Read Weh Malakus 12 Bible Online

Malakus 12 - Weh bible

Malakus 12

¹Sey Yeso n zey ndòw ni ghɔɔmə tə̀ ghə n ghɔɔmə i fənkəfən dza nə̀, “Wù loʼ a zə̀ghə tsu sum u kaw tən tə məənə tam wən ghə faalənə lə̂mə a tii, tə n bày tsəghə kɔʼ mbàa fu n sum u tii wə, tə n bow naŋa kɔʼ kənyùʼ ni kammə lə mən n shiə bənə nə təlami, tə n bəghə naŋa kɔʼ soʼo kəfəə tə̀ ghə̂ a keyyə ghə. Tə n daŋŋə tsoʼo naŋa ndòw sum u tii wə tə̀ ghə̂ ghə usum a loʼ ghə, nuu ndòw n naʼ i nuu zə.

²Ambə nəŋə i kpii tsunə ni ndow kɔy fən bə lami tey, tə n tûm ndòw wù kəfwaʼ a wi u loʼ wə fu tii, nə̀ tə ndòw koʼ ndòw ghə̂ ghey tə â tsoʼo naŋanə sum wey n wɔ ghə tə̀ ghə fu bə tuʼ i wi.

³Nghee tə wù tii ndòwnə fu, ghə̂ a tii ghə n kwu bwɔd tsu wù kəfwaʼ wey, dzùm dzəŋŋə ndòw wi n wɔ a zum ghə.

⁴Muu usum wey n tûm kpiʼi ndòw wù kəfwaʼ u loʼ wə, ghə n kwu tsɔb wi nə kətow, nyab soʼo wi n jìi i bəbə zə.

⁵Muu usum wey n nam tûm kpiʼi ndòw u loʼ wə, ghə n wey maʼa tsu wi. Muu usum wey n tûm ndòw ndəmə aghə̂ fu, ghə n bwɔd a loʼ ghə, wey maʼa a loʼ ghə.

⁶Wù tii â khə kə waa wi umɔʼ tə â ngii ləghənə. Tə n baa bə tûm ndòw wi dza nə̀, ‘N moʼo ghə̂ ghən ghə i ngɔɔmənu waa wuŋ.’

⁷Ambə, ghə̂ ghey ghə â tsoʼo neynə sum wey koʼ tsunə wi, ghə n dza tsu n wû i ghə nə̀, ‘À wən loʼ zəə kəbii, bə na a wey tsu wi, tə̀ a keeli sum u tii wə.’

⁸Sey, ghə n kwu wey tsu waa wi, boʼo maʼa shi ndòw n mbàa.”

⁹Ambə Yeso ghɔɔmə may tsunə, tə n bəb tə̀ ghə nə̀, “Ghaa moʼo nə̀ muu sum u təlami wey i jiə tsuu ngee? Tə î bə wey maʼa ghə̂ ghə usum ghey, tə fu nuu ndòw sum u tii wə tə̀ ghə̂ a nuu ghə.”

¹⁰N moʼlə nə̀ ghaa n tɔŋɔ koʼ ghəə ghən n màʼlə K-a-zə̀, a dzanə nə̀, “Tay zey wù bɔm u təndaw wə â tuu maʼanə, A fəd loʼ i ghii i bə doʼo bənə num itay n tsə kə ndaw.

¹¹À fwaʼ Mûkəbii ghəə a tii ghə, Zə a ngii laabənə n sə̂ a ghey.”

¹²Ghə fɔɔngili a nii ghə, ngəd tə inaʼ tə ghə̂ a Təjuu nsə ghə̂ a dii a kəlaŋ ghey n kəŋə jìi ni kwu wi, n təŋkey, ghə â khənu nə̀ tə khəə ghɔɔmə i fənkəfən zən bòʼ ghə. Ghə n kee tsəŋə nɔɔ kə aghə̂ key, sey, ghə n zəghə tsu wi, nuu ndòw i ghə zə.

¹³Ghə n tûm tsu ghə̂ a tə Falasi nsə ghə̂ a Helɔd a loʼ ghə nə̀ ghə bə bìi kwu Yeso n ghɔɔmə i wi.

¹⁴Ghə̂ a tii ghə n bə dza bə tə̀ wi nə̀, “Wù dii wə, a khənu nə wə dza kə isəŋə, wə̀ ghəŋŋə ghəə ghə nə wə laalə way wù nə asə̂. Wə dii ghɔɔmə i Kəzə̀ tsətsəghə tə̀ ghə̂ ghə. A ləghə ni keeli nə̀, laŋ kə diinu nə saa i tsow màʼlə kə tə̀ Kaysa mɔ kə dii way ə?”

¹⁵Yeso n kee khə moʼlə tə bəbə tey ghə khənə n fə̀ŋ tə ghə, sey tə n bəb ndòw tə̀ ghə nə̀, “A loʼ kee ghaa bii kaabənə mə ə? Tə n dza tə̀ ghə nə̀, fuu bə na mə n khəə wə itsaa wə fa tə n koʼ.”

¹⁶Ghə n ney fu bə tə̀ wi. Tə n bəb tə̀ ghə nə̀, “À wən loʼ tûm usə̂ u ndee? À wən loʼ zəd i ndee?” Ghə n dza nə̀, “À loʼ tow kə Kaysa nsə zəd i wi zə.”

¹⁷Sey Yeso n dza tə̀ ghə nə̀, “Fuu na tə̀ Kaysa fə wey u loʼnə u wi wə, ghaa fuu ndòw tə̀ Zə̀ kə fə wey u loʼnə u wi wə.” Dzuu zə n ngii zum ghə n jìi zey tə a beelinə ghə tii.

¹⁸Ghə̂ a Sadusi ghən ghə dzanə nə̀ zhəm dzəŋŋə zə ivə i way, n ndòw bə, bəb tə̀ Yeso nə̀,

¹⁹“Wù dii wə, Mushi â tɔ̀ɔ naŋa laŋ kə loʼ kə tə̀ ghey nə̀, ‘Abə wù kpunə naŋa sə̂ tsu wey wi nə ghə ka waa ji, waazə ə wi khə ni nyəŋŋə ndòw weyzən wey, tə̀ tə ji fuu ndòw wù kpu wey n waa.’

²⁰Waazə a loʼ ghə â loʼ tsənu tow ghə usəghəmbəghə. Wù sə̂ isə wey n ney ndòw wey, bə kpu nə̀ tə ka waa ji.

²¹Waazə ə wi n ney ndòw wey kpusə u tii wə, bə kpu soʼo nə̀ tə ka waa ji. Zə n bə shi kɔʼ soʼo sey ghi waazə wey tə â dzûmə ndòwnə wi.

²²Sey, tow ghə usəghəmbəghə ghə n ney tsəghə ndòw weyzən wey, bə kpu nə̀ ghə ka waa ji. Weyzən wey n baa bə kpu tsu i soʼo.

²³Nya, abə ghə î zhəm dzəŋŋə bənə nə̀ ivə, tə i baa loʼ wey ndee? N təŋkey tə ma tow ghə usəghəmbəghə ney.”

²⁴Yeso n beeli ndòw ghə nə̀, “Ghaa n bwù, bòʼ nə̀ ghaa khə way ghɔɔmə i Kəzə̀ zə, khə soʼo way daʼa K-a-zə̀ kə.

²⁵N dza sey n təŋkey, ghə ney way wû zə abə ghə zhəm dzəŋŋə bənə nə ivə, ghə nə fəd loʼ tə a loʼ tstəndəghə tə Kəzə̀ idəŋ abə ghə zhəm dzəŋŋə bə nə ivə.

²⁶Nya, n ghɔɔmə bə tə̀ ghaa bòʼ zhəm dzəŋŋə zə ivə, ghaa ka kam tɔŋɔ koʼ n màʼlə kə Mushi n luʼu key vəllə wə â fəə nə fəkaʼ a? Zə̀ kə â dza tə̀ Mushi nə̀, ‘N loʼ Zə̀ kə Abraham, Zə̀ kə Ayzik, nsə Jakob.’

²⁷Tə way dzə Zə̀ kə ghə̂ a kpu ghə, tə loʼ Zə̀ kə ghə̂ ghey ghə loʼnə utaw. Ghaa n nyəŋ laʼ nay.”

²⁸Wù dii u kəlaŋ u loʼ wə n ndòw bə fu, zow tsu nghee ghə ghɔɔmə baalənə. Ambə tə koʼ tsunə nə̀ Yeso n beeli dzɔb ghə̂ a Sadusi ghey, tə n bəb ndòw tə̀ wi nə̀, “A loʼ laŋ kə ghaa kə, kə loʼnə laŋ kə sə isə kə nə ulaŋ udzəm ə?”

²⁹Yeso n beeli ndow ghə nə̀, “Laŋ kə sə isə kə loʼ nə, ‘Ghaa zow a waa ghə Izree ghə! Yawe loʼ Zə̀ kə ghey, a may kə wi tə loʼnə Zə̀ kə.

³⁰Wə khə ni ləghə Yawe, tə loʼnə Zə̀ kə kə̀, n fə̀ŋ zə idzəm, zay kə kə̀ kədzəm, n moʼlə zə zə̀ idzəm, n daʼa kə kə̀ kədzəm.’

³¹Laŋ key kə dzûmənə kə kən loʼ nə̀, ‘I ləghə waazə wə, tə̀ wə ləghənə wû wə wə̀.’ Laŋ kə loʼ kə kəm way dzə kə tsəghəshinə u wən ubəghə.”

³²Wù dii u kəlaŋ wey n dza tə̀ Yeso nə̀, “Wù dii wə, wə n dza dzɔb isəŋə nə̀ Zə̀ kə loʼ kəmɔʼ, kə loʼ kə kəm way dzə, a may kə wi.

³³Wə dza dzɔb soʼnu nə̀, saa khə ni ləghə wi n fə̀ŋ idzəm, n tɔb wə udzəm, nsə n daʼa kə kədzəm nsə nə̀ wù khə ni ləghə wù wey tə kuʼlə loʼnə n səə wi tə̀ tə ləghənə wû u wi. I zən tsəghəshi kaŋ tə nyam tən saa fəələnə nsə nyam tən saa nyɔʼɔ tə a loʼ umaʼlə tə̀ Zə̀ kə.”

³⁴Ambə Yeso koʼ tsunə nə̀ tə n beeli dzɔb, tə n dza tə̀ wi nə̀, “Wə n kuʼlə n fɔɔ u Kəzə̀.” Ni nuu tsu n nəŋə i tii zə, ndòw n sə kə, ghə̂ ghə n tsəŋə ni kəm bəb Yeso n ghəə zə.

³⁵Ambə Yeso diinə n ndaw Kəzə̀ i nii zə n Yerosalem, tə n bəb tsu nə̀, “Ghə̂ a dii a kəlaŋ a loʼ ngee ni dzanə Klisto loʼ waa Devid?

³⁶Lòʼ sey nə̀ Devid â dza n daʼa kə Zay kə Zow kə bòʼ Klisto nə̀, ‘Yawe â dza tə̀ Mûkəbii wuŋ nə̀ Doʼo tsu n kpii wuŋ u təmə wə Ni ndòw kuum n nəŋŋə zey mə i ney naŋŋə bənə ghə̂ a təngəmə ghə ghə̀ n tənə ifuu zə.’

³⁷Devid â tɔŋɔ wi nə̀ a loʼ ‘Mûkəbii’, tə̀ sə̀ loʼ ngee ni kəm loʼ waa wi ə?” Nɔɔ kə aghə̂ key kə â loʼnə fu n zəllə tənə ghɔɔmə i wi n fə̀ŋ idzəm.

³⁸Nghee tə diinə, tə n dza tə̀ ghə nə̀, “Ney na ghə̂mə zə ghi ghə̂ a dii a kəlaŋ ghə, ghə ləghə ni bwey kaabə nə̀ ghə n wû i lab nə təsaŋ, ləghə nə̀ ghə i tɔŋŋə zow bə ghə n bikiwən.

³⁹Ghə kəŋə ndòw kuu u nii wə n ndaw kədzəŋi ə ghə̂ Təjuu nsə n luʼu tey zə̂ kə loʼnə a tii.

⁴⁰Ghə baŋŋə ney nuulə fə̂ u ghey a kpusə, ləghə ni gɔŋŋə daabə tə̀ ghə̂ ghə i tɔʼɔ koʼo bə ghə. Ngoʼ zey Zə̀ kə nə fuu n wɔ ghə nə faalənu.”

⁴¹Nghee tə Yeso â doʼnə n səə khəə key ghə kuunə naamə K-a-zə̀ kə tii, tə n laalə nghee ghə̂ a kɔʼɔ kuunə khəə wə. Ndəmə ghə̂ a kûm ghə n kɔʼɔ kuu khəə u səŋi wə.

⁴²Weyzən ə kpusə u loʼ wə tə̀ â laanə, n ndow bə, kuu nyi tsu khəə u baŋa wə ubəghə nə̀ u ka buʼ kɔʼ kuum fòw fə.

⁴³Yeso n tɔŋɔ tsu ngəd tə wi, dza tə̀ ghə nə̀, “N dza bə isəŋə tə̀ ghaa nə̀, wey kpusə wən n kuu khəə wə fa tsəghəshi aghə̂ adzəm.

⁴⁴Ghə̂ a loʼ ghey dzəə shiə bə fənyaŋi n ndəm zey ghə khənə, wey kpusə wən u kee fuu may bənə fə key tə khənə, n laa i wi, tə fuu may bə fə key tə mə khənə ni muu tii.”