Read Weh Malakus 15 Bible Online

Malakus 15 - Weh bible

Malakus 15

¹Ambə tsuʼ u zow tsunə, ghə fɔɔngili a nii ghə, ngəd tə inaʼ, ghə̂ a dii a kəlaŋ ghə, nsə ghə̂ a ndaw tsə ghə adzəm n kwu tsu kədzəŋi ni sallə aghəə. Ghə n kùm tsu Yeso nə tətsaʼ, ney nuu ndòw wi, ndòw fuu tsəghə ndòw wi tə̀ Pilato.

²Pilato n bəb tə̀ wi nə̀, “Wə loʼ də̀ŋ kə ghə̂ a Təjuu ə?” Yeso n dza nə̀, “I loʼ tə̀ wə dzanə.”

³Ghə fɔɔngili a nii ghə n kwɔɔ wi n ndəmə tə aghəə.

⁴Pilato n bəb kpiʼi tsu tə̀ wi nə̀, “Zow ndəmə ghəə ghey ghə kwɔɔnə wɔ tii, wə beeli way ə?”

⁵Yeso n ka beeli kìi shi ghə i loʼ zə, ghə i tii zə n tsəghə shi daŋŋə Pilato.

⁶Zə â loʼ nə̀, n nəŋə i Zə̂ kə Taa zaʼa kə, Pilato â bəghə tə n zəghə maʼa shi ndòw wù ndaw tsaʼ wey ghə̂ a Təjuu a bəbnə tə̀ wi.

⁷Wù loʼ n loʼ fu n ndaw tsaʼ ghə â tɔŋŋənə nə̀ a loʼ Barabas, ghə â fìi naŋanə wi nə̀ tə wey wù n ngəd key ghə â zuulə baalənə ghi ghə̂ ghey ghə saʼanə̀ naʼ i Roma n təŋkey ghə â ləghə way jìi zey ghə â saʼanə tii.

⁸Nɔɔ kə aghə̂ kə n dzəŋi bə ni bə dza nə̀ Pilato zəghə shi bə wù tə̀ tə a ghəŋŋə tsənə,

⁹tə n dza tə̀ ghə nə̀, “Ghaa ləghənu nə̀ n fuu shi bə ghaa n də̀ŋ kə ghə̂ a Təjuu kə ə?”

¹⁰Tə â bəb sey n təŋkey tə â khənu nə̀ ghə fɔɔngili a nii ghə â fuu nuu bə Yeso tə̀ wi n təŋkey ghə â ghoʼonu.

¹¹Ghə fɔɔngili a nii ghey n kuu tənyɔʼ tə̀ ghə̂ ghey nə̀ ghə dza ndòw tə̀ Pilato nə̀ tə fuu shi bə ghə n Barabas.

¹²Pilato n kəm dza ndòw tə̀ ghə̂ ghey nə̀, “Ghaa nya ləghə nə̀ n ji ngee ghi wù wey ghaa dzanə nə̀ tə dza nə̀ i loʼ də̀ŋ kə Təjuu ə?”

¹³Ghə n dza shi kɔʼ nə̀, “Baa na wi n zat kə fəkaʼ.”

¹⁴Pilato n bəb tə̀ ghə nə̀, “N kee? Tə ghəŋə ghə i bəbə i ghaa zə.” Ghə n fədlə buʼu shiə kɔʼɔ kə nbɔŋ nə̀, “Baa na wi n zat kə fəkaʼ.”

¹⁵Pilato n ləghə ni ghəŋə ghəə zey nɔɔ kə aghə̂ key ləghənə, sey, tə n chi zəghə tsu Barabas, fuu ndòw tə̀ ghə. Fuu ndòw Yeso nə̀ ghə bwɔd wi. Ambə ghə bwɔd tsunə wi, tə n daŋŋə fuu nuu ndòw wi nə̀ ghə ndòw baa wi n zat kə fəkaʼ.

¹⁶Sawgoʼ tey n ney nyi ndòw Yeso n fə̀ŋ ə bii kə gɔvənɔ, tɔŋɔ may bə sawgoʼ tə loʼ tey n saʼ kə tii kə.

¹⁷Ghə n dzəŋə kɔʼ Yeso n ndzə tə baŋa tə loʼ tə tə a loʼ ndzə tə kədə̀ŋ, faalə tsu taŋŋə kə fɔɔ nə təmgbii, dzəŋə naŋa kɔʼ n tow kə wi.

¹⁸Ghə n kaʼ ni tɔŋɔ zow wi dza nə̀, “Mbee, dəŋ kə Təjuu!”

¹⁹Ghə n kùm wi nə kətow n mbaŋ, tsə ntəghə n kow wi, təm ndòw tə tənguʼ n tənə wi, kum ndow kətow n tənə wi ghə ngɔɔmənə wi.

²⁰Ambə ghə lənnə kow tsunə wi, ghə n tsɔʼ nuu kɔʼ ndzə tə baŋa tey n kow wi, dzəŋə dzəŋŋə kɔʼ ndzə tə wi, daŋŋə ney ndòw wi ni ndòw baa n zat kə fəkaʼ.

²¹Nghee tə̀ ghə ndòwnə n jìi, ghə n kpiilə ndòw ghi wù loʼ zəd i wi i loʼnə nə̀ a loʼ Shimun, tə â nuu bənə n naʼ i Sirin, nyiə bə n naʼ i tii zə. Sawgoʼ tey n tənnə wi nə̀ tə boʼo zat kə fəkaʼ kə Yeso (Shimun â loʼ bày Alekzanda nsə Rufus).

²²Ghə n ney ndòw Yeso n luʼu key ghə tɔŋŋənə nə̀ a loʼ Gɔgɔta, i diinə nə̀, “Luʼu kə kaŋ K-a-tow.”

²³Ghə n dəmə ni fu wi n nlə mə nə̀ ghə n nyɔmə n tey u taw u loʼ wə ghə tɔŋŋənə nə̀ a loʼ Maya, Yeso n tuu ni mə̂.

²⁴Ghə n daŋŋə baa tsu wi n zat kə fəkaʼ, dzawwə tsu ndzə tə wi n wû i ghə nə̀ ghə təm mbuʼ ni keeli bad key kay wù khənə ni ney.

²⁵Ghə â bəd baa wi n zat kə fəkaʼ nə tənəŋə tətaandzuu (sə̀ kə tsə).

²⁶Ghə n tɔ̀ɔ naŋa kɔʼ n zat kə fəkaʼ kə wi nə̀, zuŋ key ghə tsəʼlənə saʼ n tow kə wi tii loʼ nə̀, “Də̀ŋ kə Təjuu.”

²⁷Ghə n baa naŋa kɔʼ soʼo ghə̂ a tsɔŋɔ ghə abəghə n zat kə fəkaʼ ghi wi, umɔʼ n kpii u wi u təmə wə, u loʼ wey n kpii u wi u kwɔɔ wə.

²⁸[Zə â shi sey ni bə luulə tsu ghəə zey i tɔ̀ɔ doʼonə n màʼlə K-a-zə̀ nə̀, “Ghə â taŋ dzəŋi wi ghi ghə̂ a bəbə ghə.”][7]

²⁹Ghə̂ ghey ghə â tsəghənə n jìi, n soʼo kətow, kpaalə Yeso dza nə̀, “Ahaa! N dza wə â dza nə̀ wə i saʼa maʼa ndaw Kəzə̀ i nii zə n Yerosalem, wə bəghə dzəŋŋə kɔʼ nə ntsuʼu ntəghə ə?

³⁰Bəghəshi tsu bə wû wə wə̀ nya fey n zat kə fəkaʼ.”

³¹N jii i mɔʼɔ zə, ghə fɔɔngili a nii ghə nsə ghə̂ a dii a kəlaŋ ghə n sɔʼlə wi dza n wû i ghə nə̀, “Tə â bəghəshiə ghə̂ a loʼ ghə, tə bəghəshi tsu soʼo wû u wi nya.

³²A dza i koʼ wù wey Zə̀ kə â dza naŋa nə̀ i tûm bənu tɔŋŋə də̀ŋ kə naʼ zə Izree, tə shi tsu bə fey n zat kə fəkaʼ, a i bəghəm fu bə tə̀ wi.” Ghə̂ ghey ghə â dzəŋi baanə ghə ghi Yeso n kpaalə soʼo wi.

³³Ambə n fə̀ŋ ə tsə, ləm kə n bwù bə nə inaʼ, zə n doʼo ndòw kùm ndòw nə tənəŋə tətəghə.

³⁴Nə tənəŋə tətəghə, Yeso n dey shi kɔʼ n dzə i taw zə dza nə̀, “Elɔi, Elɔi, lama sabadani?” I diinə nə̀, “Zə̀ kuŋ, Zə̀ kuŋ, a loʼ kee wə maʼa naŋanə mə sa a?”

³⁵Ghə̂ a loʼ ghə fu n zow ghəə ghey tə dzanə, ghə n kee dza i ghə zə nə̀, “Zow na, tə tɔŋŋə Elayja!”

³⁶Wù umɔʼ ə ghə n nyəŋ kɔʼ ndòw ghi sàa wə, kuu nyi tsu n nlə n mgbaŋŋə mə, khəə kɔʼ n mbaŋ, dii keeli kɔʼ ndòw n dzuu i Yeso nə̀ tə sɔllə mə̂, dza tə̀ ghə̂ ghey fu nə̀, “Saa ləmə tsu, a koʼ nə̀ Elayja î bəghə ney shiə tsuu bənu wi.”

³⁷Yeso n dey shi kpiʼi kɔʼ n dzə i taw zə, daŋŋə kpu i kɔʼ.

³⁸Kə̀ŋ wey wə â dzawwənə ndaw Kəzə̀ i nii zə n Yerosalem n bàalə shi tsu bə nə utɔŋ ubəghə ni zey tsu idəŋ tsu kùm itən.

³⁹Wù nii ə təsawgoʼ wey tə â teynə fu n sə kə zat kə fəkaʼ n zow nghee tə deynə, koʼ nghee Yeso kpunə tii dza nə̀, “Wù wən â ndzəm loʼ waa Kəzə̀.”

⁴⁰Gheyzən a loʼ ghə â loʼ fu ghə laalə bənə nə kədaa. Maliya Magdala, Maria nay Jems ghi Yosef, nsə Salome.

⁴¹Ghə â kaʼ ni dzûmə Yeso nə̀ tə nam loʼ n Galili, ghə n gaamə bə wi. Ndəmə gheyzən a loʼ ghə ghə â dzûmə kɔʼ bənə wi n Yerosalem n loʼ soʼo fu.

⁴²Â loʼ n tsuʼ fey ghə bayyənə ghəə ghə tii, tɔŋŋə tsuʼ fey ghə̂ ghə a bayyə ghəə ghə ni zə̂ tsuʼ inaʼ. Ambə n nəŋə i fənə tə,

⁴³Yosef, wù Alimatia n ndòw bə. Tə â loʼ wù nii n ndaw tsə, tə n ləmmə tənə bə i fɔɔ u Kəzə̀. Tə n kow tsu fə̀ŋ ndòw bəb ndòw vən i Yeso n wɔ Pilato.

⁴⁴Dzuu zə n zum Pilato nghee tə zow tsunə nə̀ Yeso n ghaʼi kpu. Tə n tɔŋɔ tsu sawgoʼ zey zə â loʼnə tow kə fu ni bəb zow nə̀ ghab kə n shi nghee tə̀ Yeso mə kpunə.

⁴⁵Ambə sawgoʼ zey bəghəm bənə nə tə n kpu, Pilato n dza tə̀ Yosef nə̀ tə loʼ ni ndòw ney vən i Yeso.

⁴⁶Yosef n zuu kɔʼ ndzə tə fəmə tə, ndòw ney shi tsu bə vən i Yeso, baŋ kɔʼ tii, ndòw naŋa ndòw n say zey tə â təm nyi ndòwnə nə kənaa. Tə n bəŋŋə tsəd bə dzuu zə isay zey nə kənaa.

⁴⁷Maliya Magdala, ghi Maria nay Yosef n tsìi laalə kənu, ndòw koʼ tsu luʼu key ghə naŋanə vən i Yeso zə tii.