Read Weh Lukas 10 Bible Online

Lukas 10 - Weh bible

Lukas 10

¹Abə ghəə ghən tsəghə tsu nə̀, Mûkəbii n say shi bə tədzûmə nghəm nsəghəmbəghə ghi ghə abəghə, tûm shi ndow ghə abəghə, abəghə isə n naʼa tən tədzəm n luʼu tey tə â khə ni nam ndow fu.

²Nghee tə dza i tûm shi ndow ghə, tə n dza tə ghə nə̀, “Fəzəə u ngii loʼ nə usum, ghə̂ a kəfwaʼ ghə a basə way ni dumə fən. Sey gɔŋŋə ndòw na tə̀ Mûkəbii, tə loʼ nə mû usum tə̀ tə tûm kpiʼi bə ghə̂ a kəfwaʼ n sûm u wi.”

³Ndòw na, N tûm shiə ndòw ghaa tə̀ a loʼ waa a tənjì n fəŋŋə kə ubəghə.

⁴Kə̂ ghaa nə neynə mbəghə fə ukhəə fə, nkee kəmbəghə, mɔ təgow ni tsɔʼ kweyyə. Kə̂ ghaa nə tɔŋŋəzownə wù n jii.

⁵Nə̀ ghaa nyi kə n ndaw i ghaa zə, dza tsu na tə̀ ghə̂ ghey fu nə̀, “buulə zə i loʼ i ghaa fa ndaw.”

⁶Abə a lòʼ nə wù dzuŋu lòʼnu fu tii n ndaw, buulə i ghaa zə i doʼo ghi wi, nə a way sey, zə i bə dzəŋŋə tə̀ ghaa.

⁷Dòʼotsu kə na n ndaw imɔʼ, kə̂ ghaa nə̀ bweynə ndaw tə̀ ndaw, ghaa i zəə, məə fə key ghə i funə fu tə ghaa, n təŋkey wù kəfwaʼ khə ni keeli kənaamə n fwaʼ kə wi.

⁸Abə ghaa nyinə n naʼ i loʼ zə ghə kpii neynə ghaa fu, nə̀ ghə fu kə kee tə̀ ghaa, ghaa n zə soʼo.

⁹Baŋŋə na ghə̂ a dzaŋa ghə, ghaa i naʼa ndòw tə̀ ghə̂ ghə nə̀ fɔɔ u Kəzə̀ wə n shɔd.

¹⁰Abə ghaa nyi ndòwnə nə inaʼ nə ghə ka ghaa kpii ney, shi ndòw na n zeeli kə inaʼ, ghaa dza tsunə,

¹¹“Kasə̀ bvə kə naʼ i ghaa, kə i doʼo way n fuu i ghey, a sa buʼu maʼanu. Seykə keeli tsu na nə fɔɔ u Kəzə̀ wə n shɔd.

¹²N kûm dza bə tə̀ ghaa nə̀, N tsuʼ fey Zə̀ kə i saʼanə mbi tii, buulə zə i buʼ lòʼ kow Sodom tsəghəshi naʼ i tii zə.”

¹³“Ngoʼ i lòʼ tə ghə̂ a Korazən nsə ghə̂ a Besayda ghə bòʼ ghəə a faalə ghə mən ghə fwaʼnə n naʼa tə ghaa, bə ghə a fwaʼnə n naʼa tə Tayra ghi Sidɔn, tə̀ ghə a kweyyə fə̀ŋ tə ghə, ghə doʼo bə n ndzə tə ivə tə nə udzə̀m.

¹⁴Sey kə, n tsuʼ fey Zə̀ kə i saʼanə mbi tii, buulə zə i buʼ lòʼ n kow Tayra ghi Sidɔn tsəghəshi n kow ghaa.

¹⁵Abə ghaa ghə̂ a Kapenum ghaa nya moʼlə kə nə Zə̀ kə i kɔʼlə naŋa kɔʼɔnu ghaa idəŋ. À way dzə sey. Ghaa i nyiə nə uvəllə.

¹⁶Wù wey tə zownə tə ghaa, sey zow soʼo tə mə, tə wey tə tuu maʼanə ghaa, sey tuu maʼa soʼo mə. Wù wey tə tuu maʼanə mə, sey tuu maʼa soʼo wù wey tə tûmnə mə.”

¹⁷Ambə dzûmə tə wi tey nghəm səghəmbəghə n ghə̂ ghə abəghə dzəŋŋə bənə n duʼlə zə, ghə n dza ndòw tə̀ wi nə̀, “Mûkəbii, zay u bwu u mə məŋə zow bə soʼo tə ghey abə ghey tɔŋŋə tsunə zəd zə zə̀.”

¹⁸Tə n dza ndòw tə̀ ghə nə̀, “Mə koʼ Satan tə bwù tsu bənə tə̀ a loʼ ighow i mwallə zə n bikighow.

¹⁹Zəllə na, mə n fu ghaa n daʼa kə tə̀ ghaa lòʼ ni bwey nə təzuu, n kow nàŋ tə, nsə ni təm zə̂ daʼa u ghə̂ a təngəmə, fə kə lòʼ kə nə way ni mɔm bəəbə ghaa.

²⁰À kee loʼ nə̀, i kə ghaa nə duʼlənə nə̀ zay u bəbə u zow tə ghaa, ghaa khə ni fədlə duʼlə n təŋkey zəd a ghaa a tɔ̀ɔ doʼo idəŋ.”

²¹N nəŋə i tii zə, Zay kə Zow kə n ghəŋə nə̀ Yeso ngii keeli iduʼlə. Kə n ghəŋə nə̀ Yeso dza tsu nə̀, “N fuu kəzɔŋŋə tə wɔ a Bày, wə loʼ Mûkəbii idəŋ nsə n ghəlikətsə, wə nyi naŋa ghəə ghən tə̀ ghə̂ a tɔbə ghə nsə ghə̂ ghə umaʼlə ghə, kee dii fu tsu tə̀ ghinətəghə ghə. Â sey loʼ nghee wə a ləghənə nə̀ ghəə ghə a doʼo tii, a Bày.”

²²“Bày wùŋ n fu may fə wə udzəm tə̀ mə, wù lo khə way Waa tsəghəshiə way Bày, ighələ tə̀ wù way tə khənə Bày tsəghəshiə way Waa, nsə ghə̂ ghey Waa say kɔʼnə ni dii fu wi tə̀ ghə.”

²³Tə n khəəmə ndòw uwû, tsɔŋ dza tsu tə dzûmə tə wi tə nə̀, “Buulə i loʼ tə̀ ghə̂ ghey ghə koʼo soʼonə ghəə ghey ghaa koʼnə!

²⁴N dza bə tə̀ ghaa nə̀, ndəmə tûm tə Kəzə̀ nsə də̀ŋ wə â ləghə ni koʼ ghəə ghey ghaa koʼnə, ghə n ka koʼ nsə ni zow ghəə ghey ghaa zownə, ghə n ka zow.”

²⁵N tsuʼ fə loʼ fə, wù dii u kəlaŋ u loʼ wə n bə ni bə mɔɔmə koʼ Yeso, tə n bəb ndòw tə̀ wi nə̀, “A wù dii wə, n khə ni ji ngee tə̀ mə ni keeli muu zə itsali?”

²⁶Yeso n beeli ndòw wi nə̀, “Ghə tɔ̀ɔ naŋa nə̀ ngee n màʼlə K-a-zə̀ ə? Wə̀ zowkeeli nə̀ ngee?”

²⁷Tə n beeli ndòw wi dza, “wə̀ khə ni ləghə Zə̀ kə, n fə̀ŋ zə idzəm, n zay kə kədzəm, n daʼa kə kədzəm, n moʼlə tə tədzəm, nsə nə wə̀ i ləghə waazùu tə̀ wə̀ ləghənə wû wə wə̀.”

²⁸Yeso n dza tə̀ wi nə̀, “Wə̀ n beeli dzɔb, î ghəŋə ndòw sey, wə̀ i keeli muu zə itsali.”

²⁹Wù tii n ləghə ni dii nə̀ tə â ghəŋŋə way ghəə a bəbə ghə. Sey, tə n bəb ndòw tə̀ Yeso nə̀, “Waa zə̂ wùŋ lòʼ ndee?”

³⁰Yeso n beeli ndòw wi dza, “Wu lòʼ a nuu tsu n Yerosalem tsu ndòw n Jeriko, ghə̂ a tsɔŋɔ ghə n kwu tsu wi, tsɔʼ nuu kɔʼ ndzə tə wi, bwɔd maʼa naŋa tsu wi fu n jii nə̀ tə loʼ n ghəə a kpuughə, nuu ndòw i ghə zə.

³¹Sey fɔɔngili u lòʼ wə n tsu bə n jii, ambə tə koʼ tsu nə wù wey, tə n bali tsəghə ndòw i wi zə.

³²Ngəd u loʼ wə n dzəŋi kə dzûmə tə Klisto n ndòw bə koʼ tsu wù wey, bali tsəghə ndòw soʼo.

³³Wù Samaria u loʼ wə tə a bweyyə ndòwnə n ndòw bə soʼo fu tii, ambə tə koʼ tsu nə wù wey, tə n kwɔɔlə isî n kow wi.

³⁴Tə n ndòw sow maʼa tsu fəŋ a wi, tsoʼlə tsu utey tii, bàŋ kɔʼ fəŋ a wi, boʼo gaʼ kɔʼ wi njakala fə wi, ney ndòw wi n ndaw i zayyə zə, laalə tə̀ wi.

³⁵Ambə tsətsə wey, tə n dza i nuulənu, fu naŋa tsu khəə u loʼ wə tə̀ wù kəfwaʼ wey fu, dza, ‘i laalə tə̀ wù wən, fə key wə i bəəbənə n kow wi, mə i bə kuumə abə n dzəŋŋə bənə.’”

³⁶Yeso sey bəb ndownu tə̀ wù wey nə̀, “Wə moʼlə nə̀ n ghə̂ ghən atəghə, waazə ə wù tii loʼ wù ghaa wə?”

³⁷Tə n dza, “Wù wey tə a kwɔɔlə sî zə n kow wi.” Sey Yeso n dza tə̀ wi nə̀, “ndòw, wə i ghəŋə soʼo sey.”

³⁸Nghee Yeso nsə dzûmə tə wi tə ndòw nə̀, ghə n nyi ndòw n naʼ i loʼ zə, weyzən u loʼ wə tɔŋŋə Matta, n tɔŋɔ bə wi ndaw wi.

³⁹Tə a khə waazə ə wi ghə â tɔŋŋənə nə̀ a loʼ Maria, Maria wən tə â bə doʼo bə n tə̀nə̀ Yeso, zəllə ghɔɔmə i wi.

⁴⁰Matta n kee dəmə kaabə n ghəə a khəələ ghə. Sey, tə n ndòw bə n səə Yeso dza, “Mûkəbii, koʼo waazə wùŋ tûmmə naŋa bə kəfwaʼ kədzəm tə̀ mə, dza ndòw tə̀ wi nə̀ tə bə tɔm bə mə.”

⁴¹Yeso fəd dza ndòw tə̀ wi nə̀, “Matta! Matta! Wə̀ ngii fəmmə wû wə n ndəmə tə aghəə.

⁴²Nə a loʼ sey ghə i ghəŋə i loʼ kə imɔʼ, sey, Maria n sày ghə zey i kpiilənə, ghə way ni ney nuu dzə fə kə tii kə n wɔ wi.”