Read Weh Matyo 7 Bible Online

Matyo 7 - Weh bible

Matyo 7

¹Yeso n dza tə ghə nə̀, “Kə̂ ghaa nə saʼanə wù, sey nə̀, kə̂ Zə̀ kə nə saʼa soʼonə ghaa.

²N təŋkey, jìi zey wə̀ saʼanə nuu tii, à loʼ soʼo sey Zə̀ kə î saʼanə wɔ. Laŋ wey wə neynə ni saʼ wù nuu tii, à loʼ soʼo laŋ u tii wə Zə̀ kə i neynə ni saʼ wɔ tii.

³À loʼ kee wə laalənə sala fə fəkaʼ fey n sə̂ i waazu, loʼ sey nə̀ wə kee khə bàŋ kə fəkaʼ n sə̂ zə ə?

⁴Wə zəghənu ni dza tə̀ waazu nə̀, ‘N waazə, bə tə̀ n shiələ nuu sala fə fəkaʼ fey fə loʼnə n sə̂ zə, loʼ sey nə̀ bàŋ kə fəkaʼ kə loʼ n sə̂ zə ə?’

⁵Nəb ityim tə̀ a loʼ wɔ, buʼ shiələ nuu kɔʼ dzə bàŋ kə fəkaʼ key n sə̂ zə, tə wɔ ni tɔʼ koʼ təluʼu ni shiələ nuu sala fə fəkaʼ fey n sə̂ i waazu.”

⁶“Kə̂ ghaa nə neynə fə u Kəzə̀ wə, ghaa fuu ndow tə̀ ghə̂ ghən ghə loʼnə tə a loʼ təbvə, n təŋkey, ghə loʼ ni kəm khə̂mə bə iwû, ghə ŋaŋi ghaa tə̀ bvə tə nə ŋaŋinə wù. Kə̂ ghaa nə̂ ney soʼonə fə u ghaa u dzuŋu wə, ghaa dzəŋə ndow n kow ghə̂ ghey ghə loʼnə tə̀ à loʼ ufelibu, n təŋkey, ghə loʼ ni ney nyuʼ maʼa nə kətsaʼ tə a loʼ kəfelibu.”

⁷Yeso n dza tə̀ ghə nə̀, “I bəbə na fə̂ key ghaa ləghənə n wɔ Zə̀ kə, Zə̀ kə i fuu bə tə̀ ghaa. I kəŋə tsu na, ghaa i koʼ. Buʼ na bàʼ kə, Zə̀ kə i chi tsu tə̀ ghaa.

⁸N təŋkey wù wey tə bəbnə fə kə, Zə̀ kə i fuunu tə wi. Wù wey tə kəŋənə, tə î koʼonu. Zə̀ kə î chiənu baʼ kə tə̀ wù wey tə buʼnə baʼ kə.

⁹À loʼ wù ghaa u ghaa wə tə i fuunə waa wi n tay zə, loʼ sey nə̀ waa wi mə nɔɔ wi n baa kə ə?

¹⁰Nkee abə tə nɔɔnə wi n tsəghə zə, tə î fədlə fuunə wi n zuu ə?

¹¹Abə ghaa loʼnə ni fuu fə̂ u dzuŋu wə tə̀ waa a ghaa ghə, loʼ sey nə̀ ghaa bəbənu, Bày ghaa idəŋ î sə̀ boʼo fuu ngee fə̂ u dzuŋu wə tə̀ ghə̂ ghey ghə nɔɔnə tə̀ wi ə?

¹²Sey ghaa i ghəŋŋə ndòw ghəə ghə tə̀ ghə̂ ghə nghee tə̀ ghaa ləghənə nə̀ ghə i ghəŋŋə bə soʼo tə̀ ghaa. À wən loʼ ndzoʼo doʼo zey laŋ kə Mushi nsə Tûm tə Kəzə̀ tə diinə.”

¹³Yeso n dza kpiʼi ndow tə̀ ghə nə̀, “Tsəghə na n fuʼ u mbàa u təbə wə ni ndow n fɔɔ u Kəzə̀, n təŋkey, fuʼ u mbàa wey u downə, jìi tii dow dzɔbə soʼonu, u ney ndòw wù n luʼu kə uchɔd. Ndəmə aghə̂ a loʼnu ghə neynə ndzoʼo jìi i tii zə.

¹⁴Fuʼ u mbàa wey u ney ndòw wù n luʼu key tə i keelinə muu zə itsali zə, u təbənu, jìi fə tii fə a fwɔli loʼ soʼonə, à fu tii tsəghə kə sə̂ fə aghə̂.”

¹⁵Yeso n dza tə̀ ghə nə̀, “Ney na ghə̂mə zə n tûm tə Kəzə̀ tə tsɔŋɔ tə. Ghə buulə bəghə n səə ghaa tə̀ a loʼ tənjì, loʼ sey nə̀ n fə̀ŋ tə ghə, ghə bəbə faalə tə a loʼ ubəghə.

¹⁶Ghaa i koʼo keeli ghə n ghəə a ghə à ghəŋŋə ghə. Wù way ni kɔy təlami nə ukaakaa nkee tə kɔy mmbuŋŋə n kaʼ fə təmgbii.

¹⁷Kaʼ fə dzuŋu fə mə̂ə bə kə tam u dzuŋu wə. Kaʼ fə bəbə fə mə̂ə bə kə tam u bəbə wə.

¹⁸Kaʼ fə dzuŋu fə way ni mə̂ dzə tam u bəbə wə. Kaʼ fə bəbə fə u way soʼo ni mə̂ tam u dzuŋu wə.

¹⁹Abə kaʼ fə mə̂ə way tam u dzuŋu wə, ghə n fùŋ maʼa tsu, kpəghə ndòw nə uvəllə.

²⁰Sey, ghaa î koʼo keeli kə ghə n tam u ghə.”

²¹Yeso n nam dza ndow tə̀ ghə nə̀, “À way dzə aghə̂ adzəm ghə ngɔɔmənə mə nə̀, ‘Mûkəbii, Mûkəbii’, ghə î nyiənə n fɔɔ u Kəzə̀. À may kə wù wey tə ghəŋŋənə ghəə ghey a kpiilənə tə̀ Bày wuŋ wən tə loʼnə idəŋ.

²²Ndəmə aghə̂ ghə i dza tə̀ mə n tsuʼ fey Zə̀ kə i saʼanə mbi tii nə̀, ‘Mûkəbii, Mûkəbii, n dza ghey â naʼlə tûm Kəzə̀ n zəd zə ə? A n dzùm shi avəətsəə n kôw ghə̂ ghə n zəd zə, fwaʼ ndəmə ghəə a faalə ghə n zəd zə.’

²³Mə i fəd dza ndow tə̀ ghə nə̀, ‘Nuu na n səə mə, ghaa loʼ ghə̂ a bəbə ghə, n khə koʼ tsə way ghaa.’”

²⁴Yeso n dza tə̀ ghə nə̀, “Wù wey tə zownə ghɔɔmə zuŋ zən, ghəŋŋə ndòw ghəə ghey n dzanə, loʼ tə̀ à loʼ wù tɔbə wey tə â dza i bəghə ndaw, tə n səd tsu dzə tsə̂ kə tii kə nə atay.

²⁵Ghôw zə n tsu n ndaw tii, dzuu tə n luu tsən bə ndaw tii, zəŋ n tən ndaw tii, ndaw tii n ka tsəm beeli, n təŋkey, ghə â səd tsə̂ kə tii kə nə atay.

²⁶Wù wey tə zownə ghɔɔmə zuŋ zə, ghəŋŋə way ghəə ghey n dzanə, loʼ tə̀ à loʼ wù laʼlə wey tə â bəghənə ndaw wi nə kəsəsay.

²⁷Ghow zə n tsu bə, dzuu tə n luu bə tsən bə ndaw tii, zəŋ n tən ndaw tii, zə n maŋ beeli, dəm kə tii kə n tsu sa jàʼ!”

²⁸Ambə Yeso ghɔɔmə may tsunə ghəə ghən, dzuu zə n ngii zum nɔɔ kə aghə̂ key kə â loʼnə fu bòʼ jìi zey tə â diinə ghəə ghə tii.

²⁹Tə â dii ghə n ghəə ghə tə̀ à loʼ wù wey tə khənə daʼa kə ni ghəŋə ghəə a tii ghə, â way dzə tə à loʼ ghə̂ a dii a kəlaŋ ghə.