Read Weh Malakus 8 Bible Online

Malakus 8 - Weh bible

Malakus 8

¹N tsuʼu n tii mə, nɔɔ kə aghə̂ kə loʼ kə n dzəŋi bə n səə Yeso, ghə n khə way fə kə zəə kə. Sey, Yeso n tɔŋɔ bə ngəd tə wi n səə wi, dza ndòw tə̀ ghə nə̀,

²“Sî i kwɔɔ mə n kow nɔɔ kə aghə̂ kən, n təŋkey, ghə n doʼo ghi mə̀ fa nə ntsuʼu ntəghə nə̀ ghə ka fə kə zə̂.

³Abə n dza tsunə nə̀ ghə nuu ndòw n ndaw tə ghə n dzəŋ, ghə loʼ ni ndòw mbvuŋŋə bwù n jìi, boʼnə ndəmə ghə nuu nay bənu.”

⁴Ngəd tə wi tə n bəb ndòw tə̀ wi nə̀, “A î keeli ghee ndəmə ubaa ni chi ndzoʼo nɔɔ kə aghə̂ kən fa n mbvən ə?”

⁵Yeso n fəd bəb ndòw tə̀ ghə nə̀, “Ghaa khə ubaa usiʼi fey ə?” Ghə n dza nə̀, “Ghey khə kə ubaa usəghəmbəghə.”

⁶Yeso n dza ndòw tə̀ nɔɔ kə aghə̂ key nə̀ ghə doʼo tsu aghəd. Tə n ney kɔʼ baa wey usəghəmbəghə, fuu tsu zɔŋŋə K-a-zə̀, boʼlə fuu ndòw tə̀ ngəd tə wi tə nə̀ ghə dzawwə fuu ndòw tə̀ nɔɔ kə aghə̂ key. Ghə n dzawwə fuu i ndòw.

⁷Ghə n khə soʼo sə̂ fə tətsəghə fə loʼ fə, Yeso n ney buulə tsu soʼo, fuu ndòw n wɔ ghə, dza tə̀ ghə nə̀ ghə dzawwə fuu ndòw.

⁸Nɔɔ kə aghə̂ key n zə̂ sa, zə̂ kow i tsu. Ngəd tə Yeso tey n kuumə bə sadla mey mə â doʼo səənə, mə n shi kɔʼ ukhəə usəghəmbəghə.

⁹Nɔɔ kə aghə̂ key â loʼ aghə̂ təkam təkaykə. Ambə Yeso zəghə maʼa ndòw nɔɔ kə aghə̂ key nə̀ ghə nuu,

¹⁰tə n daŋŋə nyi kɔʼ nə kəfən ghi ngəd tə wi tə, nuu ndòw n mboʼo Damanuta.

¹¹Ghə̂ a tə Falasi a loʼ ghə n bə ni bə mɔm koʼ Yeso. Ghə n dza nə̀ tə dii bə tsəə ni dii tsu nə̀ daʼa kə wi kə nuu bə idəŋ.

¹²Yeso n sɔm nay ndòw n fə̀ŋ ə wi dza tsu nə̀, “Ghə̂ a num tə tən ləghə nə̀ n dii bə ghə n tsəə nə̀ a loʼ kee? N kuum dza bə isəŋə tə̀ ghaa nə̀, mə i dii way tsəə i loʼ zə tə̀ ghaa.”

¹³Yeso nsə ngəd tə wi tə n zəghə tsu ghə, nyi kɔʼ nə kəfən, nuu daŋ ndòw n nguŋ inyi i loʼ zey.

¹⁴Ngəd tə Yeso tə mâ neyzəə ni ney ubaa, ghə n khə kə kəbaa kəmɔʼ fu nə kəfən.

¹⁵Yeso n dza ndòw tə̀ ngəd tə wi tə nə̀, “Ney na ghə̂mə zə n tsə̀ i ghə̂ a tə̀ Falasi nsə tsə̀ i Helɔd zə, n tənkey, i kuu tənyɔʼ tə̀ à loʼ mbvuŋ.”

¹⁶Ghə n kaʼ ni ghɔɔmə n wû i ghə dza nə̀, “Tə sey dza nghee a mə ka ney ubaa.”

¹⁷Yeso n khə ghə zey ghə ghɔɔmənə, sey tə n bəb tə̀ ghə nə̀, “À loʼ kee ghaa dza nə̀ ghaa khə way baa kə ə? Ghaa nam kam zowkeeli way ghəə ghə ə. Fə̀ŋ tə ghaa tə nam taw kənu ə?

¹⁸Ghaa khə asə̂, koʼo way luʼu tə. Ghaa u khənə tuŋŋə wə, zow way ghəə ghə. Ni bə kuum nya, ghaa moʼlə way ə?

¹⁹Nghee tə̀ mə â boʼlə funə baa wə utaa tə̀ ghə̂ ghə təkam tətaa, ghaa â kuumə zuŋŋə bə boʼlə mə n baa nə ukhəə usiʼi?” Ghə n dza nə̀, “Ukhəə ighəm n khəə wə ubəghə.”

²⁰Yeso n kəm bəb ndòw tə̀ ghə nə̀, “Ambə nghee n boʼlə funə baa wə usəghəmbəghə tə̀ ghə̂ ghə təkam təkaykə, ghaa â kuumə zuŋŋə bə boʼo mə n baa nə ukhəə usiʼi?” Ghə n dza nə̀, “Usəghəmbəghə.”

²¹Sey tə n bəb ndòw tə̀ ghə nə̀, “Ghaa ka nam kam zowkeeli ghəə ghən ə?”

²²Yeso ghi ngəd tə wi tə n ndòw bə n naʼ i Bedsayda. Ghə̂ a loʼ ghə n ney bə wù fəbə u loʼ wə n səə Yeso, buʼ wi n wɔɔ kə nə̀ tə mɔm tsu wi.

²³Yeso n taali nuu shi ndòw wù fəbə wey n naʼ i tii zə. Tsə tsu ntəghə n sə̂ a wù fəbə wey, gaʼ ndòw kəwɔɔ n kow wi, bəb tə̀ wi nə̀, “Wə kpaʼi koʼonu fə kə loʼ kə ə.”

²⁴Tə laalə tsə təluʼu, dza tə̀ wi nə̀, “N koʼonu ghə̂ ghə, a kee loʼnə n koʼo ghə tə̀ a loʼ nkaʼ n bwey tsəghənə.”

²⁵Yeso n gaʼ kpiʼi ndòw wɔɔ a wi n sə̂ a wi. Wù tii n tɔʼ sɔʼ laalə ndow təluʼu, sə̂ a wi ghə n kəm kaʼ dzəŋŋə ndow ni koʼ təluʼu. Tə sey zeynu ni koʼo dzɔbə ghəə ghə adzəm.

²⁶Yeso n daŋŋə tûm dzəŋŋə ndòw wi n ndaw, dza tə̀ wi nə̀, “Kə̂ wə nə ndòw dzəŋŋənə inaʼ.”

²⁷Yeso ghi ngəd tə wi tə n nuu daŋŋə ndòw n badla tə naʼ i Kayserya Filipi. Nghee tə̀ ghə ndòwnə n jìi, Yeso n bəb ndòw tə̀ ghə nə̀, “Ghə̂ a baa dzanə n loʼ ndee?”

²⁸Ghə n dza tə̀ wi nə̀, “Ghə̂ a loʼ a dza nə̀ wə loʼ Jɔn wù fuu u mmuu n Kəzə̀ mə. A loʼ a dza nə̀ wə loʼ Elayja, a loʼ ghə u dzanə nə̀ wə loʼ wù tûm Kəzə̀ u wey u loʼ wə.”

²⁹Yeso n bəb ndòw tə̀ ghə nə̀, “Abə ghaa, ghaa dza nə̀ n loʼ ndee” Pita n dza tə wi nə̀, “Wə loʼ wù wey Zə̀ kə â dza naŋa nə̀ i tûm bənu.”

³⁰Yeso n kii naŋa ndòw ghə nə̀ kə̂ ghə nə̀ dzanə ghəə ghən tə̀ wù loʼ.

³¹Yeso n kaʼ ndòw ni dii aghəə tə̀ ngəd tə wi tə nghee tə̀ tə khənə ni fəghə, dza tə̀ ghə nə̀, “Waa wù sɔŋtsuʼ khə ni koʼ ndəmə uchɔd, ngəd tə inaʼ, ghə fɔɔngili a nii ghə, nsə ghə̂ a dii a kəlaŋ ghə i tuu maʼa wi. Ghə i wey wi, a i bə tsuʼu n tsəghə tsunə ntəghə, tə i zhəm dzəŋŋə bə nə ivə.”

³²Tə n tiilə dzìi may shi ndow ghəə a tii ghə tə̀ ghə. Sey Pita n bɔɔ təmi ndòw ghi Yeso, kaʼ ni kpaa wi nə̀ kə tə nə kəm ghɔɔmə ndzoʼo ghəə ghey.

³³Yeso n fəd khə̀mmə dzəŋŋə bə, laalə ndòw dzûmə tə wi, kpaa dzəŋŋə ndòw wi nə̀ kə tə nə kəm ghɔɔmə ndzoʼo ghɔɔmə zey, dza tə̀ wi nə̀, “Nuu n tûm usə̂ wuŋ ə Satan, n təŋkey, ghəə ghey wə moʼlənə ka nuu bə dzə n wɔ Zə̀ kə, a fəd nuu bə n wɔ wù sɔŋtsuʼ.”

³⁴Yeso n tɔŋɔ bə nɔɔ kə aghə̂ key nsə ngəd tə wi tə dza tə̀ ghə nə̀, “Abə wù ləghənə ni dzûmə mə, tə khə ni tuu maʼa wû u wi, tə boʼo kɔʼ zat kə fəkaʼ kə wi tə, tə dzûmə bə mə.

³⁵N təŋkey wù wey tə ləghənə ni bəghəshi wû u wi, tə i nayyə maʼanu. Abə wù wey tə kee nayyə maʼanə muu i wi zə bòʼ mə nsə tûm i dzuŋu zə, tə i keeli muu zə itsali.

³⁶Wù zəə kee abə tə keelinə fə u mbi wə udzəm, kee nayyə maʼa ndòw muu i wi ə?

³⁷Wù loʼ ni fuu ndzoʼo fə kə ghaa kə ni kùm nuu shi muu i wi ə?

³⁸Wù wey tə dədlənə n tow kə bòʼ mə, nsə ghəə ghən n diinə fa n mbi zən nya ghə nəb ityim nsə bəbə bəbə tə aghə̂ tə kəmənə tii, mə, Waa wù sɔŋtsuʼ, mə i dədlə soʼonu n tow kə n kow wi abə mə i dzəŋŋə bənə n ghaʼ i Bày zə nsə tsətəndəghə tə Kəzə̀ tə zow tə.”