Read Weh Matyo 13 Bible Online

Matyo 13 - Weh bible

Matyo 13

¹N tsuʼ fə tii fə kələ, Yeso n nuu shi tsu n ndaw, ndòw n nguŋ inyi. Tə n ndòw doʼo tsu, zey ndòw ni dii aghə̂ n ghəə ghə.

²Nɔɔ kə aghə̂ kə n zuʼu n səə wi, sey tə n nyi doʼo tsu nə kəfən. Nɔɔ kə aghə̂ kə n tey n nguŋ ə inyi.

³Yeso n dii ghə n ndəmə tə aghəə tə n ghɔɔmə i fənkəfən, dza nə̀, “Wù usum u loʼ wə â ndòw ni ndòw təm təndzoʼ.

⁴Nghee tə̀ tə təmə ndownə, ndzoʼ tə loʼ tə n tsɔʼlə ndòw nə təmbwu, nnən mə n bə kumi fə nuu kɔʼ.

⁵Ndzoʼ tə loʼ tə n tsɔʼlə bə n luʼu kə atay nə zub tə basə way tii, tə n luumə fòw i kɔʼ, n təŋkey, zub tə â basə way fu.

⁶Ambə tsə̀ shi kɔʼ bənə, zə n zuʼ maʼa kɔʼ. Nghee tə̀ zub tə â basə way fu n luʼu kə atay kə tii kə tə̀ ghaŋ tə ni nyi tsu tii, key a tii ghə zum nuu kɔʼ.

⁷Ndzoʼ tə loʼ tə n tsɔʼlə bə n luʼu tə udzɔŋɔmgbay, ambə tə nyim kɔʼnə, dzɔŋɔmgbaay wə n nyim zɔʼi maʼa kɔʼ.

⁸Ndzoʼ tə loʼ tə n kee tsɔʼlə bə n zub tə dzuŋu tə, tə n nyim, bɔŋ dzɔb kɔʼ. Buʼ a loʼ ghə n fuu asə̂ fəbɔm, a loʼ ghə nghəm ntuubə, a loʼ ghə nghəm ntəghə.”

⁹Yeso n guŋ kɔʼ dza, “Wù wey tə khənə tuŋŋə wə, tə zow.”

¹⁰Dzûmə tə Yeso tə n bə bəb bə tə̀ wi nə̀, “À loʼ kee wə ghɔɔmənə tə̀ ghə̂ ghə n ghɔɔmə i fənkəfən ə?”

¹¹Yeso n beeli ndòw ghə dza nə̀, “Ghə n fu naŋa sad i ghəə a fɔ̀ɔ wə idəŋ wə tə̀ ghaa, a way dzə tə̀ ghə.

¹²N təŋkey, wù wey tə ndəŋ khənə fə kə, Zə̀ kə î fuu kpiʼinu wi, tə i keeli tsəghə tsu. Abə tə wey tə kee khə kìi way fə̂ kə, kasə nyaŋi fey tə khənə, ghə i ney nuulə daŋŋənu.

¹³Zuŋ kə ighəə key n ghɔɔmənə tə̀ ghə n ghɔɔmə i fənkəfən loʼ nə̀, ghə i mgbaŋa laalə bə kə sa, ghə i koʼo keeli way, nsə nə ghə i mgbaŋa zəllə bə kə sa, zow way, zowkeeli soʼo way.

¹⁴Ghəə a tii a luulə tsu ghəə ghey wù tûm Kəzə̀ Ayzaya â dza naŋa zeynə nə̀, ‘Ghə nə mgbaŋa zəllə kə sa, ghə nə kee zowkeeli way, Ghə nə mgbaŋa laalə kə sa, ghə nə kee koʼo keeli way.

¹⁵N təŋkey, ghə̂ ghən n fə̀ŋsə doʼo n fə̀ŋ tə ghə tə n ghəə zən, Ghə a fii naŋa kɔʼ tuŋŋə u ghə wə, Ghə a kəmə naŋa tsu sə̂ a ghə ghə, A may kə nə ghə nə koʼ tɔb kə n sə̂ a ghə, Ghə zow soʼo n tuŋŋə u ghə, Ghə khə̂mə təmi bə n səə mə, N baŋŋə ghə.’”

¹⁶“Ghaa kee loʼ kədzuŋ nghee ghaa khə sə̂ ghə, koʼo tii, khə utuŋŋə, zow tii.

¹⁷N kuum dza bə tə̀ ghaa nə̀, ndəmə tûm tə Kəzə̀ nsə ghə̂ ghey ghə loʼ tsətsəghə mâ dəm ni koʼ ghəə ghey ghaa koʼo, dəm kìi, dəm soʼo ni zow ghəə ghey ghaa zow, dəm kìi.”

¹⁸Yeso n dza kpiʼi ndow tə ghə nə̀, “Zow na ghəə zey ghɔɔmə i fənkəfən zən kuum wù usum diinə.

¹⁹Ghə̂ ghey ghə zownə ghɔɔmə i fɔɔ u Kəzə̀ wə, ka zowkeeli, vəətsəə ghə n bə bəkeeli nuu kɔʼ ghəə ghey ghə zəllə naŋa n fə̀ŋ tə ghə. Ghə sey loʼ tə a loʼ ndzoʼ tey tə â tsɔʼlənə nə təmbwu.

²⁰Abə tə tey tə â tsɔʼlənə n kaŋŋə mə atay, à loʼ ghə̂ ghey ghə zow tsu ghɔɔmə i tii zə, ghə n kpii ney nə iduʼlə,

²¹ghə n ka ngii taw tii, ghə n dzə kòw tsu kə fə̀ŋ fənyaŋi, ambə ghəə a dza i bə taw tsu kə n kow ghə, nkee ghə chɔdlɔnə ghə bòʼ ghəə zey ghə bəghəm, ghə n kəm ghaʼi tyi zəghə i tsu.

²²Abə tə tey tə â tsɔʼlənə n fəŋŋə kə udzɔŋɔmgbay, a loʼ ghə̂ ghey ghə zow tsuu ghɔɔmə i tii zə, nghee ghə kee gaʼ fə̀ŋ tə n fə̂ u mbi, nsə nə ikum, wə n kwu zɔʼlə naŋa tsu ghɔɔmə i tii zə, zə n ka mə̂ utam.

²³Abə tə tey tə â tsɔʼlənə n zub tə dzuŋu tə, a loʼ ghə̂ ghey ghə zow tsuu ghɔɔmə i tii zə, ghə n ndzəm zowkeeli i tsu, ghə a nyim bɔŋ dzɔb tsu buʼ a dzuŋu ghə, buʼ a loʼ ghə n fuu kɔʼɔ asə̂ fəbɔm, a loʼ ghə n fuu kɔʼ asə̂ nghəm ntuubə, a loʼ ghə nghəm ntəghə.”

²⁴Yeso n kəm fu kpiʼi ndow ghɔɔmə i fənkəfən zən tə ghə nə̀, “Fɔɔ wə idəŋ u loʼ tə a loʼ wù loʼ tə â zəghə tsu ndzoʼ i dzuŋu zə n sum u wi,

²⁵ambə n tsuʼu tə nə̀ ghə̂ a bweelinu, wù təngəmə ə wi n bə zəghə tsu uzhìi n səb a tii ghə, nuu ndow i wi zə.

²⁶Nghee səb a tii a nyim kɔʼ, kaʼ ndow ni bɔŋ, zhìi wey wə n daŋŋə dii shi kɔʼ soʼo uwû.

²⁷Ghə̂ a kəfwaʼ a mûkəbii wey n bə bəb tə̀ wi nə̀, ‘Mûkəbii, n dza wə â mgbaŋ zəghə ndzoʼ tə dzuŋu tə n sum wə ə? Zhìi u sə nuu bə ghee tii ə?’

²⁸Tə n beeli ndow ghə nə̀, ‘A zhìi wən zəghə kə wù təngəmə wuŋ.’ Ghə̂ a kəfwaʼ ghey n bəb tə̀ wi nə̀, ‘Wə ləghənu nə̀ ghey ndow suulə maʼa zhìi u tii wə?’

²⁹Tə n fəd dza tə ghə nə̀, ‘Ngaŋ, i kə ghaa i ndow zə̀ suulə maʼa daŋŋə tsə mə n səb ghə.

³⁰Zəghə ghə dzəŋi nyim ndow kənu, a nə loʼ kə n nəŋə i kpey zə, n nə dzanə tə̀ ghə̂ a kpey ghə nə̀ ghə buʼ suulə kow naŋa kɔʼ dzə zhìi u tii wə nə ukaʼ ni kpəghə maʼa, ghə daŋŋə kpèy kɔʼ asəb, ghə bə fən kɔʼlə naŋa kɔʼ nə utaa.’”

³¹[7] Yeso n kəm ghɔɔmə kpiʼi ndow tə̀ ghə n ghɔɔmə i fənkəfən nə̀, “Fɔɔ wə idəŋ u loʼ tə a loʼ sam i Mɔstad wù loʼ â ney zəghə tsu n sum u wi.

³²I təb tsəghəshi təsam tədzəm, abə i kee nyim kɔʼ, fə n nyim dow tsu nə fəkaʼ, kaʼ fə tii fə n nyim zaamə tsəghə tsu fə wey ghə zəghə tsu udzəm fu nə usum, n jìi zey nnən mən n zəʼlənə idəŋ, loʼ ni bə bəghə ndaw tə ghə n kpìi tə tii tə.”

³³Yeso n nam dza kpiʼi ndow ghə n ghɔɔmə i fənkəfən zən nə̀, “Fɔɔ wə idəŋ u loʼ nyaŋi fə mbvuŋ, weyzən u loʼ wə â ney kɔʼnə, nyuʼ dzəŋi kɔʼ ghi kaŋ wə nfuŋ wə utəghə, zə n nyə̀ŋ dzəŋi ndow tii, fuŋ n tii mə ndzəm mə n kɔʼ i kɔʼ.”

³⁴Ghəə ghən adzəm Yeso â ghɔɔmənə tə̀ nɔɔ wə aghə̂ wey, tə â teeli khəə kə n ghɔɔmə i fənkəfən. Tə â ka tsəm khəə kìi ghəə zə nə̀ tə ka khəə n ghɔɔmə i fənkəfən.

³⁵À wən â loʼ ni luulə ghəə ghey tûm tə Kəzə̀ tə â dza naŋanə nə̀, “N nə ghəə ghə tə̀ ghə khəə kə n ghɔɔmə i fənkəfən N nə dza ndow ghə n ghəə ghə Nə ghə ka kam zow koʼ tsə tə̀ mbi â nə kaʼnə.”

³⁶Yeso n daŋŋə zə̀ghə̀ tsu nɔɔ kə aghə̂ key, nuu nyi ndow n ndaw. Ngəd tə wi tə n dzûmə nyi ndow wi, dza tə̀ wi nə̀, “Tiilə dza bə ghey n ghɔɔmə i fənkəfən zey kuum zhìi wey nə usum.”

³⁷Yeso n beeli kɔʼ nə̀, “Wù wey tə zəghə ndzoʼ i dzuŋu zey loʼ Waa wù sɔŋtsuʼ.”

³⁸Sum u tii u loʼ mbi, ndzoʼ i dzuŋu zey sey loʼ ghə̂ ghey ghə loʼ n fɔɔ u Kəzə̀, zhìi wən loʼ ghə̂ ghey ghə loʼ n fɔ̀ɔ u Satan.

³⁹Wù təngəmə wey tə â zəghə zhìi wey loʼ Satan, nəŋə i kpey zə ufə i loʼ tə̀ mbi nə bə maynə, ghə̂ a kpey a loʼ tsətəndəghə tə Kəzə̀.

⁴⁰Nghee tə̀ ghə zuŋŋə bə zhìi wə ghə n kpəghə maʼa kɔʼ nə uvəllə, a loʼ soʼo ighələ ghə nə zuŋŋə bə ghə̂ a bəbə ghə, ghə kpəghə ghə abə mbi nə may.

⁴¹Waa wù sɔŋtsuʼ nə tûm bə tsətəndəghə tə Kəzə̀ tə wi, ghə nə bə say nuu shi bə ghə̂ ghey ghə ghəŋŋə nə̀ ghə̂ ghə i naŋŋə way laŋ u wi wə nsə ghə̂ ghey ghə ghəŋŋə ghəə a bəbə ghə n fɔ̀ɔ u wi,

⁴²ghə maʼa ndow ghə n buʼ kə uvəllə key kə numnə tə a loʼ vəllə u kənam. Ghə̂ a nə dey fu, fəə asɔŋ.

⁴³Ghə̂ ghey ghə loʼ tsətsəghə nə kee nyiəllə kə tə a loʼ inyi n fɔ̀ɔ u Bày ghə. Nə wə khə utuŋŋə, wə zow.

⁴⁴Yeso n dza kpiʼi ndow ghɔɔmə i fənkəfən tə̀ ghə nə̀, “Fɔɔ wə idəŋ u loʼ tə a loʼ fə̂ kə wən i taw kə, kə nyi doʼonə nə usum, wù loʼ â kəŋ koʼ tsu, kəm tsəd nyì naŋa tsu. Tə n daŋŋə nuu tsu nə iduʼlə, ndow kûmmə fìi tsu fəghə n wi n dzəm, ni ndow zuu bəghə zey tii.”

⁴⁵“Fɔɔ wə idəŋ u kəm loʼ kpiʼi soʼo tə a loʼ wù bikiwən tə kəŋənə sə̂ akhəm a dzuŋu ghə,

⁴⁶tə u kəŋ koʼ tsu sə̂ i khəm zə imɔʼ nə̀ wən i tii i ngii tawnu, daŋŋə ndow kûmmə fìi tsu fəghə n wi n dzəm, ney zuu kɔʼ sə̂ i khəm i tii zə tii.”

⁴⁷Yeso n dza kpiʼi ndow ghɔɔmə i fənkəfən zən tə̀ ghə nə̀, “Fɔɔ wə idəŋ u kəm loʼ kpiʼi soʼo tə a loʼ uwûu, ghə̂ a kwɔɔ a tətsəghə ghə â maʼa nyi tsu ndow nə inyi, kwu kɔʼ lii tə tətsəghə tey tə nyinə tii nə uwuu tədzəm.

⁴⁸Nghee wûu u tii u luu kɔʼ, ghə n shiələ kɔʼ bə n nguŋ ə inyi, doʼo tsu, sày kɔʼ tə dzuŋu tey, kuu kɔʼ nə kəkaŋ, kee feeli maʼa ndow tə tey tə â khə way fwaʼ kə n wɔ ghə.

⁴⁹Zə i bɔɔmə doʼlə soʼo sa bə mbi nə may. Tsətəndəghə tə Kəzə̀ tə nə shiə bənu, tə sày nuu shi bə ghə̂ a bəbə ghə n fəŋŋə kə ghə̂ ghey ghə loʼnə tsətsəghə,

⁵⁰ghə maʼa ndow ghə n buʼ kə vəllə u kənam, ghə nə deyyə fu, fəə asɔŋ fu tii.”

⁵¹Yeso n bəb tə̀ ngəd tə wi tə nə̀, “Ghaa n zowkeeli ghəə ghən ə?” Ghə n mə i bəghəm nə̀, “Ow.”

⁵²Tə n daŋŋə dza ndow tə ghə nə̀, “A sey loʼ nə̀, wù dii u kəlaŋ wey ghə dii tsunə wi nə̀ tə doʼo dzûmə n fɔ̀ɔ wə idəŋ wə, loʼ tə a loʼ mûkəbii wən tə ney shiə bənə n taw u wi, fə u wey wə nsə u fəghə wə.”

⁵³Ambə Yeso khəə may tsu ghɔɔmə tə fənkəfən tə, tə n zə̀ghə̀ tsu luʼu key.

⁵⁴Nghee tə fən nyi bənə n naʼ i wi, tə n dii aghə̂ n ndaw kədzəŋi ə ghə̂ a Təjuu n jìi zey dzuu zə â ngii zumnə ghə fu, ghə n bəbə nə̀, “Tow wən faalə kə utɔb kən boʼo ney bə ghee, nsə kɔb tə aghəə tən ə?

⁵⁵À wən way waa Kamenda wən ə? Zə mgbaŋ way Maliya a? Waazə a wi a mgbaŋ way Jems, Yosef, Shimun nsə Judas ə?

⁵⁶Waazə a wi a zən ghə adzəm mgbaŋ way kə fa ghi saa a? Tə ghəə ghən adzəm kee ney bə ghee?”

⁵⁷Fə̀ŋ tə sey daŋŋə bəbnu ghə n kow wi, ghə n ka ney wi tə a loʼ kəfə, tuu maʼa wi. Yeso n kee dza tə̀ ghə nə̀, “Ghə ngɔɔmənu wù tûm Kəzə̀ nə tənaʼa tədzəm, a may kə n naʼ i wi nsə n sali ndaw i wi ghə ngɔɔmə way wi.”

⁵⁸Tə n ka ngii dii ghəə a faalə ghə fu, nghee ghə â khə way bəghəm fə̀ŋ zə n ghəə a wi.