Read Weh Matyo 24 Bible Online

Matyo 24 - Weh bible

Matyo 24

¹Nghee tə̀ Yeso shi tsunə n Ndaw Kəzə̀, nuulə ndòw, ngəd tə wi tə n bə n səə wi, dii ndòw wi n dzɔbə dzɔbə u ndaw tey tə loʼnə n bii kə tii kə.

²Yeso n beeli ndòw ghə nə̀, “Ghaa koʼo kənu fə wən sa udzəm ə? N dza bə isəŋə tə̀ ghaa nə̀, itay imɔʼ zə i doʼo səə way n kow waazə. Ghə î tsuu tsu adzəm aghəd.”

³Nghee tə̀ Yeso doʼnə n kaʼ u Oliv, ngəd tə wi tə n ndòw bə n səə wi, tsɔŋ bəb tsu tə̀ wi nə̀, “Dza bə tə̀ ghey, ghəə ghən ghə î ney zeeli bənə kə ə? À loʼ tsəə i ghaa zə zə̀ î diinə nə̀ nəŋə i tii zə n shɔd tə̀ wɔ ni bə nsə nə̀ mbi zən nya dza i may ə?”

⁴Yeso n beeli ndòw ghə nə̀, “Ney na ghə̂mə zə n wû i ghaa, kə̂ wù nə̀ nəbənə ghaa.

⁵Ndəmə aghə̂ ghə i bəghənu, ghə ney zəd zuŋ, ghə i dza tə̀ ghə̂ ghə nə̀, ‘À loʼ mə̀ wù wey Zə̀ kə â dza naŋa nə̀ i tûm bənu’, sey, ghə i sìi laʼ ndəmə aghə̂.

⁶Ghaa nə̂ zow tsam tə, nkee nyəŋŋə i tətsam. Kə̂ ghaa nə̀ kee keelinə fə̀ŋ tə tsəŋə tə, boʼnə ghəə a tii a teeli khə ni ney kəbənə, i kee dii dzə way nə̀ mbi nya dza i may.

⁷Naʼa tə i zuulə baalə ghi naʼa tə, fɔ̀ɔ tə i zuulə baalə ghi fɔ̀ɔ tə, ghəlitsə kə i noʼlə n ndəmə təluʼu, dzəŋ i faalə i nə̂ loʼ.

⁸Ghəə ghən a maŋ loʼ nzeyyə n ghəə ghey a khənə ni bə, tə̀ waa nə ziʼi num tsuunə weyzən abə tə kaʼ tsunə ni sòʼ waa.

⁹Ghə i kwu ghaa, ghə fuu tsəghə ndòw ghaa tə̀ ghə̂ ghey ghə i chɔdlɔnə ghaa, ghə wey ghaa. Naʼa tə mbi tədzəm tə i bàa ghaa bòʼ zəd zuŋ.

¹⁰Ndəmə aghə̂ ghə i buu doʼo n bəghəm i fə̀ŋ i ghə. Ghə i bàa wû i ghə zə, fìilə fuu wû i ghə.

¹¹Ndəmə tûm tə Kəzə̀ tə tsɔŋɔ tə nə̂ kɔʼɔ bə, ghə nə̂ sìi laʼ ndəmə aghə̂.

¹²Ghəə a bəbə a nə dow tsəghə shi tsu fa n mbi sa, ləghə zə iwû i nə̂ kəm way.

¹³À kee loʼ nə̀, wù wey tə i kow tsunə fə̀ŋ ndòw kùm i ndòw, tə i keeli ibəghəshi.

¹⁴Ghə i naʼlə Tûm i dzuŋu zən bòʼ Fɔɔ u Kəzə̀ n naʼa tə mbi tən tədzəm tə̀ ghə̂ adzəm a zow tsu, sey mbi i daŋŋə may.”

¹⁵Yeso n dza tə̀ ghə nə̀, “Abə ghaa i koʼ tsunə dzəə dzəə kə ighəə kə, kə loʼnə n luʼu kə zow kə tə̀ wù tûm Kəzə̀ Daniə â dza naŋanə, (Wù wey tə tɔŋŋənə, zowkeeli tsu).

¹⁶N nəŋə i tii zə, ghə̂ ghey ghə loʼnə n Judeya khə ni tyi kɔʼ ndow nə təkaʼa.

¹⁷Abə wù loʼnə n tow kə ndaw, kə tə nə ndɔm shiə tsuu bə dzənə ni tsu ney kəfə n ndaw.

¹⁸Nə̀ wù loʼ nə usum, kə tə nə dzəŋŋə bənə n ndaw ni bə ney təndzə.

¹⁹Tsuʼu n tii mə i ngii faalənu tə̀ gheyzən ghey ghə bɔŋ doʼonə nsə a ghey ghə nyɔŋŋənə waa ghə.

²⁰Gɔŋŋə na nə̀ kə i nə̂ doʼlənə n nəŋə zey ghow i ngii tsuulənə nkee n tsuʼ inaʼ,

²¹n təŋkey chɔd mey n nə loʼnə n nəŋə i tii zə, nə faalənu tsəghəshi n mey n loʼ nə̀ mə shi koʼ tsə ni ney nuu bə tə̀ mbi â nə kaʼnə bə kuum bə n tsuʼ fə tii fə. Ndzoʼo chɔd n tii n nə may kuum kə n nəŋə i tii zə, n nə kəm shi koʼ tsə way.

²²Abə Zə̀ kə ka gboo khəə tsuʼu n tii mə, tə wù umɔ̀ʼ i ka nɔb shi. À kee loʼ nə̀, Zə̀ kə î gboo khəə tsuʼu mən bòʼ ghə̂ a wi ghən tə sày naŋanə.

²³N tsuʼu n tii mə, abə wù dza bənə tə̀ ghaa nə̀, ‘Koʼo Klisto wən ə’ nkee ‘Tə wey fey,’ kə ghaa nə̂ bəghəm fuunə tə̀ ghə.

²⁴Kùmnə Klisto tə tsɔŋɔ tə nsə tûm tə Kəzə̀ tə tsɔŋɔ tə î shiə kɔʼɔ bənu, ghə i dii tsə̀ə tə nii tə, ghə nə ghəŋŋə ghəə a faalə ghə nə̀ bə jìi loʼnə, ghə sii laʼ ghə̂ ghey Zə̀ kə loʼ nə̀ kə n sày.

²⁵Ghaa zow! Mə n ghəə ghən tə̀ ghaa dza naŋa tən nə̀ nəŋə i tii i ka kam kpii.

²⁶Sey, abə wù loʼ dza bənə tə̀ ghaa nə̀, ‘Koʼo! Tə loʼ fey n mbvən ə ntsaŋ.’ Kə̂ ghaa nə̂ ndòwnə fu. Nkee abə ghə dza bənə nə̀, ‘Tə wənə fa n fə̀ŋ ə ndaw.’ Kə ghaa nə̂ bəghəm fuunə tə̀ ghə.

²⁷Bòʼ nə̀, Waa Weynum î bəghə tə̀ ghow i nə̂ mwàalənə n bəkighow, luʼu tə n baŋ nay ndòw ni nuu tsu n bad key tsə̀ shiə kɔʼɔ bənə tii ndòw kùm n bad key tsə̀ nyiə tsu ndòwnə tii.

²⁸Luʼu key fə kə kpu doʼonə, mbuʼu wə n zuŋŋə bə soʼo fu.

²⁹Abə tsuʼu mə nchɔd mən î daŋŋə may tsunə, tsə̀ i nəmə nuu nyi ndow, ndzɔŋ i kəm baŋa way, səghəbələ mə i bwu shi tsu bə aghəd, daʼa wey u loʼnə n bikighow i noʼlə kaabə tsə soʼo.

³⁰N nəŋə i tii zə, tsəə ni dii tsu nə̀ Waa Weynum nya bəghənu i dii bə n bəkighow, ghə̂ a naʼa tə mbi tən tədzəm ghə i dey abə ghə koʼnə Waa Weynum tə shiə tsu bənə nə təmbaʼ n daʼa kə nsə ghaʼ i wi i nii zə.

³¹Ghə i daŋŋə zow mbwule i fuŋunə, tə i tûm shi ndòw tsətəndəghə tə Kəzə̀ n badla tə mbi tən n təkaykə, ghə i zuŋŋə naŋa bə ghə̂ a wi ghən tə sàynə n luʼu tədzəm fa mbi.”

³²Yeso n dza tə ghə nə̀, “Zoʼlə tsu na tɔb wə n mwam u kaʼ fə fig, abə fə zòw bənə, ghaa n zaŋŋə koʼ keeli nə̀ ghow i nya dza i tsu fən.

³³À loʼ soʼo ighələ abə ghaa i koʼnə ghəə ghən a shiənə, keeli tsu na nə̀ nəŋə i Waa Weynum zə n shɔd may, tə nya buʼ loʼ n fuʼ u mbàa.

³⁴N kuum dza bə tə̀ ghaa nə̀ ghə̂ ghən ghə loʼnə fa n mbi nə̂ kpu may way nə̀ ghəə ghən ka kam ney bənə kə.

³⁵Bikighow nsə ghəlitsə kə î tsəghə nuulənu, ghɔɔmə zuŋ i nə tsəghə koʼ way.”

³⁶Yeso n kəm dza ndow tə ghə nə̀, “Wù loʼ khə way tsuʼ fey nkee nəŋə zey Waa weynum i bəghənə tii, kasə tsətəndəghə tə Kəzə̀ tən tə loʼnə idəŋ nkee Waa wi khə way, a khə kə Bày.

³⁷Bə̀ i Waa Weynum zə î doʼlə tə̀ nghee ghəə ghə â loʼnə n nəŋə i Noa.

³⁸N tsuʼu mey mmuu mə â ka kam bə kuŋŋə maʼa təluʼu, ghə̂ ghə n zə̂ə, mə̂ə nlə, ney aghey, gheyzən ghə n ney ndòw anum, ni ndòw kùm n nəŋə zey Noa â nyi kɔʼnə nə̀ kəfə̀n.

³⁹Ghə n ka zowkeeli ghəə zey i shiənə ni ndòw kuum n nəŋə zey dzuu â luu shi bənə tii, kuŋŋə maʼa kɔʼ ghə. Zə î bɔɔmə doʼlə soʼo sey abə waa weynum î bənə.

⁴⁰N tsuʼ fə tii fə, gheynum abəghə a nə̂ fwaʼa nə usum, ghə nə̂ ney nuu kɔʼ umɔʼ, umɔʼ nə̂ doʼo səə tsu.

⁴¹Gheyzən a nə̂ loʼ nə̀ kəgwɔ abəghə, ghə nə̂ ney nuu kɔʼ umɔʼ ghə naŋa səə tsu u loʼ wey.

⁴²Sey, ney na ghə̂mə zə n muu i ghaa, n təŋkey, ghaa khə naŋa way tsuʼ fey Mûkəbii ə ghaa nə̂ bəghənə tii.

⁴³Keeli tsu na nə̀, abə mûkəbii mə khənə nəŋə zey wù tsɔŋɔ î bəghənə tii, tə̂ tə bəghəm ni doʼo bweeli idəŋ kə̂ wù tsɔŋɔ nə̂ bəghə khəm nyiənə n ndaw wi.

⁴⁴Sey, ghaa khə ni ləmmə tənə nəŋə tədzəm, n təŋkey, Waa Weynum î bəghə n nəŋə zey ghaa moʼlə way nə̀ tə loʼ ni bə tii.”

⁴⁵Yeso n dza kpiʼi ndow tə̀ ghə nə̀, “À loʼ wù kəfwaʼ u ghaa wə wù loʼnə ni gaʼ fə̀ŋ n kow wi, tə u khə soʼonə tɔb wə ə? À loʼ tə wey, mûkəbii wi fuu naŋanə wi n fwaʼ kə nə̀ tə i laalə ghə̂ a kəfwaʼ à loʼ ghey, fuu ghə n fəzəə wə nə inəŋə.

⁴⁶Wù kəfwaʼ wən î ngii duʼlənu abə mûkəbii fən nyi bənə, bə koʼ bə nə̀ tə fwaʼa dzɔbənu.

⁴⁷N kuum dza bə tə̀ ghaa nə̀, mûkəbii wən i naŋŋə wù kəfwaʼ wən nə̀ tə i laalə fə u wi wə udzəm.

⁴⁸Abə a loʼ nə̀ tə loʼ wù kəfwaʼ u bəbə wə, tə î dza tsuu n fə̀ŋ ə wi nə̀, mûkəbii wuŋ î doʼlə kəghab tə̀ wi ni bə dzəŋŋə.

⁴⁹Tə i kaʼ ndòw ni bwɔd ghə̂ a kəfwaʼ a loʼ ghey, zə̂ə, mə̂ə dzəŋi nlə ghi ghə̂ a khəə ghə nlə ghə.

⁵⁰Sey, mûkəbii ə wù kəfwaʼ wən i gbələ ndòw fən nyi bə nə̀ tə ka keeli zey, n nəŋə zey tə mə khə way nə̀ tə loʼ ni bə tii.

⁵¹Mûkəbii ə wi i bə khəələ tsu wi nə nsadla, tə təm naŋa dzəŋi ndòw wi ghi ghə nəb ityim. Ghə i dey fu, fəə asɔŋ.”