Read Weh Matyo 28 Bible Online

Matyo 28 - Weh bible

Matyo 28

¹Ambə tsuʼ inaʼ u ghə̂ a Təjuu u tsəghə tsunə, nghee tsuʼ fə sə̂ isə fə nə iwən fə zow bənə tɔŋŋə tsuʼ inaʼ wə nkala, Maliya Magdala ghi Maliya u loʼ wey n ndòw ni ndòw koʼ sày i Yeso.

²Nghee tə̀ ghə ndòw kuum tsunə fu, ghəlitsə kə n gbəllə kaʼ ni noʼlə. Tsəndəghə ə Kəzə̀ u loʼ wə n shi tsu bə idəŋ, bə bəŋŋə nuu kɔʼ naa key kə â tsəd doʼonə n dzuu zə isày i tii zə, kɔʼ doʼo kɔʼ tii.

³Koʼ i wi zə n nyiələ tə̀ ghow i nə mwàalənə. Ndzə tə wi tə n fəmə fuŋ, fəm tsəghəshi tsu fə u fəmə wə udzəm.

⁴Ambə sawgoʼ tey tə â keyyənə sày i Yeso zə koʼ ndownə wi, tsəŋ zə n kwu ghə, ghə n tsəŋŋə tənə sa kaʼ kaʼ kaʼ, ghə n maŋ tə̀ghə̀ doʼo kɔʼ fu tə̀ a loʼ ghə̂ a kpuu ghə.

⁵Tsəndəghə ə Kəzə̀ wey n dza ndòw tə̀ gheyzən ghey nə̀, “Kə̂ ghaa nə̂ tsəŋənə, n khənu nə̀ ghaa kəŋə Yeso wən ghə â baanə n zat kə fəkaʼ.

⁶Tə way fa, tə n zhəm dzəŋŋə nə ivə tə̀ tə â dzanə. Bə koʼo na luʼu key ghə â nyəŋi naŋanə vən i wi zə tii.

⁷Ghaa zaŋŋə ndòw dza ndòw tə̀ ngəd tə wi tey nə̀ tə n zhəm dzəŋŋə bə nə ivə, tə n ndòw isə n Galili, ghaa i koʼo wi fu. I moʼlə tsu na ghəə ghən n dza tsunə tə̀ ghaa.”

⁸Sey, gheyzən ghey n nuu tsu fu nə isày zey ndow ni nyəŋ n tsəŋ zə n fə̀ŋ, tsɔŋ khə soʼo iduʼlə n fə̀ŋ. Ghə n nyəŋə ndòw ni ndòw dza ghə i tii zə tə̀ ngəd tə Yeso tə.

⁹Nghee tə̀ ghə ndownə, ghə n taa fəmi kɔʼ Yeso, tə n dza tə̀ ghə nə̀, “Buulə zə i loʼ ghi ghaa.” Ghə n bə bwu kwu bə fuu i wi, ngɔɔmə ndow wi.

¹⁰Yeso n dza ndòw tə̀ ghə nə̀, “Kə̂ ghaa nə̂ tsəŋənə, ndòw dza ndòw na tə̀ waazə ghuŋ ghə nə̀ ghə nuu ndòw n Galili, ghə i koʼ mə fu.”

¹¹Nghee tə̀ gheyzən ghey nuu ndownə, sawgoʼ tə loʼ tey tə â keyyənə dzuu zə isày i Yeso zə n nuu dzəŋŋə ndòw inaʼ, ndòw tiilə dza ndòw ghəə ghey a shinə tə ghə fɔɔngili a nii ghə.

¹²Ambə ghə zow tsunə ghəə a tii ghə, ghə fɔɔngili a nii ghey n kwu tsu kədzəŋi ghi ngəd tə inaʼ tə kad tsu tsəm ə ghə. Ghə n zuulə tsu sawgoʼ tey n khəə u nii wə,

¹³dza tə̀ ghə nə̀, “Ghaa khə ni dza tə ghə̂ ghə nə̀ ngəd tə Yeso tə â bə tsɔŋ nuu kɔʼ vən i wi n tsuʼu tə nə̀ ghaa bweelinu.

¹⁴Abə ghəə a tii a ndòw nyinə n tuŋŋə kə Pilato, ghey i ghɔɔmə tsu ghi wi, ghey dza ndòw tə wi nə̀ wɔɔ a ghaa a zownu, sey ghaa i ka nyi dzə nə uchɔd.”

¹⁵Sawgoʼ tə keyyə tey n ney ndòw khəə u tii wə, bɔɔmə ghəŋə ndòw kə tə ghə mə dzanə tə̀ ghə. A wey loʼ zəzəə fey fə â bweynə n fəŋŋə kə ghə̂ a Təjuu ni bə kuum na.

¹⁶Ngəd tə Yeso tey ighəm n ghii fə fəmɔʼ n nuu ndow n Galili, ndòw n kaʼ wey Yeso â dzanə tə̀ ghə nə̀ ghə i ndòw fu.

¹⁷Ambə ghə ndownə fu, ghə n koʼ tsu wi, ghə ngɔɔmə wi. À loʼ ghə n nam məʼlə nə̀ a təmmə loʼ kənu wi ə?

¹⁸Yeso n bə n səə ghə, dza tə ghə nə̀, “Zə̀ kə n fuu mə n daʼa kə ni saʼ fə wən udzəm u loʼnə idəŋ nsə fa a ghəlitsə.

¹⁹Sey ndòw na, ghaa i ghəŋŋə ndow nə̀ ghə̂ a naʼa tədzəm, ghə doʼo dzûmə tuŋ, fuu ndòw ghə n mmuu n Kəzə̀ mə n zəd i Bày, Waa, nsə Zay kə Zow kə,

²⁰dii ndòw ghə n ghəə ghə, nə̀ ghə i naŋŋə laŋ wey udzəm â fuunə tə̀ ghaa. Keeli tsu na nə̀ mə i loʼ ghi ghaa nəŋə tədzəm, tə̀ mbi nə̂ bə may.”