁸Abə n dzùm shiənə zay u bwu wə n daʼa kə zày K-a-zə̀, i sey dii nə̀ fɔɔ u Kəzə̀ wə n bə tə̀ ghaa.

²⁹Wù way dzə ni khəm nyi n ndaw wù wey tə khənə daʼa kə, tə ndzəm boʼo nuu fə̂ u wi, nə̀ tə ka wi kwu kow naŋa tsu dzə nə ubaʼ.

³⁰Wù wey tə tey way ghi mə, tə sey zuulə bàalə mə. Wù wey tə gaamə way mə ni bəghə, tə sey saʼa maʼanu.

³¹Sey, n dza bə tə̀ ghaa nə̀, Zə̀ kə î neyzəənu ghəə a bəbə ghey adzəm ghə̂ a ghəŋŋənə nsə a ghey ghə dzanə n kow wi, tə way ni kee neyzəə koʼ wù wey tə tsayyənə Zay kə Zow kə.

³²Wù wey tə dzanə ghəə a bəbə ghə n kow Waa Weynum, ghə i neyzəənu bəb i wi zə, abə wù kee dzanə ghəə a bəbə ghə n kow Zay kə Zow kə, ghə i neyzəə koʼ way bəb i wi zə nya nkee tə̀ mbi nə bə may.”

³³Yeso n dza kpiʼi ndow tə ghə nə̀, “Abə kaʼ fə nyim dzɔbənə, fə məə bə tam u dzuŋu wə, abə fə nyim dzɔbə way, fə məə bə tam u bəbə wə, bòʼ nə̀, a koʼo keeli kə fəkaʼ n ndzoʼo tam wey fə məənə.

³⁴Zuu tə bəbə tə tə̀ a loʼ ghaa! Ghaa loʼ ngee ni khəə ghəə a dzuŋu ghə nə̀ ghaa loʼ ghə̂ a bəbə ghə ə? N təŋkey wù bɔɔmə khəə shiə bə kə ghəə ghey a luu doʼonə n fə̀ŋ ə wi.

³⁵Wù dzuŋu u khəə shiə bə kə ghəə a dzuŋu ghey a nyì doʼonə n fə̀ŋ ə wi. Wù bəbə n khəə shiə bə kə ghəə a bəbə ghey a nyì doʼonə n fə̀ŋ ə wi.

³⁶N dza bə tə̀ ghaa nə̀, n tsuʼ fey Zə̀ kə i saʼanə mbi tii, kay wù î fuu taŋ n ghɔɔmə tə bəbə tey tədzəm tə shi koʼ bə dzənə n dzuu i wi,

³⁷bòʼ nə̀, a loʼ kə n ghɔɔmə tey tə â shi bənə n dzuu zə, ghə i neynə ni saʼ wɔ ni koʼ nə̀ wə khənu chɔd wə nkee wə khə way chɔd wə.”

³⁸Sey ghə̂ a dii a kəlaŋ a loʼ ghə nsə ghə̂ a tə Falasi ghə n dza tə̀ Yeso nə̀, “Wù dii, a ləghə nə̀ wə dii bə ghey n tsəə i loʼ zə.”

³⁹Yeso n kee beeli ndòw ghə nə̀, “Bəbə bəbə tə aghə̂ nsə ghə nəb ityim a num tə tən, ghə bəbə bə tsəə tə̀ mə, mə i tsəm dii way ghaa n tsəə i loʼ zə, a may kə tsəə zey zə â shinə tə̀ wù tûm Kəzə̀ Jona.

⁴⁰N təŋkey, tə̀ Jona â doʼonə n nəghə wə itsəghə nə ntsuʼu ntəghə, Waa Weynum î doʼlə soʼo ntsuʼu ntəghə n fə̀ŋ ə ghəlikətsə.

⁴¹N tsuʼ fey Zə̀ kə î saʼanə mbi tii, ghə̂ a naʼ i Ninive ghə i təmi tiilə bòʼ ghaa, n təŋkey, ghə mâ kwey nuu bə fə̀ŋ tə ghə tə n ghəə a bəbə ghə n nəŋə zey Jona â naʼlənə tûm Kəzə̀ tə̀ ghə. Sey, n fa dza bə tə̀ ghaa nə̀, wù loʼ loʼnu fa nya tə tsəghəshinə Jona.

⁴²N tsuʼ fey Zə̀ kə î saʼanə mbi tii, Naʼtum ə naʼ i Sheba î təmi tiilə bòʼ ghaa, n təŋkey, tə â nuu nay bə n naʼ i wi ni bə zəllə tɔb u Solomun tə â loʼnə də̀ŋ kə, wù loʼ u loʼnə fa tə tsəghəshinə Solomun, ghaa u way ni zow tə̀ wi.”

⁴³Yeso n dza nə̀, “Abə zay kə bwu kə nuu shi tsunə n kow wù, kə n bwey ngəə tsəghə ndòw luʼu tə zummə tə, kə kəŋənə luʼu kə zayyə kə. Abə kə kee kəŋ kìi tsunə luʼu kə zayyə kə,

⁴⁴kə n dza tsu n wû u wi nə̀, ‘N ndòw dzəŋŋənu n ndaw zuŋ zey n mə nuu shi bənə tii.’ Sey, abə tə dzəŋŋə bə koʼ bə ndaw tii i zum zə nə̀ ghə n zəd, bayyə naŋa tsu.

⁴⁵Tə n daŋŋə nuu dzəŋŋə ndòw, ndòw ney bə zay u bəbə u loʼ wə usəghəmbəghə, u bəb tsəghəshinə wi, ghə n bə muu nyi bə fu. Ghəə a wù tii ghə n kəm bəb tsəghəshi tsu nghee a mə loʼnə tii sə̂ i sə. À wən loʼ nghee zə î doʼlənə tii ghi ghə̂ a bəbə ghən n num tə tən.”

⁴⁶Nghee tə̀ Yeso nam ghɔɔmənə ghi ghə̂ ghey, nay wi ghi waazə a wi ghə n bə təmi tsu bii, kəŋə jìi ni ghɔɔmə ghi wi.

⁴⁷Wù loʼ fu tii n dza ndòw tə̀ wi nə̀, “Này wə ghi waazə ghə a tey bii, ghə ləghə ni ghɔɔmə ghi wɔ.”

⁴⁸Yeso n beeli ndòw wi nə̀, “Này wuŋ loʼ ndee? Waazə ghuŋ a loʼ ghə ndee?”

⁴⁹Ambə tə bəb tsunə sey, tə n daŋŋə sɔʼ dii ndòw dzûmə tə wi dza nə̀, “À wey loʼ này wuŋ nsə waazə ghuŋ ghə.

⁵⁰Wù wey tə ghəŋŋənə ghəə ghey Bày wuŋ idəŋ ləghənə, tə sey loʼ waazə wuŋ u num wə, waazə wuŋ u zən wə nsə này wuŋ.”