Read Weh Matyo 20 Bible Online

Matyo 20 - Weh bible

Matyo 20

¹Yeso n dza tə ghə nə̀, “Fɔɔ wə idəŋ u loʼ tə̀ a loʼ Muu usum u loʼ wə tə â bəd key kɔʼnə tsuʼ wə, shi ndòw ni ndòw kəŋ aghə̂ nə̀ ghə bə fwaʼ n sum u wi.

²Tə n bəghəm naŋa kɔʼ ghi ghə nə̀ tə i fuu ghə n fə key ghə tsəənə fwaʼ kə tii nə fətsuʼ, daŋŋə tûm ndòw ghə n sum u wi nə̀ ghə ndòw fwaʼ.

³Ambə nə tənəŋə tətaandzuu n bələbələ tə, tə n ndòw koʼ tsu ghə̂ a loʼ ghə, ghə maŋ teynə n bikiwən, fwaʼa way fə kə loʼ kə,

⁴tə n dza tə̀ ghə nə̀, ‘Ndòw fwaʼa na n sum wuŋ, mə i tsəə ghaa n fə key kə kpiinə ni tsə n fwaʼ key ghaa i fwaʼanə.’

⁵Sey ghə n nuu i ndòw, ndòw fwaʼ n sum u wi. Tə n kəm shi ndòw n fə̀ŋ ə tsə̀, nsə nə̀ tənəŋə tətəghə n tsə̀ tə, ghəŋə ndòw kə ghə i mɔʼɔ zə.

⁶Ambə nə tənəŋə tətaa n nəŋə i fənə zə, tə n kəm shi kpiʼi ndòw, koʼ tsu ghə̂ a loʼ ghə ghə maŋ tsəm tey. Tə n bəb tə̀ ghə nə̀, ‘À loʼ kee ghaa maŋa bəəbənə nəŋə zə fa, fwaʼa way fə kə loʼ kə ə?’

⁷Ghə n beeli ndòw wi nə̀, ‘Wù loʼ ka ghey ney dzə nə̀ kəfwaʼ.’ Tə n dza tə̀ ghə nə̀, ‘Ndòw fwaʼa soʼo na n sum wuŋ.’”

⁸“Ambə nəŋə i fənə i kpii tsunə, muu usum n dza tə̀ wù wey tə laalənə fwaʼ kə nə̀, ‘Tɔŋɔ tsu ghə̂ a kəfwaʼ ghə, wə tsə ghə. Zey tsu n kow ghə̂ ghey ghə mə bə guŋŋənə, wə ndòw kuum n kow ghə̂ ghey ghə mə bənə isə.’

⁹Ghə̂ ghey ghə mə bənə fwaʼ kə nə tənəŋə tətaa n nəŋə i fənə zə n bə ney khə̀ə u ghə tə̀ ghə tsəənə fwaʼ kə nə fətsuʼ.

¹⁰Ambə a ghey ghə mə kaʼnə fwaʼ kə isə ndòw bənə, ghə n moʼlə kə nə̀ ghə î tsəə tsəghəshiənu ghə. Ghə n fəd tsə soʼo ghə ighələ ghi ghə̂ a loʼ ghey.

¹¹Ambə ghə ney kɔʼ khə̀ə u ghə wə, ghə n kaʼ ndòw ni sənnə ghɔɔmə bòʼ muu usum wey, dza nə̀,

¹²‘Ghə̂ ghey ghə mə bə guŋŋənə, mə fwaʼ kə nəŋə zə izow imɔʼ, wə u kee tsənə ghə ighələ ghi ghey, loʼ sey nə̀ a fwaʼ ghey tsuʼ fə zəŋi fə, tsə̀ u zuʼ zeeli soʼonə ghey.’

¹³Muu usum wey n beeli ndòw wù ghə umɔʼ dza nə̀, ‘N fə̂, n ka wɔ tsìi dzə. N dza a mə bəghəm naŋa dzəŋi nə̀ mə i tsəə wɔ n fə key ghə tsəənə fwaʼ kə tii nə fətsuʼ ə?

¹⁴Ney khəə wə wə̀, wə̀ ndòw nuu. À ləghə tsu mə ni fuu tə̀ wù wey tə mə bə guŋŋənə fwaʼ kə ighələ tə̀ n fuunə tə̀ ghaa.

¹⁵N kəm khə soʼo way daʼa kə ni ghəŋə ghəə zey n ləghənə ni ghəŋə n khəə wuŋ ə? Nkee wə khə kəghoʼ nghee n khənə wɔɔ kə buu kə ni fuu tə̀ ghə̂ ghə ə?’”

¹⁶Sey, Yeso n guŋ kɔʼ nə̀, “Wù wey tə bə guŋŋənə î doʼlə wù kəsə̂, wù wey tə bənə sə kə i bə doʼlə wù ibam.”

¹⁷Nghee tə̀ Yeso kɔʼɔ ndòwnə n Yerosalem, tə n ney kɔʼ ngəd tə wi tey ighəm n ghii tə təbəghə, səŋ təmi ndòw ghi ghə, dza tə̀ ghə nə̀,

¹⁸“Saa sa kɔʼɔ ndòw n Yerosalem, ghə i fìi fuu ndòw Waa Weynum tə̀ ghə fɔɔngili a nii ghə nsə ghə̂ a dii a Kəlaŋ ghə. Ghə i tsəʼlə tsu saʼ nə̀ ghə wey wi.

¹⁹Ghə i ney fuu tsəʼlə ndòw wi tə̀ ghə̂ ghey ghə bəghəm way tə̀ Zə̀ kə, ghə i tsoʼ wi, ghə lənnə wi, ghə bwɔd, ghə baa wi n zat kə fəkaʼ. A i bə nə ntsuʼ ntəghə, Zə̀ kə i zhəm dzəŋŋə bə wi nə ivə.”

²⁰Sey, này waa a Zebedi n ndòw bə n səə Yeso ghi waa a wi ghey abəghə, təm ndòw tənguʼ n tənə wi, nɔɔ ndòw wi n ghə i loʼ zə.

²¹Yeso n bəb ndòw tə̀ wi nə̀, “Wə̀ ləghə nə̀ n ji ngee tə̀ wɔ ə?” Tə n dza tə wi nə̀, “N ləghə nə̀ wə tsəʼlə tsu kəlaŋ nə̀ abə wə i loʼnə n fɔ̀ɔ wə, waa ghuŋ ghən abəghə ghə i doʼ n səə wɔ, umɔʼ n kpii kə kə̀ təmə kə, umɔʼ n kpii kə kə̀ kwɔɔ kə.”

²²Yeso n fəd dza tə̀ ghə nə̀, “Ghaa khə way fə key ghaa bəbənə. Ghaa î loʼnu ni koʼ ndzoʼo chɔd wən mə i koʼonə ə?” Ghə n dza tə̀ wi nə̀, “Ow, ghey î loʼnu.”

²³Yeso n dza ndòw tə̀ ghə nə̀, “N khənu nə̀ ghaa i ndzəm loʼnu ni fəghə, abə ni doʼo n kpii kuŋ kə təmə kə nkee n kpii kuŋ kə̀ kwɔɔ kə, luʼu tə tii tə loʼ tə̀ ghə̂ ghey Bày wuŋ bayyə naŋanə tə̀ ghə.”

²⁴Ambə ngəd tə wi tə loʼ tey ighəm zow tsunə sey, ghə n fəələ ndòw unəghə ghi waazə ghey abəghə.

²⁵Yeso n tɔŋɔ naŋa bə ghə adzəm, dza tə̀ ghə nə̀, “Ghaa khənu nə̀, ghə̂ ghey ghə loʼnə ghə̂ a nii ghə n naʼa tə ghə̂ ghey ghə bəghəm way tə̀ Zə̀ kə, ghə saʼa aghə̂ nə kədaʼa, sey, ghə̂ ghey ghə loʼnə tow wə, ləghə nə̀ ghə̂ ghə i fwaʼa bə tə̀ ghə.

²⁶I kə̂ i nə̂ doʼlənə sey ghi ghaa, wù wey tə ləghənə ni doʼo wù nii n fəŋŋə kə ghaa sey khə ni loʼ tə̀ a loʼ wù kəfwaʼ tə̀ ghaa adzəm,

²⁷wù wey tə ləghənə ni doʼo kəsə̂ n fəŋŋə kə ghaa khə ni loʼ tə̀ a loʼ kəkɔd tə̀ ghə̂ ghə adzəm.

²⁸Ighələ tə̀ Waa Weynum â ka bə dzə̀ fa n mbi nə̀ ghə̂ a fwaʼ tə̀ wi, tə â bə ni fwaʼ tə ghə̂ ghə nsə ni fuu muu i wi ni kùm shi tow u ndəmə aghə̂.”

²⁹Nghee tə̀ Yeso ghi ngəd tə wi tə nuu shiə ndòwnə n naʼ i Jeriko, nɔɔ kə aghə̂ kə n dzûmə ndòw ghə.

³⁰Ghə̂ a fəbə a loʼ ghə abəghə n doʼ n khəə u jìi. Ambə ghə zow tsunə nə̀ Yeso nya tsəghənu, ghə n buʼ shi bə bɔŋ kə idey dza nə̀, “Mûkəbii, Waa Devid, kwɔɔlə sî zə n kow ghey!”

³¹Nɔɔ kə aghə̂ key n kii naŋa ndòw ghə, dza nə̀ ghə doʼo mɔŋ. Ghə n fəd baa dey nay shi kɔʼ idəŋ dza nə̀, “Mûkəbii, Waa Devid, kwɔɔlə sî zə n kow ghey.”

³²Yeso n təmi tsu, tɔŋɔ bə ghə, bəb tə̀ ghə nə̀, “Ghaa ləghə nə̀ n ji ngee n wɔ ghaa a?”

³³Ghə n dza tə̀ wi nə̀, “Mûkəbii, ghey ləghə nə̀ wə ghəŋə tə̀ ghey i koʼo luʼu tə.”

³⁴Yeso n kwɔɔlə isî n kow ghə, mɔm tsu sə̂ a ghə, ghə n daŋŋə kaʼ ni koʼ təluʼu n nəŋə i tii zə. Sey, ghə n nuu dzûmə ndòw wi.