Read Weh Matyo 23 Bible Online

Matyo 23 - Weh bible

Matyo 23

¹Sey Yeso n ghɔɔmə ndòw tə̀ nɔɔ kə aghə̂ key nsə ngəd tə wi tə, dza nə̀,

²“Ghə̂ a dii a kəlaŋ ghə nsə ghə̂ a tə Falasi a loʼ ghə̂ ghey ghə khənə daʼa kə ni tiilə dza ghəə zey i tɔ̀ɔ doʼonə n laŋ u Mushi.

³Sey ghaa khə ni teeli zow ghəə ghey ghə dzanə tə̀ ghaa, dzûmə kɔʼɔ ndòw. I kə̂ ghaa nə kee fòʼlənə ghəə ghey ghə ghəŋŋənə, n təŋkey, ghə ghəŋŋə dzə way ghəə ghey ghə diinə.

⁴Ghə ney kow naŋŋə ndòw fə u dədlə wə n kow ghə̂ ghə nə̀ ghə boʼo, nə̀ à loʼ sey ghə way ni buʼ gaʼ kəwɔɔ ni gaamə ghə ni boʼo.

⁵Ghə ghəŋŋə ghəə a ghə adzəm nə̀ ghə̂ ghə i tɔʼɔ koʼo bə. Koʼo nghee ghə ghəŋŋə mbəghə n ghə mey ghə kow naŋa n tow u ghə nə̀ n khə kəm u ghɔɔmə i Kəzə̀ nə̀ mə i ngii dow! Koʼo soʼo nghee ghə ghəŋŋənə baʼ u təndzə wey u zənnə tii nə̀ wə i ngii daabə!

⁶Ghə ləghə ni doʼlə n luʼu tə nii tə n luʼu tey zə̂ u loʼnə tii nsə n Ndaw kədzəŋi ə ghə̂ a Təjuu.

⁷Ghə ləghə soʼo nə̀ ghə̂ ghə i tɔŋŋə zow bə ghə nə ingɔɔmə n bikiwən, nə̀ ghə i tɔŋŋə ghə nə̀ a loʼ, ‘Wù dii wə’.

⁸Kə wù ghaa u loʼ u nə kee bəghəmnə nə̀ ghə tɔŋɔ wi nə̀ a loʼ, ‘Wù dii’, n təŋkey, ghaa loʼ awaazə, ghaa khə kə wù dii umɔʼ.

⁹Kə̂ ghaa nə tɔŋŋənə wù loʼ fa n mbi nə̀ a loʼ, ‘Bày’, n təŋkey, ghaa khə kə bày umɔʼ tə loʼ idəŋ.

¹⁰Kə̂ ghaa nə̂ tɔŋŋənə wù loʼ nə̀ a loʼ ‘Mûkəbii’ bòʼ nə̀, ghaa khə kə wù umɔʼ tə loʼnə Mûkəbii ə ghaa tɔŋŋə Klisto.

¹¹Wù wey tə loʼnə tow kə n fəŋŋə kə ghaa khə ni loʼ tə̀ a loʼ wù kəfwaʼ tə ghaa.

¹²Abə wù ney kɔʼlə naŋa kɔʼnə wû u wi wə, Zə̀ kə i tsuulə tsu wi. Abə wù tsuulə tsunə wû u wi wə, Zə̀ kə i kɔʼlə naŋa kɔʼ wi.”

¹³Yeso n dza tə ghə nə̀, “Ngoʼ î loʼ tə̀ ghaa, ghə̂ a dii a kəlaŋ ghə nsə ghə̂ a tə Falasi ghə, n təŋkey, ghaa loʼ ghə nəb ityim. Ghaa fii naŋŋə fuʼ u ndaw u fɔɔ wə idəŋ wə nə̀ kə̂ ghə̂ a nə̂ nyiənə tii, wû u ghaa, ghaa u nyiə soʼo way tii, ghaa u ləghə way nə̀ ghə̂ a loʼ a nyi.

¹⁴[Ngoʼ î loʼ tə̀ ghaa, ghə̂ a dii a kəlaŋ ghə nsə ghə̂ a tə Falasi ghə, n təŋkey, ghaa loʼ ghə nəb ityim. Ghaa tsii ghey a kpusə, nəəbə zə̂ə fə̂ u ghə. Gɔŋŋə daabə tə̀ ghə̂ a koʼ tsu nə̀ ghaa khənu ni gɔŋŋə. Ngoʼo ghaa î tsəghəshiə i ghə̂ a loʼ ghey.][15]

¹⁵Ngoʼ î loʼ tə̀ ghaa, ghə̂ a dii a kəlaŋ ghə nsə ghə̂ a tə Falasi ghə təŋkey, ghaa loʼ ghə nəb ityim. Ghaa daŋa kɔʼɔ tədzuu nsə naʼa tə ni ndòw kweyyə kɔʼ wù umɔʼ nə̀ tə bəghəm tə̀ Zə̀ kə. Ambə tə bəghəm kɔʼnə tə̀ Zə̀ kə, ghaa n kəm ghəŋə tsu wi, tə n fəd kpii ni ndow n luʼu key ghə chɔdlɔnə ghə̂ ghə a tii tsəghəshi wû i ghaa.

¹⁶Ngoʼ loʼ tə̀ ghaa, ghaa loʼ ghə̂ a fəbə ghən ghə tali ndòwnə ghə̂ ghə. Ghaa dii aghəə tə̀ ghə̂ ghə nə̀, ‘Abə wù kàanə ghəə ghə, sɔʼɔ ndow ndaw Kəzə̀ i nii zə n Yerosalem, tə sey kaa kənunu, abə wù kee kàanə sɔʼɔ ndow tsâa zə ishɔ̀lɔ̀ zey i loʼnə n Ndaw Kəzə̀ i nii zə n Yerosalem, kâa i tii i kwɔɔnu.’

¹⁷Ghə̂ a fəbə a laʼlə ghən, a tsəghəshi fə̂ kə ghaa kə? Shɔlɔ zey nkee Ndaw Kəzə̀ zey i ghəŋŋənə nə̀ shɔlɔ i tii zə i zow ə?

¹⁸Ghaa dza soʼo nə̀, ‘Abə wù kàanə sɔʼɔ ndow tsə zey ghə fəələnə maʼlə wə tii, i loʼ kənunu, abə wù kee kâanə̀, sɔʼɔ ndow n naamə key kə loʼnə n tsə zey ghə fəələnə maʼlə wə tii, kâa i tii i kwɔɔnu.’

¹⁹Ghə̂ a fəbə ghən, a tsəghəshi fə kə ghaa kə ə? Naamə key nkee tsə zey ghə fəələnə maʼlə wə tii i ghəŋŋənə nə̀ naamə kə tii kə i zow ə?

²⁰I sey dii nə̀, abə wù kâanə̀, sɔʼɔ ndow tsə zey ghə fəələnə maʼlə wə tii, tə sey kâa soʼo n fə wey u loʼnə n tsə zey ghə fəələnə maʼlə wə tii.

²¹Abə wù kâanə̀, sɔʼɔ ndow Ndaw Kəzə̀, tə sey kâa soʼo n Zə̀ key kə muunə fu.

²²Abə wù kâanə̀, sɔʼɔ kɔʼɔ ndòw n bikighow, tə sey kâa n ndaŋ a Kəzə̀ nsə Zə̀ key kə doʼnə tii.

²³Ngoʼ loʼ tə̀ ghaa, ghə̂ a dii a kəlaŋ ghə nsə ghə̂ a tə Falasi ghə, n təŋkey, ghaa loʼ ghə nəb ityim. Ghaa dzawwə tsu fə̂ u ghaa udzəm nə nbadla ighəm, fuu ndòw fəbadla fəmɔʼ tə̀ Zə̀ kə, kasə n tow u fə̂ u ləmmə dzɔbə wən ghə tɔŋŋənə nə̀ a loʼ mint, dill nsə kumin. Ghaa u kee naŋŋə way laŋ u Kəzə̀ wən u loʼnə sə kə, tɔŋŋə, ni saʼa ghəə ghə tsətsəghə, ni kwɔɔlə isî n kow aghə̂, nsə ni khə bəghəm i fə̀ŋ zə. Ghaa mə khə ni ghəŋŋə ghəə ghən adzəm, naŋa səə way i loʼ zə.

²⁴Ghaa loʼ ghə̂ a fəbə ghey ghə talinə ghə̂ ghə. Ghaa loʼ tə̀ ghaa zey maʼlə shiə bə fəzuzuʼu nə nlə, kee məə nyiə tsu ndòw kəkhinyam.

²⁵Ngoʼ î loʼ tə̀ ghaa, ghə̂ a dii a kəlaŋ ghə nsə ghə̂ a tə Falasi ghə, n təŋkey, ghaa loʼ ghə nəb ityim. Ghaa tɔʼɔ sòw tsuu kə bii kə ukaŋ nsə wɔɔ tə, fə̀ŋ kə tii kə n loʼ nə̀ kə n luu doʼo n wɔ fə wey wə bəkeelinə nsə mə̂ wə.

²⁶Ghə̂ a tə Falasi a fəbə ghə! Sow maʼa tsu dzə na fə̀ŋ kə wɔ̀ɔ kə nsə kaŋ wə, ghaa daŋŋə sow maʼa tsu bii kə tii kə, sey, bii kə tii kə i zow soʼo.

²⁷Ngoʼ î loʼ tə̀ ghaa, ghə̂ a dii a kəlaŋ ghə nsə ghə̂ a tə Falasi ghə, n təŋkey, ghaa loʼ ghə nəb ityim. Ghaa loʼ tə̀ a loʼ sày tə fəmə tə, ghə tsoʼlə naŋa dzɔb tsunə bii, nə̀ a loʼ sey a tii n fə̀ŋ loʼ kə fway tə ughəb nsə fə u fway u loʼ wə.

²⁸A loʼ soʼo ighələ ghaa tɔʼɔ zow dzɔbə kə a bii tə̀ a loʼ ghə̂ a dzuŋu ghə̀, nə̀ a loʼ sey, n fə̀ŋ tə ghaa, ghaa loʼ ghə nəb ityim nsə ghə̂ a bəbə ghə.”

²⁹Yeso n dza kpiʼi ndow tə ghə nə̀, “Ngoʼ î loʼ tə̀ ghaa, ghə̂ a dii a kəlaŋ ghə nsə ghə̂ a tə Falasi ghə, n təŋkey, ghaa loʼ ghə nəb ityim. Ghaa tɔʼɔ bɔm dzɔbə kɔʼɔ sày i tûm tə Kəzə̀, faalə naŋŋə dzɔbə kɔʼɔ sày i ghə̂ ghey ghə â muunə muu i dzuŋu zə.

³⁰Ghaa ghaŋŋə iwû nə̀ abə ghaa â muunə ghi ghə bày a ghaa a wey ghə, ghaa mə way ni təmdzəŋi ghə ni ghəŋə ghəə ghey ghə â ghəŋŋənə ni wey maʼa tûm tə Kəzə̀.

³¹Ghaa dii tənəu n ghəə a ghaa a ghəŋŋə ghə nə̀ ghaa loʼ waa a waa a ghə̂ ghey ghə â weynə tûm tə Kəzə̀ tə̀.

³²Ndòw na n sə̂ kə ghaa mayyə kɔʼ fwaʼ key ghə bày bày a ghaa ghə â kaʼ naŋa tsunə.

³³Ghaa bəbə tə a loʼ təzuu! Ghaa loʼ waa ghə ufwey! Ghaa moʼlə nə̀ ghaa i loʼnu ni tyi nə̀ kə Zə̀ kə nə tûmnə ghaa n luʼu key ghə̂ a fəʼlənə tii ə?

³⁴Sey, n dza bə tə̀ ghaa nə̀, mə î tûm bə ghaa n tûm tə Kəzə̀ tə, ghə̂ a tɔbə ghə, nsə ghə̂ a dii a kəlaŋ ghə. Ghaa i wey maʼa a loʼ ghə, ghaa baa a loʼ ghə n zat kə fəkaʼ, ghaa i bwɔd a loʼ ghə n Ndaw tə udzəŋi tə ghə̂ a Təjuu, ghaa i dzùm ghə naʼa tə naʼa.

³⁵Sey kaŋ tə ghə̂ ghən ghə loʼ nə̀ ghə khə way bwu i loʼ zə, ghə â weynə fa n mbi adzəm i tsuu tsu n tow u ghaa, ni zey bə n kaŋ tə Ebel bə kuum bə n kaŋ tə Wù tûm Kəzə̀ Zakalia, waa Berakaya wən ghə â weynə n luʼu key kə loʼnə n fə̀ŋ ə tsə zey ghə fəələnə maʼlə wə tii nsə baa baa Ndaw Kəzə̀.

³⁶N kùm dza bə tə̀ ghaa nə̀, ghəə ghən adzəm î tsuu tsu n kow ghaa ghən n num tə tən.”

³⁷Yeso n kəm dza ndow tə ghə nə̀, “Yerosalem! Yerosalem! Ghaa ghən ghaa weynə tûm tə Kəzə̀ tə, təmmə wey soʼo ghə̂ ghey Zə̀ kə tûmnə tə̀ ghaa nə atay. A nya loʼ tənəŋə tə siʼi n dəmənə ni zuŋŋə naŋa ghaa tə̀ nay mbvə nə̂ zuŋŋə naŋŋə bənə waa a wi ghə n tənə wi ə? Ghaa u ləghə way ə?

³⁸Sey Zə̀ kə î tûmmə naŋŋənu Ndaw Kəzə̀ ə ghaa, tə key naŋa soʼo.

³⁹N dza bə tə̀ ghaa nə̀, ni kaʼ tsu na, ghaa i kəm koʼ way mə ni ndòw kuum tsuʼ fey ghaa i dzanə nə̀, ‘Zə̀ kə buulə wù wey tə bəghənə n zəd i Mûkəbii.’”