Read Weh Matyo 25 Bible Online

Matyo 25 - Weh bible

Matyo 25

¹Yeso n dza tə̀ ghə nə̀, “N tsuʼ fey Waa Weynum î bəghənə tii, Fɔɔ u Kəzə̀ wə i loʼ tə̀ a loʼ waa a zən a loʼ ghə ighəm ghə â ney kɔʼnə daa u ghə wə, shi ndòw ni ndòw kpii ney nùm weyzən.

²Ataa ghə n làʼlə, a loʼ ghey ataa ghə n khə utɔb.

³A laʼlə ghey n ney kɔʼ kə daa u ghə, ka ney kpiʼi mmuu n kədaa.

⁴A tɔbə ghey n kee ney kɔʼ daa u ghə, ney kɔʼ soʼo mmuu n kədaa.

⁵Zə n bə shi kɔʼ nə̀ num weyzən wey ka khə bə, sey ghə n zey ndòw ni dzoʼ bweeli, bweeli nuu daŋŋə ndow.

⁶Ambə n fə̀ŋ ə tsuʼu tə, ghə n zow kəbɔŋ nə̀, ‘Num weyzən n bə, bə kpii ney na wi!’

⁷Waa a zən ghey n nuu kɔʼ, kɔʼlə kɔʼ daa u ghə.

⁸A laʼlə ghey n dza ndòw tə̀ a tɔbə ghey nə̀, ‘Fuu bə na ghey n mmuu n kədaa mə, n təŋkey, daa u ghey u nya nəmmə ndòwnu.’

⁹A tɔbə ghey n beeli ndòw ghə nə̀, ‘Mmuu n kədaa mən mə î kpii dzə way tə̀ saa adzəm, baa ndòw zuu kɔʼ na mmuu n kədaa mə n wɔ ghə̂ ghey ghə fìilənə.’

¹⁰Sey gheyzən a laʼlə ghey n nuu ndòw ni ndòw zuu mmuu n kədaa. A loʼ ghən ataa ghə â bayyə tən bənə wû i ghə zə n nuu nyi ndòw n dzəŋi kə zə̂ kə ney zə iwû kə ghi nùm weyzən, ghə n fii kɔʼ kəbaʼ.

¹¹Gheyzən a loʼ ghey ghə n ndòw bə ibam, buʼu kəbɔŋ dza, ‘Mûkəbii, mûkəbii! Chi tsu ghey n baʼ kə.’

¹²Num weyzən wey n beeli kɔʼ ghə dza nə̀, ‘Ey ngaŋ, n khə dzə way ghaa, n kuum dza bə isəŋə.’

¹³Sey, təmi kɔʼ na n fuu zə, n təŋkey, ghaa khə dzə way tsuʼ fey nkee nəŋə zey Waa weynum î bəghənə tii.”

¹⁴Yeso n kəm dza ndow tə ghə nə̀, “Fɔ̀ɔ u Kəzə̀ wə î loʼ tə̀ a loʼ wù loʼ tə â dza i shi bwey, tə n tɔŋɔ bə ghə̂ a kəfwaʼ a wi, fuu naŋa tsu fə̂ u wi n wɔ ghə.

¹⁵Tə n fuu ndòw kə tə̀ kay, tə̀ daʼa kə wi kə diinə. Tə n fuu ndòw wù umɔʼ n mbəghə wə ukhəə wə utaa, fuu ndòw u loʼ wə n mbəghə wə ubəghə, fuu ndòw wù loʼ wey n mbəghə kə kəmɔʼ.

¹⁶Wù wey tə â khənə mbəghə wə ukhəə wə utaa n daŋŋə kaʼ ndòw ni ghəŋə bikiwən tii, keeli kpiʼi kɔʼ təbənə tii nə umbəghə utaa.

¹⁷Tə wey tə a khənə mbəghə wə ubəghə n ghəŋə ndòw soʼo ghə i mɔʼɔ zə, keeli kpiʼi kɔʼ mbəghə wə ukhəə ubəghə.

¹⁸Tə wey tə â khənə mbəghə kə kəmɔʼ n kee ndòw təm kɔʼ kəbuʼ aghəlitsə, gəmə naŋa ndòw khəə u mûkəbii ə wi tii.”

¹⁹“Ambə ghə ndəŋə doʼo kəŋə ndownə, mûkəbii ə ghə̂ a kəfwaʼ wey n ndòw bə dzəŋŋə ni bə koʼ nghee ghə fwaʼ kəŋə bənə tii n khəə wey wə â loʼnə n wɔ ghə.

²⁰Wù kəfwaʼ wey tə â khənə mbəghə wə ukhəə wə utaa n bə fuu dzəŋŋə bə, fuu bə soʼo mbəghə wə ukhəə u loʼ wey utaa dza nə̀, ‘Mûkəbii, wə â fuu naŋa mə n mbəghə wə ukhəə wə utaa, mə n fwaʼ keeli kpiʼi mbənə tə tii nə umbəghə utaa. Koʼo u wən ə!’

²¹Mûkəbii wey n dza ndòw tə̀ wi nə̀, ‘Wə n fwaʼ dzɔb, wə loʼ wù kəfwaʼ u dzuŋu wə, wù loʼnu ni gaʼ fə̀ŋ n kow wɔ. Wə n kwu keeli dzɔb nyaŋi fən n mə fuunə tə̀ wɔ, sey mə î kɔʼlə naŋa kɔʼɔ wɔ, wə i laalə ndəmə ufə̂. Bə̀ doʼo tsu, wə i saŋŋə ghi mûkəbii wə.’

²²Wù kəfwaʼ wey tə â khənə mbəghə wə ukhəə wə ubəghə n ndòw bə, dza nə̀, ‘Mûkəbii, wə â fuu naŋa mə n mbəghə wə ukhəə wə ubəghə, mə n fwaʼ, keeli kpiʼi mbənə tə tii nə umbəghə ubəghə. Koʼo, u wən ə!’

²³Mûkəbii wey n dza ndòw tə̀ wi nə̀, ‘Wə n ghəŋə dzɔb, wə loʼ wù kəfwaʼ u dzuŋu wə, wù loʼ ni gaʼ fə̀ŋ n kow wɔ. Wə n kwu keeli dzɔb nyaŋi fən n mə fuu naŋanə tə̀ wɔ, sey mə î kɔʼlə naŋŋə kɔʼɔ wɔ, wə i laalə ndəmə ufə̂. Bə̀ doʼo tsu, wə i saŋŋə ghi mûkəbii wə.’

²⁴Tə wey tə â khənə mbəghə kə ukhəə kə kəmɔʼ n ndòw bə, dza nə̀, ‘Mûkəbii, n khə tsənu nə̀ wə̀ khə mwam u taw wə, wə ləghə ni zə̂ə nə̀ wə ka fwaʼ, kpey ufə nə kəluʼu nə̀ wə ka zəghə fə kə loʼ kə.

²⁵À wey loʼ ghə i tii zə mə â tsəŋənə, mə n ney kɔʼ khəə wə ndòw təm tsu kəbuʼ aghəlitsə nyi naŋa ndòw fu, koʼo, khəə wə u wən ə!’

²⁶Mûkəbii wey n beeli ndòw wi dza nə̀, ‘Wə loʼ wù kəfwaʼ u bəbə bəbə wə, lay soʼo, wə â fa khənu nə̀, n ləghə ni zə̂ə nə̀ n ka fwaʼ, kpey ufə n luʼu key n ka zəghə.

²⁷Wə â ka kee ney kuu naŋa ndòw khəə wuŋ n luʼu key ghə maʼlə naŋanə khəə wə tii, n mə bə ney dzəŋŋə khəə wuŋ nə̀ wə n fwaʼ kpiʼi mbənə tə.’

²⁸Mûkəbii wey n daŋŋə dza ndòw tə̀ wù kəfwaʼ u loʼ wə nə̀, ‘Ney nuu kɔʼ na mbəghə kə ukhəə key tə khənə, ghaa ney fuu ndòw tə̀ wù wey tə khənə mbəghə wə ighəm.

²⁹Kuum nə̀, wù wey tə khənə fə kə ghə î fuu kpiʼinu wi, tə i keeli tsəghə shi tsu. Abə wù wey tə khə way fə kə, kasə̀ nyaŋi fey tə khənə, ghə i ney nuu may kɔʼ n wɔ wi.

³⁰Abə dzə̀ŋsə kə wù kəfwaʼ kən, ney maʼa shi ndòw na wi a bii n tənə kələm, n luʼu key tə deynə fu, fəə asɔŋ.’”

³¹Yeso n dza tə ghə nə̀, “Abə waa weynum î bənə n wû u kədə̀ŋ ghi tsətəndəghə tə Kəzə̀ tə tədzəm ghi wi, tə i bə doʼo tsu n kuu kə ufɔɔ kə wi.

³²Ghə̂ ghən n naʼa tə mbi tədzəm, i zuŋŋə bə n səə wi. Tə i dzawwə tsu ghə nə ubad ubəghə tə̀ wù baʼa u tənjì u nə̂ dzawwə naŋanə ji tə nsə njì tə.

³³Tə i ney naŋa bə tənjì n kpii u wi u təmə wə, tə naŋa ndòw təji n kpii kə wi kə kwɔɔ kə.

³⁴Tə i daŋŋə dza ndòw tə̀ ghə̂ ghey n kpii u wi u təmə wə nə̀, ‘Bə na n səə mə, ghaa ghən ghaa loʼ nə̀ Bày wuŋ n ghaa buulə, bə zə̂ na fɔɔ u Kəzə̀ wən ghə â bayyə naŋa nə nzeyyə tə̀ ghaa nə̀ mbi ka kam kaʼ.

³⁵Kuum nə̀, mə â loʼ n dzəŋ, ghaa n fu mə̀ n fəzəə wə, fə̀ŋ ə mmuu n zuʼlə mə, ghaa n fuu mə n mmuu mə, mə n bweyyə bə nə ghaa, ghaa n kpii ney mə n ndaw tə ghaa.

³⁶Mə â laʼa təndzə̂, ghaa n fuu mə n ndzə̂ tə, mə â dzaŋanu, ghaa n laalə tə̀ mə̀, mə â loʼ n ndaw tsaʼ, ghaa n bə tɔŋɔ zow mə.’

³⁷Ghə̂ ghən ghə loʼnə tsətsəghə i daŋŋə beeli ndòw wi nə̀, ‘Mûkəbii, à loʼ zeeli ghey â koʼnə wɔ nə wə loʼ n dzəŋ, fuu tsu wɔ n fəzəə wə ə? Nkee fə̀ŋ ə mmuu â zuʼlənə wɔ ghey n fuu wɔ n mmuu n məə mə ə?

³⁸Ghey â koʼ wɔ zeeli wə bwey bənə, ghey n kpii ney wɔ n ndaw tə ghey ə? Nkee wə â laʼanə ndzə̂ tə, ghey n fuu wɔ n ndzə̂ tə ə?

³⁹Â loʼ zeeli, ghey â koʼnə wɔ wə dzaŋanə nkee n ndaw tsaʼ, ghey n bə tɔŋɔ zow wɔ ə?’

⁴⁰Tə i beeli ndòw ghə nə̀, ‘N kuum dza bə tə̀ ghaa nə̀, ghəə ghey ghaa â ghəŋənə tə̀ waazə wuŋ u ghaa wə, ghaa â sey ghəŋə tə̀ mə̀.’”

⁴¹“Tə i dza ndòw tə̀ ghə̂ ghey n kpii kə wi kə kwɔ kə nə̀, ‘Nuu na n səə mə, ghaa ghən Zə̀ kə ləŋ naŋanə, ndòw na n vəllə wey u nəmmə tsə way ghə bayyə naŋanə tə̀ Satan nsə tsətəndəghə tə wi.

⁴²Kuum nə̀, mə â loʼ n dzəŋ, ghaa n ka fuu mə n fəzəə wə, fə̀ŋ ə mmuu â zuʼlə mə, ghaa n ka fuu mə n mmuu n məə mə,

⁴³mə â bwey bə nə ghaa, ghaa n ka kpii ney mə̀, mə â khə way ndzə̂ tə, ghaa n ka fuu mə n ndzə̂ tə, mə n dzaŋa, loʼ n ndaw tsaʼ, ghaa n ka bə tɔŋɔ zow mə.’”

⁴⁴“Ghə i beeli kɔʼ nə̀, ‘Mûkəbii, â loʼ zeeli ghey â koʼnə wɔ n dzəŋ, nkee nə fə̀ŋ ə mmuu zuʼlə wɔ, nkee nə̀ wə khə way ndzə̂ tə, nkee wə dzaŋanə, nkee wə loʼnə n ndaw tsaʼ, ka gaamə wɔ ə?’

⁴⁵Tə i beeli kɔʼ nə̀, ‘N kuum dza bə tə̀ ghaa nə̀, ghəə ghey ghaa â tuunə ni ghəŋə tə̀ waazə wuŋ u ghaa wə, ghaa â sey tuu ni ghəŋə tə̀ mə̀.’

⁴⁶Sey, ghə i tûm nuu ndòw ghə n luʼu key ghə̂ a fəʼlənə tii nəŋə tədzəm, ghə̂ ghey ghə loʼnə tsətsəghə i zə̂ itsali.”