Read Weh Malakus 6 Bible Online

Malakus 6 - Weh bible

Malakus 6

¹Yeso n zəghə tsu fu ndòw dzəŋŋə n naʼ i wi, ngəd tə wi tə n dzûmə ndow soʼo wi.

²Ambə n tsuʼ inaʼ, tə n dii aghəə n ndaw kədzəŋi ə ghə. Ndəmə aghə̂ ghə n loʼ fu, zəllə ghɔɔmə i wi. Dzuu zə n ngii zum ghə, ghə n bəbə nə̀, “Wù wən zoʼlə bə ghee ghəə ghən ə? Tə nuu bə ghee n ndzoʼo tɔb u wən ə? Tə ghəŋŋə daŋŋə soʼo nfaalə.

³À wən way wù wey tə kɔmnə kaʼ mə ə, tɔŋŋə waa Maria ə? Waazə a wi a way Jems, Yosef, Judas, nsə Shimun ə? N dza waazə a wi a zən a mgbaŋ muu kə fa ghi ghey ə?” Sey, ghə n fəələ ndòw n fə̀ŋ n ghəə ghey tə̀ dzanə.

⁴Yeso n dza tə̀ ghə nə̀, “Ghə ngɔɔmə tsə wù tûm Kəzə̀ luʼu tədzəm a may kə n naʼ i wi nsə n ndaw wi ghə ngɔɔmə way wi.”

⁵Sey, tə n way ni ghəŋə ndəmə nfaalə fu, a may kə səfə ghə̂ a dzaŋa à loʼ ghə tə a mɔmnə ghə, ghə n taw kɔʼ.

⁶Ghə i tii zə n tsəghəshi wi, n təŋkey, ghə̂ ghə inaʼ a wi ghə â khə way bəghəm i fə̀ŋ zə. Yeso n nuu tsu fu, bwey ndow naʼa tə naʼa, dii ndow aghə̂ n ghəə ghə.

⁷Yeso n tɔŋɔ naŋa bə ngəd tə wi tey ighəm n ghii tə təbəghə, tûm shi ndòw ghə abəghə, abəghə nə̀ ghə ndòw naʼa tûm Kəzə̀. Tə n fuu tsu ghə n daʼa kə ni dzùm shi zay u bwu wə n kow ghə̂ ghə.

⁸Tə n dza tə̀ ghə nə̀, “Tə̀ ghaa ndownə, kə̂ ghaa nə neynə fə kə loʼ kə a may kə mbaŋ i nyəllə zə. Kə̂ ghaa nə neynə fəzəə wə, kəmbəghə, nkee ukhəə.

⁹Dzəŋə kɔʼ na gow tə, kə̂ ghaa nə kee neynə ndzə tə loʼ tə ni kweyyə dzəŋə.”

¹⁰Tə n ndòw n sə kə dza tə̀ ghə nə̀, “Abə ghə bəghəm naŋanə ghaa n luʼu kə loʼ kə, doʼo tsu na fu n ndaw tii ni ndòw kùm tsuʼ fey ghaa i shiənə fu inaʼ.

¹¹Abə ghaa bənə n naʼ zey ghə ka bəghəm naŋa ghaa fu, tuu soʼo ni zow tə ghaa, ghaa buʼ maʼa tsu bvə kə naʼ i ghə n fuu i ghaa, tə a loʼ tsəə n ghə i bəbə zey ghə ghəŋənə, ghaa shi nuu n naʼ i tii zə.”

¹²Sey, ghə n nuu shi i ndòw naʼlə kaabə tûm Kəzə̀ nə̀ ghə̂ a kweyyə fə̀ŋ tə ghə.

¹³Ghə n dzùm shiə zay u bwu wə n kow ndəmə aghə̂, zɔʼlə tsu ndəmə ghə̂ a dzaŋa ghə nə mmbvə, ghə n taw i kɔʼ.

¹⁴Helɔd n zow tsu ghəə ghən, n təŋkey, Zɔŋ wə â ngii fuŋu n zəd i Yeso. Ghə̂ a loʼ ghə n dza kaabə nə̀, “À loʼ Jɔn wù fuu u mmuu n Kəzə̀ mə tə zhəm dzəŋŋə bənə nə ivə, à wey loʼ ghə i tii zə tə khənə daʼa kə ni ghəŋə faalə mən.”

¹⁵Ghə̂ a loʼ ghə n kee dza nə̀, “À loʼ wù tûm Kəzə̀ Elayja.” A loʼ ghə n dza nə̀, “Tə maŋ loʼ wù tûm Kəzə̀, tə a loʼ a ghey ghə â loʼ tsənə sə̂ i sə̂.”

¹⁶Ambə Helɔd zow tsunə ghəə ghən, tə n dza nə̀, “Jɔn wən mə â gboonə tow kə wi kə, tə n zhəm dzəŋŋə nə ivə.”

¹⁷Zə n loʼ nə̀ â lòʼ Helɔd n wû u wi wə, tə̀ â dzanə nə̀ ghə kwu fìi naŋa ndòw Jɔn, bòʼ nə̀, Helɔd â tsìi ney Herodias wey waazə ə wi tɔŋŋə Filip.

¹⁸Jɔn wù fuu u mmuu n Kəzə̀ mə n dza kuulə kə tə̀ wi nə̀, “Laŋ kə saa kə ka bəghəm dzə nə̀ wə ney wey waazə wə n wey!”

¹⁹Sey, Herodias n khə fənyiʼi n kow Jɔn, ləghə ni wey wi, kəŋŋə kìi jìi bòʼ Helɔd.

²⁰Helɔd â tsəŋənu Jɔn n təŋkey tə â khə nə̀ Jɔn loʼ wù tsətsəghə, loʼ soʼo wù zow wə. Sey Helɔd n baʼa mbaŋ n tow kə wi. Tə â ləghənu ni zəllə ghɔɔmə i Jɔn zə, a kee loʼ nə̀ tə â ləghə way ghəə ghey Jɔn â dzanə.

²¹Herodias n bə keeli kɔʼ kəbùʼ. Â loʼ n tsuʼ zə̂ key ghə â jinə Helɔd tii. Helɔd n tɔŋɔ naŋa bə kəzə̂ ni zə̂ tsuʼ fə wi fə jiə fə, Tə n tɔŋɔ bə ngəd tə kəfwaʼ tə wi, ngəd tə təsawgoʼ nsə ghə̂ a nii ghey n mboʼo Galili idzəm.

²²Waa Herodia u zən wə n bə bən fu sa, zə n dzɔb nay ndòw Helɔd nsə ghə̂ a wi ghə. Sey, Helɔd n dza tə̀ waa u zən wey nə̀, “Dza bə fə kə ghaa kə wə̀ ləghənə nə̀ n fuu tə̀ wɔ, mə i fuu bə tə̀ wɔ.”

²³Tə n kaa tsu dza tə̀ wi nə̀, “N dza bə tə̀ wɔ nə̀, fə kə ghaa kə wə bəbnə n wɔ mə, mə î fuunu tə̀ wɔ. Abə a loʼ kə ni dzawwə tsu fɔɔ wuŋ nə ubad ubəghə n fu bə kəbad kəmɔʼ tə̀ wɔ.”

²⁴Sey, waa tii n ndòw bəb ndòw tə̀ zə̂ nə̀, “N loʼ ni bəb wi n kee?” Nay wi n dza nə̀, “Dza tə̀ fu bə wɔ n tow kə Jɔn wù fuu u mmuu n Kəzə̀ mə.”

²⁵Waa tii n nyəŋ dzəŋŋə ndòw, ndòw dza ndòw tə̀ Helɔd nə̀, “N ləghə nə̀ wə fuu bə mə n tow kə Jɔn wù fuu u mmuu n Kəzə̀ mə nə kəneeli!”

²⁶Ghəə zən n fəmmə nay ndòw Helɔd n fə̀ŋ, jii i loʼ zə n kee way ni tuu wi n fə key tə bəbnə bòʼ kaa mey tə mə neynə n sə kə ghə̂ a wi.

²⁷Sey, tə n daŋŋə tsəʼlə kəlaŋ tə̀ wù wey tə keyyənə wi nə̀ tə ndòw gboo bə tow kə Jɔn. Sawgoʼ ə tii n nuu ndòw n ndaw tsaʼ, ndòw gboo tsu tow kə Jɔn.

²⁸Tə n ndòw bə ghi tow kə Jɔn kə nə kəneeli, bə fuu bə tə̀ waa u zən wey. Waa u zən wey n ney ndòw fuu ndòw tə̀ nay wi.

²⁹Ambə dzûmə tə Jɔn tə zow tsunə nə̀ ghə n wey wi, ghə n ndow boʼo nuu kɔʼ vən i wi, ndòw tsəllə tsu wi.

³⁰Ngəd tə Yeso tə n dzəŋŋə bə, bə dza bə tə̀ Yeso ghəə ghey ghə fwaʼnə nsə ghəə ghey ghə mə diinə adzəm.

³¹Ndəmə aghə̂ ghə n bəghə ni bə koʼ Yeso, Yeso ghi ngəd tə wi tə n buʼ way ni doʼo zə̂ kɔʼ. Sey tə n dza tə̀ ngəd tə wi tə nə̀, “Bəghə na a ndòw n luʼu key ghə̂ a way fu, tə̀ a zayyə tsu fənyaŋi.”

³²Sey, ghə n nyi kɔʼ nə kəfən nuu ndòw n luʼu key ghə̂ a way fu.

³³Ndəmə aghə̂ n nam koʼ keeli ndòw ghə nghee ghə nuulə ndownə, kee nuu ndòw naʼa tə naʼa n nyəŋ zə nə aghow, ndòw nyi ndòw fu isə nə̀ Yeso ghi ngəd tə wi tə ka kam bə nyi.

³⁴Ambə Yeso shi tsunə nə kəfən, koʼ ndòw nɔɔ kə aghə̂ key kə teynə, sî zə n kwu wi n kow ghə, n təŋkey, ghə â loʼ tə̀ a loʼ tənjì nə tə khə way wù baʼa wə. Sey tə n kaʼ ndòw ni dii ghə n ndəmə tə aghəə tə.

³⁵Ambə tsuʼ u dzəə bənə, ngəd tə wi tə n bə dza bə tə̀ wi nə̀, “Nəŋə zə n ndòw, a wən loʼ luʼu kə mbvən.

³⁶Dza nə̀ ghə̂ ghən nuu, ghə ndòw kəŋ zuu ufəzəə n naʼa tən tə kuʼlə loʼnə fa.”

³⁷Yeso n dza tə̀ ghə nə̀, “Kəŋ fu na ghə n fəzəə wə.” Ghə n bəb tə̀ wi nə̀, “Wə dza a ndòw bəəbə maʼa ndòw ndəmə khəə wən a loʼ ni tsə wù kəfwaʼ nə təndzɔŋɔ ifam ni zuu ufəzəə tə̀ ghə̂ ghən ə?”

³⁸Yeso n bəb ndòw tə̀ ghə nə̀, “Ghaa khə ubaa usiʼi fey ə? Ndòw laalə tsu na.” Ambə ghə ndòw laalə tsunə, ghə n dza tə̀ wi nə̀, “A khə ubaa utaa nsə tsəghə tə təbəghə.”

³⁹Yeso n dza ndòw tə̀ dzûmə tə wi tə nə̀ ghə doʼlə naŋa ndòw ghə̂ ghey nə ntuʼu aghəd.

⁴⁰Sey, ghə n doʼlə naŋa ndòw ghə nə ntuʼu. Tuʼu n loʼ mə n loʼ aghə̂ fəbɔm fəbɔm, tuʼu n loʼ mə n loʼ aghə̂ nghəm ntaa ntaa.

⁴¹Sey Yeso n ney kɔʼ baa wey utaa nsə tsəghə tey təbəghə, laalə kɔʼ ndòw idəŋ, fuu tsu zɔŋŋə K-a-zə̀, boʼlə fuu ndòw baa wey tə̀ ngəd tə wi tə nə̀ ghə dzawwə fuu ndòw tə̀ ghə̂ ghey. Tə n dzawwə fuu tsu soʼo tsəghə tey tə̀ ghə.

⁴²Ghə adzəm n zə̂, zə̂ kow i tsu.

⁴³Ngəd tə wi tə n nam kûmmi kɔʼ ukhəə ighəm nsə khəə wə ubəghə n boʼo mə nbaa mey nsə sadla n tətsəghə mey mə â doʼo səənə.

⁴⁴Taŋ ə gheynum ghey ghə â zə̂nə â loʼ aghə̂ təkam tətaa.

⁴⁵Yeso n daŋŋə kuu nyi kɔʼ ngəd tə wi nə kəfən nə̀ ghə nuu ndòw isə n naʼ i Bedsayda. Tə n kee doʼo səə tsu ni sali maʼa nɔɔ kə aghə̂ key.

⁴⁶Ambə tə saali maʼa tsunə nɔɔ kə aghə̂ key, tə n kɔʼ ndòw nə ukaʼ ni ndòw gɔŋŋə.

⁴⁷Ambə n kuubə tə, fən key kə n loʼ n fə̀ŋ inyi, Yeso n nam loʼ fa n nəŋə wi n nguŋ inyi.

⁴⁸Tə n koʼ ndòw nə̀ ngəd tə wi tə dəmənu ni bàŋ kəfən, n təŋkey zəŋ i taw zə â fədlə tənə dzəŋŋə ndow ghə ibam. Sey, n key kə utsuʼ, Yeso n ndòw bə n səə ghə nə̀ tə bwey bə n tow kə dzuu, tə n ndza i buʼ tsəghə daŋŋə ghə.

⁴⁹Ghə n koʼ ndòw wù loʼ tə bwey bənə n tow kə dzuu, kaʼ ni dey, buʼlə shiə kɔʼɔ nbɔŋ dza kə nə̀ a loʼ avəətsəə.

⁵⁰N təŋkey, tsəŋ zə â ngii kwu ghə nghee ghə koʼ ndownə wi. Yeso n daŋŋə ghɔɔmə ndòw tə̀ ghə dza nə̀, “Tsuulə tsu na fə̀ŋ tə ghaa tə, à loʼ mə, Kə̂ ghaa nə tsəŋənə.”

⁵¹Sey, tə n nyi kɔʼ nə kəfən ghi ghə. Zəŋ zey n daŋŋə fuŋ doʼo ndòw mɔŋ. Dzuu zə n zum ngəd tə wi,

⁵²boʼnə ghə â ka kam zowkeeli dzə nghee Yeso a chinə ghə̂ ghey təkam tətaa nə ubaa utaa nsə tsəghə tə təbəghə. Ghə n kam way ni tɔʼ bəghəm n fə̀ŋ tə ghə.

⁵³Ambə ghə daŋ shi bənə n nguŋ inyi n bad kə mboʼo Jenesalet, ghə n kow naŋa tsu kəfən fu.

⁵⁴Nghee tə̀ ghə shi tsunə nə kəfən, ghə̂ ghə n koʼ keeli ndòw Yeso.

⁵⁵Ghə n nyəŋ kaabə tsəghə ndòw mboʼo tii idzəm, luʼu kə ghaa kə ghə a zownə tə loʼ fu, ghə n boʼo bə ghə̂ a dzaŋa ghə n səə wi n mbùŋ u ghə.

⁵⁶Luʼu u ghaa wə Yeso â ndòwnə n naʼa tə tii tə tədzəm, ghə̂ ghə n ney naŋŋə bə ghə̂ a dzaŋa ghə n faabə tə jìi, ghə n buʼu wi n wɔɔ kə nə̀ ghə mə labi mɔm tsu kə dzuu i təndzə̂ i wi. Ghə̂ ghey adzəm ghə â mɔmnə wi, ghə n taw i kɔʼ.