Read Weh Matyo 6 Bible Online

Matyo 6 - Weh bible

Matyo 6

¹Yeso n kəm dza tə ghə nə̀, “Ney na ghə̂mə zə, kə̂ ghaa nə̂ ghəŋŋənə ghəə a Kəzə̀ a ghaa ghə n sə̂ kə aghə̂ ni dii iwû nə̀ ghə̂ ghə i tɔʼɔ koʼo bə ghaa. Abə ghaa ghəŋŋənə sey, ghaa i keeli dzə way naamə kə loʼ kə n wɔ Bày ghaa idəŋ.”

²“I sey dii nə̀, abə ghaa fuunə wù laa n fə kə, kə̂ ghaa nə tɔŋɔnə ndɔŋ fə, tə̀ nghee ghə nəb ityim a ghəŋŋənə n ndaw tə udzəŋi tə ghə̂ a Təjuu nsə n faabə tə jìi. Ghə sey ghəŋŋə nə̀ ghə̂ ghə i kali tsuu ghə. N dza bə isəŋə tə̀ ghaa nə̀, ghə n sey keeli tən naamə kə ghə kə.

³Abə ghaa dza i fuu wù laa n gaamə zə, kə̂ ghaa nə ghəŋŋənə nə̀ wɔɔ kə ghaa kə kwɔɔ kə keeli fə key wɔɔ kə zə̂ə kə ghəŋənə.

⁴Sey nə̀ kə wù loʼ nə keelinə nə̀ wə mə fuu wù tii n gaamə zə. À loʼ Bày wə wey tə koʼonə ghəə ghey adzəm a tsəghənə nə kələm, tə i naamənə wɔ.”

⁵Yeso n nam dza ndow tə̀ ghə nə̀, “Abə ghaa dza i gɔŋŋə, kə̂ ghaa nə̂ ghəŋŋənə tə̀ a loʼ nghee ghə nəb ityim a ghəŋŋənə, n təŋkey, ghə ləghə ni təmi gɔŋŋə n ndaw tə udzəŋi tə ghə̂ a Təjuu nsə n faabə tə jìi sey nə̀, aghə̂ adzəm i koʼo bə ghə. N kuum dza bə tə̀ ghaa nə̀, ghə n sey keeli tən naamə kə ghə kə.

⁶Abə ghaa dza i gɔŋŋə, nyi ndòw n dzuu i ndaw zə, wə fii kɔʼ fuʼ u ndaw, wə gɔŋŋə ndòw tə̀ Bày wə̀ wey ghə koʼo way wi. Bày wə wey tə koʼonə ghəə ghey a tsəghənə nə kənyì i fuu wɔ n naamə kə.

⁷Abə wə gɔŋŋənə, ka i dza kuulə dzə ghəə ghə kənunu tə̀ a loʼ ghə̂ ghey ghə bəghəm way tə Zə̀ kə. Ghə moʼlə kə nə̀ Zə̀ kə i tɔʼɔ zow gɔŋŋə i ghə abə ghə gɔŋŋə daabənə.

⁸Kə̂ ghaa nə ghəŋŋənə tə̀ a loʼ ghə, n təŋkey, tə̀ ghaa ni bəb ighəə, à n loʼ nə̀ Bày ghaa n keeli zey fə key ghaa ləghənə.

⁹Sey, abə ghaa dza i gɔŋŋə, ghaa khə ni gɔŋŋə tsu nə̀, ‘Bày ghey idəŋ, Ghey gɔŋŋə nə̀ ghə̂ ghə i fuu kɔʼlə mə n zəd zə.

¹⁰Bə səd tsu fɔɔ wə wə̀ fa n mbi idzəm, Ghə̂ ghə i zow tə̀ wɔ fa aghəlitsə, tə̀ i loʼnə idəŋ.

¹¹Fuu ghey n fəzəə wey u kpiinə tə̀ ghey na.

¹²Neyzəə ghəə a ghey a bəbə ghə, Tə̀ ghey neyzəə soʼonə ghəə a bəbə ghey ghə̂ a loʼ a ghəŋənə tə̀ ghey.

¹³Kə wə nə bəghəm nə̀ vəətsəə a mɔm koʼ ghey, Kee bəghəshi kə ghey n wɔɔ kə avəətsəə.’

¹⁴Abə ghaa neyzəənə bəb zə aghə̂ zə, Bày ghaa idəŋ î neyzəə soʼo bəb i ghaa.

¹⁵Abə ghaa kee tuunə ni neyzəə bəb zey ghə̂ a ghəŋənə tə̀ ghaa, Bày ghaa idəŋ î neyzəə soʼo way ghəə a ghaa a bəbə ghə.”

¹⁶Yeso n dza tə̀ ghə nə̀, “Abə ghaa bamnə dzuu zə, kə ghaa nə njuʼu naŋŋənə koʼ tə tə̀ ghə nəb ityim a ghəŋŋənə, n təŋkey, ghə njuʼu naŋŋə tsuu təkoʼ tə̀ ghə̂ ghə koʼo bə nə̀ ghə bam idzuu. N dza bə isəŋə tə̀ ghaa nə̀ ghə n keeli tən naamə kə ghə kə.

¹⁷Abə ghaa bamnə dzuu ghə, tsoʼlə tsu na tûm usə̂ u ghaa wə, ghaa n saʼi kɔʼ kətow,

¹⁸kə̂ ghə̂ a nə koʼo keelinə nə̀ ghaa bam idzuu, a i khə kə Bày ghaa wey ghə̂ a koʼo way wi, sey, Bày ghaa wey tə kòʼonə ghəə ghey ghaa ghəŋŋənə nə kənyì, i naamə ghaa.”

¹⁹Yeso n dza kpiʼi ndow tə̀ ghə nə̀, “Kə̂ ghaa nə zuŋŋə naŋanə fə̂ u ghaa wə fa n mbi, n luʼu kən dzî tə loʼnə ni kwu, səsoʼo tə u loʼ soʼonə ni fə, nkee ghə̂ a tsɔŋɔ a loʼ ni bə tsɔŋ.

²⁰Fət nyì naŋa ndow na fə̂ u ghaa u səŋi wə idəŋ, n luʼu key tədzî nsə səsoʼo tə way ni kwu, ghə̂ a tsɔŋɔ a way ni ndow tsɔŋ soʼo.

²¹N təŋkey, wù gaʼa kə fə̀ŋ n luʼu key fə̂ u wi u səŋi u loʼnə tii.

²²Sə̂ a wù a loʼ tə̀ a loʼ kədaa tə̀ wû u wi wə udzəm. Abə sə̂ ghə a loʼ kədzuŋ, wû wə udzə̀m wə i loʼ n sə̂ a zow ghə.

²³Abə sə̂ ghə a way kədzuŋ, wû wə udzə̀m u sey loʼ nə kələm. Sey abə daa key kə loʼnə n kow wɔ lòʼ kələm, ləm kə tii kə i faalə.”

²⁴“Wù kəfwaʼ way ni keeli dzə ghə mûkəbii abəghə nəŋə imɔʼ. Abə tə ghəŋənə sey, tə i ləghə umɔʼ, bàa u loʼ wey, nkee tə i ngii ngɔɔmə umɔʼ, koʼo kìi u loʼ wey. A loʼ soʼo ighələ nə̀, wù way ni ləghə Zə̀ kə, tə i ləghə soʼo khəə wə.”

²⁵Yeso n daŋŋə dza tsu nə̀, “N dza n dza bə tə̀ ghaa nə̀, kə fə̀ŋ nə baŋanə ghaa n muu i ghaa nə̀ ghaa i zə̂ə kee, nkee nə̀ ghaa i mə̂ə kee tə̀ ghaa ni doʼo utaw. Kə fə̀ŋ nə̂ baŋanə ghaa n vən fə uwû fə ghaa, nə̀ ghaa i dzə̀ŋŋə kee. N dza ni keeli imuu, i tsəghəshi ni keeli ufəzəə ə? N dza vən fə uwû fə wù fə tsəghəshi təndzə̂ ə?

²⁶Koʼo na nnən mə ə, ghə zəghə way fəzəə wə, ghə kpey naŋa soʼo way fəzəə wə nə utaa, ghə nam kpuu koʼo tsə way dzəŋ, n təŋkey, Bày ghaa idəŋ laalənu tə̀ ghə. Tə i laalənu tə ghaa, n təŋkey, ghaa buʼ tsəghəshi nnən.

²⁷A loʼ ndee n fəŋŋə kə ghaa tə loʼnə ni kuu kpiʼi nyaŋi fə inəŋə n muu i wi fa n mbi a dza tə mə tɔʼ khə baŋ kə fəŋ ə?

²⁸Ghaa wû i ghaa baa fəmmə i kee zə bòʼ ghəə a təndzə̂ ə? Koʼo ndòw na nghee tə ghìi u nyîmmə tii, ghə fwaʼa way ni keeli təndzə̂, ghə taŋi soʼo way ndzə̂ tə ghə tə.

²⁹N nam kee dza bə tə̀ ghaa nə̀, kasə fɔ̀ɔ Solomun wən tə â ngii khənə ghaʼ zə, tə â khə way ndzə̂ tə dzuŋu tə tə̀ a loʼ kəghìi kəmɔ̀ʼ.

³⁰Abə Zə̀ kə loʼ ni dzəŋə təndzə̂ n kow ghìi wən u nyim kɔʼɔ na, ambə tsətsə nə̀ ghə sàŋ, kpəghə maʼa nə uvəllə, tə i boʼo laalə ngee tə ghaa a? A loʼ nə̀ bəghəm i fə̀ŋ zey ghaa khənə tə Zə̀ kə, i ngii təbənu.

³¹Sey, kə̂ fə̀ŋ nə baŋanə ghaa nə̀ ghaa i zə̂ə kee, nkee nə̀ ghaa i mə̂ə kee, nkee nə̀ ghaa i dzəŋŋə kee.

³²N təŋkey, ghə̂ ghey ghə ka bəghəm tə̀ Zə̀ kə, ghə nyəŋə n baa fə̂ u wən. Bày ghaa idəŋ khənu nə̀ ghaa ləghə soʼonu ni keeli fə u tii wə udzəm.

³³Fəd ndəmi ndow na wû zə n ghəə a fɔɔ u Kəzə̀ nsə ni loʼ tsətsəghə n sə K-a-zə̀, ghaa i keeli may fə̂ u tii wə udzə̀m.

³⁴Sey, kə̂ fə̀ŋ nə baŋanə ghaa nə̀ tsətsə î doʼlə ngee, n təŋkey, tsətsə khə soʼo ndəmə chɔd n wi n nəŋ. Tsuʼ fə loʼ fə way fə laʼanə fəm kə wi kə.”