Read Weh Malakus 11 Bible Online

Malakus 11 - Weh bible

Malakus 11

¹Ambə ghə kuʼlə ndòwnə n Yerosalem, n səə naʼ i Betfaj nsə Betani, ghə n ndòw bə n kaʼ u Oliv. Yeso n tûm ndòw ngəd tə wi təbəghə isə̂,

²dza tə̀ ghə nə̀, “Ndòw na n naʼ zey i loʼnə isə̂. Nghee tə̀ ghaa nyiə ndòwnə, ghaa i koʼ waa fə fənjakas ghə faŋa naŋanə nə̀ wù ka kam kɔʼ koʼ tii. Ghaa i zìi tsu ghaa ney bə fa.

³Abə wù loʼ bəbnə tə̀ ghaa nə̀, ‘Ghaa sey jiə ngee.’ Ghaa i dza ndòw tə̀ wi nə̀, ‘Mûkəbii khə kəfwaʼ tii, abə tə mayyə tsunə, tə i daŋŋə tûm dzəŋŋə bə.’”

⁴Sey ghə n nuu i ndòw, bɔɔmə ndòw koʼ ndòw soʼo Njakas fey n jìi nə̀ ghə n təŋə naŋa n fuʼ u ndaw u loʼ wə. Ambə ghə zìilənə,

⁵Ghə̂ a loʼ ghə, ghə â teynə fu n bəb tə̀ ghə nə̀, “Ghaa sey jiə ngee, ghaa ziilə Njakas fey nə̀ a loʼ kee?”

⁶Ghə n bɔɔmə beeli ndòw ghə tə̀ Yeso mə dzanə, ghə̂ a tii ghə n zəghə tsu ghə nə̀ ghə ney ndow.

⁷Ambə ghə ney bə Njakas fey n səə Yeso, ghə n zey kɔʼ ndòw təndzə̂ n dzəmə fə ghi, Yeso n kɔʼ doʼo kɔʼ tii nə fənjakas.

⁸Ndəmə aghə̂ n zey bə ndzə tə ghə n jìi, a loʼ ghə n gboo bə utsəghə, bə tsuŋŋə bə n jìi ni fuu nkɔʼlə tə̀ wi.

⁹Ghə̂ ghey ghə â loʼnə n sə kə wi nsə ghə̂ ghey ghə â loʼnə ibam n buʼlə bə nbɔŋ dza nə̀, “Kali u loʼ tə Zə̀ kə, buulə i Kəzə̀ i lo tə̀ wù wey tə bəghənə n zəd i Mûkəbii.

¹⁰Buulə i loʼ tə̀ wù wey tə saʼanə fɔɔ u ghə bày a ghey wən u bəghənə tɔŋŋə fɔɔ Devid. Zɔŋ u Kəzə̀ u fuŋ nay ndow idəŋ idəŋ!”

¹¹Yeso n nyi ndòw n Yerosalem, ndòw nyi ndòw n ndaw Kəzə̀ i nii zə, laalə tsəghə ndòw luʼu tədzəm ni koʼ ghəə ghey a neynə bənə kə fu. A n loʼ nə̀ nəŋə zə n ngii ndòw, sey, tə nuu dzəŋŋə ndòw n naʼ i Betani ghi ngəd tə wi tey ighəm n ghii tə təbəghə.

¹²Ambə tsətsə wey, nghee tə̀ ghə nuu bənə n naʼ i Betani, dzəŋ n zabə Yeso.

¹³Tə n koʼ ndòw kaʼ fə fik nə kədaa nə fəbə tə wi tə n dzəə, sey, tə n ndòw fu ni ndòw koʼ nə̀ tə nə kpaʼi keelinə tam u loʼ wə fu ni nəghə. Ambə tə ndòwnə fu, à n loʼ kə təfəbə, boʼnə â kam way dzə nəŋə zey kaʼ fə tii fə məənə.

¹⁴Yeso n lɔʼ ndòw kaʼ fə tii fə dza nə̀, “Wə nə kəm mə̂ koʼ way tam kə tə̀ mbi nə bə may.” Ngəd tə wi tə n zow tsu ghəə ghey tə dzanə tə̀ kaʼ fə tii fə.

¹⁵Ambə ghə n ndòw nyi ndòwnə n Yerosalem, Yeso n nyi ndòw n ndaw Kəzə̀ i nii zə, kaʼ ni dzùm shi ghə̂ ghey ghə â ghəŋŋənə bikiwən kə fu. Tə n fədlə maʼa kɔʼ baŋŋə kə ghə̂ ghey ghə a kweyyə fuunə khəə wə, nsə kuu u ghə̂ ghey ghə â fìilənə buŋu tə.

¹⁶Tə n ka bəghəm nə̀ ghə̂ a bə tsəghə tɔɔlə n fə wə fu n bii kə ndaw Kəzə̀ i nii zə n Yerosalem.

¹⁷Tə n dza tə̀ ghə̂ ghə nə̀, “I loʼ n màʼlə K-a-zə̀ nə̀ Zə̀ kə dzanə, ‘Ndaw zuŋ i doʼlə ndaw i gɔŋŋə zə tə̀ naʼa tə tədzəm.’ Ghaa u ney kee ney naŋa kɔʼnə nə̀ a loʼ luʼu key ghə̀ a tsɔŋɔ a nyiə doʼonə tii.”

¹⁸Ghə fɔɔngili a nii ghə nsə ghə̂ a dii a kəlaŋ ghə n zow tsu sey, kaʼ ni kəŋ təjìi ni wey Yeso. Ghə n kee tsəŋə ni kwu wi n təŋkey, ghə̂ adzəm â ləghənu ghəə ghey tə diinə.

¹⁹Ambə n nəŋə i fənə zə, Yeso nsə ngəd tə wi tə n zəghə tsu naʼ i tii zə.

²⁰Ambə n bələbələ tə, Yeso ghi ngəd tə wi tə n tsəghə n jìi, ghə n koʼ ndòw kaʼ fə Fik fey nə̀ fə n kpu tsu kùm nə təghaŋ.

²¹Pita n daŋŋə moʼlə tsu ghəə zey zə â shinə, dza tə̀ Yeso nə̀, “Wù dii wə, koʼo kaʼ fə Fik fey wə â lɔʼnə, fə n kpu.”

²²Yeso n beeli ndòw ghə dza nə̀, “Ghaa khə ni keeli bəghəm i fə̀ŋ tə̀ Zə̀ kə.

²³N kùum dza bə isəŋə tə̀ ghaa nə̀, abə wù ghaa u loʼ u dza tsunə tə̀ kaʼ u wən nə̀, ‘Zəb kɔʼ wû wə wə̀, wə bwù ndòw n dzùu’, nə̀ tə səmə way, keeli tən tsu ibəghəm n fə̀ŋ ə wi, zə i teeli doʼo sey.

²⁴Sey, n dza bə tə̀ ghaa nə̀, abə wə bəbnə fə kə nə igɔŋŋə, keeli tsu bəghəm zə n fə̀ŋ nə̀, wə n keeli fə kə tii kə. Wə i keeli fə kə ghaa kə wə mə bəbnə.

²⁵Abə wə gɔŋŋənə, neyzəə ghə i bəbə zey wù loʼ ghəŋənə tə̀ wɔ, sey nə̀ Bày wə idəŋ i neyzəə soʼo ghəə ghə a bəbə ghə.”

²⁶[Abə wə ka neyzəə ghə̂ a loʼ ghə, Bày wə idəŋ î neyzəə soʼo way ghəə a bəbə ghey wə ghəŋənə tə̀ ghə̂ a loʼ ghə.][6]

²⁷Ambə Yeso ghi ngəd tə wi tə ndow bə kpiʼinə n Yerosalem, Yeso n bwey tsəghə kaabə ndow n fə̀ŋ ə ndaw Kəzə̀ i nii zə n Yerosalem. Ghə fɔɔngili a nii ghə, ghə̂ a dii a kəlaŋ ghə, nsə ngəd tə inaʼ tə n ndòw bə n səə wi,

²⁸bəb tə̀ wi nə̀, “Wə khə daʼa kə ghaa kə ni ghəŋə ghəə ghey wə ghəŋŋənə ə? A fuu ndee wɔ n daʼa kə tii kə?”

²⁹Yeso n beeli ndòw ghə dza nə̀, “N dza n bəb bə ghaa n ghə zə imɔʼ, abə ghaa beelinə, mə i dza bə soʼo tə̀ ghaa ndzoʼo daʼa key n khənə ni ghəŋŋə ghəə ghən.

³⁰Ghaa dza bə tə mə, Jɔn â ney ghee daʼa kə ni fuu ghə̂ ghə n mmuu n Kəzə̀ mə ə? Â loʼ n wɔ Zə̀ kə idəŋ kə mɔ n wɔ wù ə?”

³¹Ghə n kaʼ ni ghɔɔmə n wû i ghə dza nə̀, “A dza ndòw nə̀ ngee? Abə a dza tsunə nə̀, ‘Â loʼ n wɔ Zə̀ kə idəŋ kə,’ tə i bəb bə nə̀, ‘A sə loʼ kee ghaa â ka bəghəm tə̀ Jɔn ə?’

³²Abə saa kee dza tsunə nə̀, ‘Â loʼ n wɔ ghə̂ ghə’, zə i bweynu ə?” (Ghə â tsəŋə aghə̂, boʼnə ghə̂ ghə â khə nə̀ Jɔn â ndzəm loʼ Wù tûm Kəzə̀).

³³Sey ghə n dza tə̀ Yeso nə̀, “Ghey khə dzə way.” Yeso n dza tə̀ ghə nə̀, “Mə î dza soʼo way tə̀ ghaa luʼu key n neynə ndzoʼo daʼa key n khənə ni ghəŋə ghəə ghey n ghəŋŋənə.”