Read Weh Matyo 27 Bible Online

Matyo 27 - Weh bible

Matyo 27

¹Ambə tsuʼ u zow tsunə, ghə fɔɔngili a nii ghə nsə ngəd tə inaʼ tə n bə kad kɔʼ tsəm ə Yeso nə̀ ghə wey wi.

²Nghee ghə kad may kɔʼ tsəm zey, ghə n kùm kɔʼ wi nə tətsaʼ, ney nuu ndòw wi. Ghə n ndòw fuu tsəʼlə ndòw wi tə̀ Pilato, tə â loʼnə Gɔvənɔ.

³Ambə Judas, wù wey tə â fìi fuunə Yeso, koʼ tsunə nə̀ ghə n tsəʼlə saʼ nə̀ ghə wey Yeso, tə n kweyyə kɔʼ fə̀ŋ ə wi, ndòw ney kɔʼ ngɔʼ mə itsàa mey nghəm ntəghə, ndòw fuu dzəŋŋə ndòw tə̀ ghə fɔɔngili a nii ghə nsə ngəd tə inaʼ tə,

⁴dza tə̀ ghə nə̀, “Mə n ghəŋə bəəbə ni fìi fuu wù nə̀ ghə wey loʼ sey nə̀ wɔɔ a wi a zownu.” Ghə n beeli ndòw wi dza nə̀, “I zey laalə way ghey, a wey loʼ chɔd wə.”

⁵Ambə Judas zow tsunə sey, tə n saʼ maʼa naŋa ndòw khəə wey fu n Ndaw Kəzə̀ i nii zə n Yerosalem, nuu i ndòw, ndòw səŋə kɔʼ wû u wi.

⁶Ghə fɔɔngili a nii ghey n kumi kɔʼ khəə u tii wə dza nə̀, “À wən loʼ khəə u təkaŋ, laŋ kə diinə a way ni təmdzəŋi dzə̀ khəə wən n khəə u Ndaw Kəzə̀ i nii zə.”

⁷Ghə n saalə tsu, ndòw zuu kɔʼ bəghə i wù bɔm u tə tətɔ̀ɔ n khəə u tii wə, ni tsəllə ghə̂ a tətùm ghə a tii.

⁸À wey loʼ ghə i tii zə ghə tɔŋɔ naŋa tən ndòwnə bəghə i tii zə nə̀ a loʼ bəghə i təkaŋ.

⁹Ghəə ghən â luulə ghəə ghey wù tûm Kəzə̀ Jeremaya â dzanə nə̀, “Ghə â ney kɔʼ khəə u ngɔʼ mə itsàa mey nghəm ntəghə, nə a loʼ taŋa khəə wey ghə̂ ghə Izree ghə â bəghəm naŋa ni tsə n tow kə wi,

¹⁰ndòw zuu kɔʼ bəghə i wù bɔm u tətɔ̀ɔ wə a tii, tə̀ Mûkəbii â dzanə tə̀ ghə.”

¹¹Nya, Yeso n tey n sə̂ kə Pilato tə â loʼnə Gɔvənɔ. Pilato n bəb ndòw tə̀ wi nə̀, “Wə loʼ Də̀ŋ kə ghə̂ a Təjuu ə?” Yeso n beeli kɔʼ nə̀, “I loʼ tə̀ wə dzanə.”

¹²Ambə ghə fɔɔngili a nii ghə nsə ngəd tə inaʼ tə kuunə ghəə ghə n tow kə wi, tə n ka beeli dzə ghə.

¹³Sey Pilato n bəb ndòw tə̀ wi nə̀, “Wə zow way ndəmə tə aghəə tən ghə kuunə n tow kə ə?”

¹⁴Yeso n ka nam beeli kìi shi ighəə imɔʼ. Dzuu zə n ngii zum Pilato bòʼ wi.

¹⁵N nəŋə i zə̂ kə taa zaʼa kə, Pilato â bəghə tə n zəghə maʼa shi ndòw wù ndaw tsaʼ wey naʼ i ləghənə.

¹⁶Fuŋ uzɔŋ u loʼ wə n loʼ fu n ndaw tsaʼ ghə tɔŋŋənə nə̀ a loʼ Barabas.

¹⁷Ambə nɔɔ kə aghə̂ kə dzəŋi bənə, Pilato n bəb ndòw tə̀ ghə nə̀, “Ghaa ləghə nə̀ n zəghə shi bə ghaa n Barabas nkee Yeso wən ghə tɔŋŋənə nə̀ a loʼ Klisto ə?”

¹⁸Tə â sey bəbə n təŋkey, tə â khənu nə̀ ghə̂ a Təjuu ghə â ney bə Yeso n səə wi nə a loʼ kəghoʼ.

¹⁹Nghee tə̀ Pilato nam doʼnə n kuu key tə doʼlənə tii ni saʼ aghə̂, wey wi n tûm bə tûm tə̀ wi nə̀, “Kə wə̀ nə ghəŋŋənə ghə i bəbə zə n kow wù wey, n təŋkey, wɔɔ a wi a zownu. Jim u mə bə mə na, n jim u tii wə, mə n ngii fəghənə bòʼ wi.”

²⁰Ghə fɔɔngili a nii ghə nsə ngəd tə inaʼ tə n tənnə nɔɔ kə aghə̂ key nə̀ ghə dza ndòw tə̀ Pilato nə̀ tə zəghə shi bə Barabas, ghə ney wey maʼa ndòw Yeso.

²¹Pilato n bəb kpiʼi ndòw tə̀ ghə nə̀, “Ghaa ləghə nə̀ n zəghə fuu bə ghaa n wù ghaa wə n ghə̂ ghən abəghə ə?” Ghə n dza, “Barabas.”

²²Tə n bəb kpiʼi ndòw tə̀ ghə nə̀, “Ghaa kee dza nə̀ n ji tsu ngee ghi Yeso wən ghə tɔŋŋənə nə̀ a loʼ Klisto ə?” Ghə n dza, “Baa na wi zat kə fəkaʼ!”

²³Pilato n kee bəb tə̀ ghə nə̀, “A baa wi n zat kə fəkaʼ nə̀ a loʼ kee? Tə bəəbə kee?” Ghə n fədlə buʼu shiə kɔʼɔ kə nbɔŋ dza nə̀, “Baa na wi n zat kə fəkaʼ.”

²⁴Ambə Pilato koʼ tsunə nə̀ ghə i loʼ i bwey way, nə̀ a kɔʼɔ bə uchɔd, tə n ney kɔʼ mmuu sow kɔʼ wɔɔ a wi n sə̂ kə nɔɔ kə aghə̂ key, dza tə̀ ghə nə̀, “Wɔɔ ghuŋ a way dzə n və i wù wən, a khə kə ghaa.”

²⁵Nɔɔ kə aghə̂ key n dza tə̀ wi nə̀, “Naŋa və i wi i doʼo n tow u ghey nsə waa a ghey ghə.”

²⁶Sey Pilato n zəghə fuu shi bə Barabas tə̀ ghə, dza tsu nə̀ ghə vəələ bwɔd tsu Yeso nə ikwɔɔ, daŋŋə fuu nuu ndòw wi nə̀ ghə ndòw baa wi n zat kə fəkaʼ.

²⁷Sey sawgoʼ tə n ney kɔʼ Yeso n bii kə Pilato, saʼ kə təsawgoʼ key fu kədzəm n dzəŋi dzəŋ tsəghə kɔʼ wi.

²⁸Ghə n tsɔʼ nuu kɔʼ ndzə̂ tə wi, dzəŋə kɔʼ wi n sàŋ ə baʼtum.[17]

²⁹Ghə n faalə kɔʼ tàŋŋə kə fɔ̀ɔ nə təmgbii, dzəŋə tsu n tow kə wi, fuu tsu wi n mbaŋ n wɔɔ kə wi kə zəə kə. Ghə n nyaʼa tsu n sə̂ kə wi, lənnə wi dza nə̀, “Mbee! Də̀ŋ kə Təjuu.”

³⁰Ghə n tsə ntəghə n tum usə u wi, ney kɔʼ mbaŋ zey, fùŋ wi tii nə kətow.

³¹Nghee tə̀ ghə lənnə kow tsunə wi, ghə n tsɔʼ nuu kɔʼ sàŋ ə baʼtum zey n kow wi, dzəŋə dzəŋŋə kɔʼ ndzə̂ tə wi, daŋŋə ney nuu ndòw wi ni ndòw baa n zat kə fəkaʼ.

³²Nghee tə̀ ghə nuulə shiə ndòwnə n naʼ i Yerosalem, ghə n kpiilə bə ghi wù Sirin u loʼ wə zəd i wi zə â loʼnə nə̀ a loʼ Shimun. Sawgoʼ tey n kwu tsu wi nə kədaʼa nə̀ tə boʼo zat kə fəkaʼ kə Yeso.

³³Ghə n ndòw bə n luʼu kə loʼ kə ghə â tɔŋŋənə nə̀ a loʼ Gɔgɔta i diinə nə̀, “Luʼu kə kaŋ kə tow u ghə.”

³⁴Ghə n fuu Yeso fu n nlə mə nə̀ ghə n nyɔɔmə fə̂ u nyey u loʼ wə tii. Ambə tə mɔm zow kɔʼnə, tə n tuu ni mə̂ nlə n tii mə.

³⁵Ghə n daŋŋə ney baa kɔʼ wi n zat kə fəkaʼ, dzawwə tsu ndzə̂ tə wi n wû i ghə nə̀ ghə təm tsu mboʼ.

³⁶Ghə n daŋŋə tsu doʼo tsu, keyyə kɔʼɔ ndòw wi.

³⁷Ghə n tɔ̀ɔ baa naŋa kɔʼ ghəə zey tə ghəŋə idəŋ n tow kə wi dza nə̀, “À wən loʼ Yeso, Də̀ŋ kə Təjuu.”

³⁸Ghə n baa naŋa kɔʼ soʼo ghə̂ a tsɔŋɔ ghə abəghə ghi Yeso, umɔʼ n kpii kə wi kə təmə kə, umɔʼ n kpii kə wi kə̀ kwɔɔ kə.

³⁹Ghə̂ ghey ghə â tsəghənə n soʼ utow, kpaalə wi,

⁴⁰dza nə̀, “À wən loʼ wù wən tə â dzanə nə̀ tə î saʼa tsu Ndaw Kəzə̀ i nii zə n Yerosalem, tə bəghə dzəŋŋə kɔʼ nə ntsuʼu ntəghə. Bəghəshi bə wû wə wə̀ abə à loʼ nə̀ wə loʼ Waa Kəzə̀. Shi tsu bə fey n zat kə fəkaʼ.”

⁴¹Ghə fɔɔngili a nii ghə, ghə̂ a dii a kəlaŋ ghə, nsə ngəd tə inaʼ tə n sɔʼlə soʼo wi dza nə̀,

⁴²“Tə â bəghəshiə ghə̂ a loʼ ghə, tə u kee way ni bəghəshi wû u wi! N dza tə loʼ də̀ŋ kə naʼ zə Izree? Tə shi tsu bə fey n zat kə fəkaʼ, a i daŋŋə bəghəm fuu ndow tə̀ wi!

⁴³Tə â bəghəm tə̀ Zə̀ kə, tə n buʼ dza soʼo nə̀ i loʼ waa Kəzə̀, abə Zə̀ kə ləghənə wi, tə bəghəshi tsu bə wi nya.”

⁴⁴Ghə̂ a tsɔŋɔ ghey ghə â dzəŋi baa naŋanə ghə ghi wi n kpaalə soʼo wi n jìi i mɔʼɔ zə.

⁴⁵Ambə n fəŋ ə tsə̀, ləm kə n bwu bə nə inaʼ idzəm ndòw kuum ndòw nə tənəŋə tətəghə n tsə̀ tə.

⁴⁶Ambə nə tənəŋə tətəghə, Yeso n dey shi bə n dzə̀ i taw zə dza nə̀, “Eli, Eli, lama sabadani?” I dii tsunə nə̀, “Zə̀ kuŋ, Zə̀ kuŋ, a loʼ kee wə̀ tûmmə naŋanə mə ə?”

⁴⁷Ghə̂ a loʼ ghə, ghə â teynə fu n zow ndòw, ghə n dza nə̀, “Tə tɔŋŋə Elayja.”

⁴⁸Wù ghə umɔʼ n nyəŋ ndòw ney kɔʼ usâa, tsum nyi tsu n tsali kə nlə, khə̀ə kɔʼ n mbaŋ, dii kɔʼ ndòw tə̀ wi nə̀ tə mə̂.

⁴⁹À loʼ ghey n dza, “Zəllə tə̀ a koʼ nə̀ Elayja bə bəghəshiənu wi ə?”

⁵⁰Yeso n kəm dey kpiʼi shi kɔʼ, zay kə wi kə n daŋŋə may i tsu.

⁵¹Sey kə̀ŋ wey wə â loʼnə n Ndaw Kəzə̀ i nii zə n Yerosalem n baalə shi tsu bə nə utɔŋ ubəghə ni nuu tsu idəŋ tsu kuum aghəd, ghəlitsə kə noʼlə, naa wə n kaʼlə.

⁵²Sày tə n chi shi ndòw, ndəmə vən a ghə̂ a Kəzə̀ ghey ghə â nə kpunə, Zə̀ kə n zhəm dzəŋŋə bə ghə.

⁵³Ambə Yeso zhəm dzəŋŋə bənə nə ivə, ghə̂ a loʼ ghey n nuu shi bə n dzuu a təsay, ndow n naʼ i zow zə, tɔŋŋə Yerosalem, ndəmə aghə̂ n koʼ ghə.

⁵⁴Ambə wù nii ə saʼ kə təsawgoʼ wey nsə sawgoʼ tey tə â keyyənə Yeso koʼ tsunə nghee ghəlitsə kə noʼlənə tii nsə ghəə a loʼ ghey ghə â shiənə, tsəŋ zə n kwu ghə, ghə n dza nə̀, “Wù wən â ndzəm loʼ Waa Kəzə̀.”

⁵⁵Ndəmə gheyzən a loʼ ghə, ghə â dzûmə bənə Yeso n Galili, gaamə bə wi, n loʼ n ghab kə, laalə bə.

⁵⁶Maliya Magdala n loʼ n fəŋŋə kə ghə, nsə Maliya này Jems nsə Yosef, nsə wey Zebedi.

⁵⁷Ambə n nəŋə i fənə tə, wù kûm u loʼ wə, zəd i wi zə â loʼ nə̀ à loʼ Yosef n naʼ i Alimatia, tə â loʼ soʼo dzûmə ə Yeso n ndòw bə.

⁵⁸Tə n ndòw n səə Pilato, ndòw nɔɔ kɔʼ vən i Yeso ni ndow tsələ. Pilato n dza ndow tə̀ sawgoʼ tey nə̀ ghə fuu ndòw tə̀ wi.

⁵⁹Sey Yosef n ney kɔʼ vən i tii zə, baŋ kɔʼ n ndzə̂ tə fəmə tə,

⁶⁰ndòw naŋa nyi ndòw n sày i wi, tə â kuʼlə təm kɔʼnə nə̀ kənaa. Tə n bəŋŋə tsəd bə naa kə nii kə n dzuu zə isày i tii zə, nuu i ndòw.

⁶¹Maliya Magdala nsə Maliya u loʼ wey n doʼ fu, laalə daŋa ndòw sày i tii zə.

⁶²Ambə tsətsə wey, à n loʼ tsuʼ inaʼ u ghə̂ a Təjuu, ghə fɔɔngili a nii ghə nsə ghə̂ a tə Falasi ghə n ndòw koʼ ndòw Pilato.

⁶³Ghə n dza tə̀ wi nə̀, “Mûkəbii, a nam moʼlənu nə̀ wù badla wə aghəə wey â dza naŋa zey n nəŋə zey tə â nam loʼnə utaw nə̀, ‘A i bə nə ntsuʼ ntəghə, Zə̀ kə i zhəm dzəŋŋə bə mə nə̀ ivə.’

⁶⁴Sey, tsəʼlə tsu laŋ kə nə̀ ghə i keyyə tsu dzuu zə isay i wi zə, kə̂ dzûmə tə wi tə nə̂ bə tsɔŋɔnə vən i wi zə, tə̀ ghə kaʼ ni dza tə̀ ghə̂ ghə nə̀ tə n zhəm nə ivə. Abə ghə i bad tsunə ghəə ghə n jìi i zən, zə i kəm bəb tsəghə shi tsu i sə̂ i sə zey.”

⁶⁵Pilato n dza ndòw tə̀ ghə nə̀, “Ney kɔʼ na sawgoʼ tə keyyə tə, ghaa ndow naŋa ndow fu tii nə isay, ghə doʼo fu tii ni tɔʼ keyyə.”

⁶⁶Ghə n nuu ndòw n dzuu zə isày i tii zə, ndòw ghəŋə naŋa tsu tsəə n naa key ghə â bəŋŋə tsəd bə dzuu zə isay zə tii, naŋa tsu sawgoʼ tey fu nə̀ tə i keyyə say zey.